Read obolo Urọk 3 Bible Online

Urọk 3 - obolo bible

Urọk 3

¹Gwun̄ n̄a, kawuuk ijejeen̄ n̄a, ire, sun̄ ikọ ntọbe me ejit kwun̄.

²Mije, ema mêrọ usen ugwem kwun̄ ijọn̄ọ, mè isa esuuk ijet owu.

³Tet ata ejit mè igbegbe utoon̄-ejit nye me ubọk; tobo ema kam me ebek kwun̄, ge ema sun̄ me emen emen ejit kwun̄.

⁴Sa me ikeya ke owu môkaan̄ nnwọn-isi mè ata erieen̄ me isi Awaji mè isi ebilene.

⁵Sa otutuuk ejit kwun̄ toon̄ me lek Okumugwem; kasa ngobo-ntet eyi akpalek kwun̄ ìbieen̄ me lek.

⁶Riọọn̄ Okumugwem me oniin̄ kwun̄ geelek, ke ọmọ môrọ mè oniin̄ kwun̄ ije itat.

⁷Kare ogwu òriọọn̄ inu me chieen̄ kwun̄ gaalek; tet Okumugwem ukpook me lek, mè da lek san̄a me lek ijọ inu.

⁸Eyi môre igwagwa isa inyi otutuuk akpalek kwun̄, mè irọ inyi otu ukwuuk kwun̄ isiki efuuk.

⁹Sa inu ubọọn̄ kwun̄ min Okumugwem; sa otutuuk adasi mfut uko kwun̄ geelek min ọmọ.

¹⁰Mgbọ ya, uwu isun̄-inorie kwun̄ môjot dum, aya miin̄ môkekiriak ifin me otu otutuuk ogbokot kwun̄.

¹¹Gwun̄ n̄a, kakpọ osusut Okumugwem ìsiki chieen̄, kacha ikan̄-inu kan̄.

¹²Mije, Okumugwem ìkikan̄ inu inyi ogwu îmabe, kubọk ute okikan̄ inu inyi gwun̄ kan̄ ogwu ejit kan̄ obelebe me lek.

¹³Uga ubelejit okweek inyi ogwu òweweek iriọọn̄-inu imun̄, mè ogwu òkakaan̄ ngobo-ntet.

¹⁴Mije, iriọọn̄-inu îkaan̄ oruru igak alata okuket, otu ewe kan̄ îgak echi atalek alata araran̄.

¹⁵Ọmọ înye otu ewe igak atalek ewuuk unye otu ewe rubi, inu geelek òkilọk owu ikakaan̄, kpebesa itọ me lek.

¹⁶Me ubọk agan̄ ulom kan̄, ujọn̄ọ ugwem okup, me ubọk agan̄ ujit kan̄, ubọọn̄ mè umin okup.

¹⁷Oniin̄ kan̄ ìre oniin̄ eyi utop, otutuuk oniin̄ kan̄ ìre esuuk esuuk.

¹⁸Uti òkinyi ene ugwem ke ọmọ ore inyi ebi ìtetet ọmọ ikaan̄ inye, ebi ìgọgọbọ ọmọ ikam mêkaan̄ uga ubelejit.

¹⁹Okumugwem ìsa iriọọn̄-inu itọbọ ọdọ linyọn̄, mè isa ngobo-ntet isun̄ akpabin inyọn̄ ikam me irek.

²⁰Ifuk-ibot kan̄ ke îsa itọọn̄ okwaan̄ ibak; sa me ifuk-ibot kan̄ ke oduku inyọn̄ orọn̄ọ mbat igwook.

²¹Gwun̄ n̄a, tet ata iriọọn̄-inu mè ata nkeek nye me ubọk, kachieek ibe chieen̄ kwun̄ ilọ me lek kiban̄ mgbọ geege.

²²Ema mêre ugwem isa inyi owu, mè ire nnwọn-isi eyi owu obokikwaan̄ me ebek.

²³Mgbọ ya, owu môkije me oniin̄ kwun̄ me utelelek, ukot kwun̄ ìkpotọbọ me lek ekpuk uti geege.

²⁴Osiyaka lek imaan̄ ibolaak, òkpofieek owot; osiyaka lek imaan̄, ata ilaak òtotop mônin̄ owu chieen̄.

²⁵Kafieek owot me lek ùrioon̄ òkinu me nriki, mè ìre me lek uyọrọlek ebi ikpak mêsabe inu.[1]

²⁶Mije, Okumugwem môkup me agba lek kwun̄; ọmọ ìkpochieek ibe ukot kwun̄ inin̄ me ufe.

²⁷Kajit irọrọ ata inu inyi ebi îgbebe, me mgbọ îrebe irek kwun̄ irọrọ.

²⁸Kabe ogwu melek kwun̄, “Je, mè yaka na. Iyakwut, mânyi owu,” me mgbọ inu ya ọmọ òwa me ubọk kwun̄ okupbe.

²⁹Kakeek ogwu ebilene ogbo kwun̄ ijo, mije, ìtotoon̄ ejit me lek kwun̄ ke iluk igba owu.

³⁰Katoon̄ ene uraamọn me ikike, mgbọ ene ya ìkarọ owu inu geege ìlọ.

³¹Kamin ejit me lek ogwu afa, kagogobo orọmijọn̄ kan̄ geege ìnyi lek kwun̄,

³²mije, ogwu ofiaan̄ ìre mbuban inu me lek Okumugwem, ire, ogwu òtatat melek kan̄ ìre mbuuruk.

³³Ufieek-otu Okumugwem òwa me uwu ogwu ikpak, ire, ugbana kan̄ òwa me uwu ogwu ata irọrọ.

³⁴Ọmọ ìkichak ogwu òkichak ene imọm, mè ikirọ nnwọn inyi ebi ìkisiki lek.

³⁵Ìrot ebi ìriọọn̄ inu ìre umin; ire, esip okup inyi ebi mbubut.