Read obolo Urọk 31 Bible Online

Urọk 31 - obolo bible

Urọk 31

¹Urọk ogwu ubọọn̄ Lemuwen, udọk udọk ikọ ogwu uga osabe iteme ọmọ nteme:

²“Jei, gwun̄ n̄a! Jei, gwun̄ òsibi emi me owot! Jei, gwun̄ inyan̄a-ibot n̄a!

³Kasa unye kwun̄ ìnyi ebibaan̄, kasa ugwem kwun̄ ìnyi ife cha ìkikpukpuku ebi ubọọn̄ igwook.

⁴“Jei Lemuwen! Miin̄ ìkakup ìnyi ebi ubọọn̄ ma! Ebi ubọọn̄ ekakinwọ miin̄! Ebi mkpulu esan̄a ebek me lek miin̄ òkisa ene ma,

⁵inyi ema ekanwọ, mè ìwuuk inu ikan otumube, mè ìfieek nlilọ oyerebet ìnyi ebi ekitutuku.

⁶Sa miin̄ ukan̄ nyi ebi ìbekwakwaan̄, mè sa miin̄ òkisa ene nyi ebi ugwem ìkayaka ìtop me lek,

⁷inyi ema enwọ, mè ewuuk irek ugbọọri kiban̄, mè ekayaka ìkeek ukwook kiban̄ ofifi.

⁸“Tumu ikọ me ibot ebi kpekaan̄ otu, mè gbini unen nyi otutuuk ebi ebekpakpan̄.

⁹Tumu ikọ, mè sibi oyerebet ònenen, mè gbini unen ebi ìkup me tukutuku mè ebi una ubọk.”

¹⁰Nwa ata eru, ekene obokọt iweek imun̄? Ọmọ onye ewe igak ewuuk unye otu ewe rubi.

¹¹Ogwu olom ìkitoon̄ ọmọ ejit me lek, sa me ikeya, ata oruru geege ìkponan ogwu olom.

¹²Ìkirọ ogwu olom ata inu, ìkakirọ ijo inu, otutuuk usen ugwem kan̄.

¹³Ọmọ ìkigobo inwọọn̄ anam mè eri, mè osa ubọk kan̄ gaalek olọk ekwut.

¹⁴Ọmọ ìbet lek uji ile ebi mbit ekisa ikọp ewe, òkisa inorie kan̄ me ujọn̄ọ ere inu.

¹⁵Ọmọ ìkinan̄a ilaak mgbọ egwe ìkatotoon̄ ìta, mè orọ inorie onyi ebi uwu kan̄, mè ònyi nsabọn ibaan̄ uwu kan̄ eyi kiban̄.

¹⁶Ìkikpọ ijọn̄ ònwọnwọn, mè ilep, mè isa ikpoko ubọk kan̄ iwop uko gerep.

¹⁷Ire me lek ikwaan̄, ìkitotobo ekwut kan̄ inye me ebon, ubọk kan̄ si ìnyenye kwok kwok isisi ikwaan̄.

¹⁸Ìbomumun̄ ibe ewe kan̄ òkije ijaan̄, ìkimimin ukan̄ irọn̄ eririeen̄ ikup irọ ikwaan̄ kan̄.

¹⁹Ubọk kan̄ ìkinyenye me lek uti iyaka eri, otubọk kan̄ si ìkigwagwat me lek ilọlọk ekwut.

²⁰Ìkinyanyana ubọk kan̄ ire lek ebi ugbọọn̄, mè òkochili ubọk onyi ebi una.

²¹Ìkakifieek owot me lek ofiik mgbọ utọọk, mije, ìkilọlọk ofọnti utọọk iso otutuuk ebi uwu kan̄.

²²Ọmọ gaalek okichim ekwut mkpilaak kan̄, mè ikisa atalek ekwut lilin̄ mè ekwut irio irio ibala lek kan̄.

²³Ogwu olom îkaan̄ isi me oyet ama, mgbọ îkigọọk ebi ugane ama kiban̄ isiki ikweek irek.

²⁴Ọmọ ìkichachak ekwut lilin̄ inyam, mè ikinyi ebi mbit fanti ema ekilep isi inyam.

²⁵Unye mè umin ìsoso ọmọ lek kubọk ekwut ebon, otu kan̄ ìkikup imọm imọm, ìkafieek owot me lek mgbọ òkup me isi.

²⁶Ikọ iriọọn̄-inu okinan̄a me otu kan̄ isibi, nteme ata ejit okinan̄a me otu alọm kan̄ isibi.

²⁷Ìkigwugwuun̄ chieen̄ me lek inu geelek òkirọ me uwu kan̄; ìkisisi sabum ònorie.

²⁸Nsabọn kan̄ ekinanan̄a ikeke, mè igwen ọmọ ogwu egbanabe; nlom kan̄ si ìkitọtọn̄ ọmọ ibe,

²⁹“Owuwa ebibaan̄ mîkaan̄ ata eru, ire, me etete kiban̄ otutuuk, owu ochit!”

³⁰Emen isi ìkekifiaan̄ ene, uja ìkekigwọk ita, ire, enenwaan̄ òkitet ukpook Okumugwem ìre ogwu ebekitọtọn̄.

³¹Ìnyi ọmọ umin ògbegbe ata ubọk ikwaan̄ kan̄, ìsa me lek ikwaan̄ îsibe ìtọn̄ ọmọ me oyet ama.