Read obolo Urọk 4 Bible Online

Urọk 4 - obolo bible

Urọk 4

¹Bọn n̄a, ìgban̄ utọn̄ me lek ikan̄-inu nte kinyi, ìgbala utọn̄ ìgban̄, inyi enyi mêkaan̄ ngobo-ntet.

²Mije, îre ata nteme ke nkinyi enyi, ikakpọ ijejeen̄ n̄a ìlọ chieen̄.

³Mgbọ nrebe sọn̄ gwun̄ me ubọk nte n̄a, mgbọ nkupbe nsek nsek, mè ire si gwun̄ ibot ge me ubọk nga n̄a,

⁴nte n̄a îjeen̄ emi inu, mè ibe emi, “Tet ikọ n̄a kaan̄ me ejit kwun̄; kirọ ikọ ntọbe, inyi owu ògat ugwem.

⁵Kaan̄ iriọọn̄-inu, mè kaan̄ ngobo-ntet; kawuuk ikọ otu n̄a, kajeje ìkwala ìnan̄a me lek.

⁶Kakpọ iriọọn̄-inu ìlọ chieen̄, ọmọ môkpọ owu chieen̄ me lek; ma ọmọ, ke ọmọ mônyan̄a owu isibi.

⁷Iriọọn̄-inu, ọmọ omin ichit; eya orọ, week kaan̄. Inu geelek omama lek ikaan̄, kaan̄ si ngobo-ntet gbaalek.

⁸Bene ọmọ fo inyọn̄, ke ọmọ môjibi owu ibene; ire okana ọmọ ikat, ọmọ môrọ mè owu òkaan̄ umin.

⁹Ọmọ môkwuun̄ owu okpibot ubọọn̄ eyi umin me ibot; mè ikwuun̄ owu okpibot ubọọn̄ òkup òrirọ òrirọ.”

¹⁰Gwun̄ n̄a, gban̄ utọn̄, mè bọkọ inu nkitumu tap; inu chi môrọ mè usen ugwem kwun̄ iwa.

¹¹Nra isa oniin̄ eyi iriọọn̄-inu ijeen̄ owu inu, mè isa owu ije me oniin̄ ònenen.

¹²Osikije ije, kpunu inu òbokwek ibe owu okato ukot kwun̄, osikilibi ekot, kpunu inu òbotọbọ owu ukot.

¹³Tet ikween̄-inu kaan̄ nye, kayat ubọk ìsan̄a me lek; gbala chieen̄ me lek, mije, ọmọ ore ugwem kwun̄.

¹⁴Katap ukot me oniin̄ ebi ikpak, kagọọk ebi ijo ife ìgbaan̄ ìje me oniin̄ kiban̄.

¹⁵Kasi lek oniin̄ ya, kalululuk ìje me lek; gwu kom, mè je nan̄a me lek oniin̄ ya.

¹⁶Ilaak ìkakinin̄ ebi ijo ife chieen̄, îtata ema erọrọ ijo inu; chieen̄ kiban̄ ìkigwọgwọk ikup, mege ema isisan̄a ene ge ibọn̄ me ijọn̄.

¹⁷Ema ekisa inu ikpak irie ijot owot, mè ikisa afa inwọ ijot owot.

¹⁸Oniin̄ ebi ata irọrọ ìkup kubọk egwe òkitotoon̄ inu, eyi òkpọkpọ ikitoon̄ ifo isi, mege egwe òwele ònye.

¹⁹Ire, oniin̄ ebi ikpak ìkup kubọk uga udun; ema kpekikọt iriọọn̄ lek inu òtọtọbọ ema ukot.

²⁰Gwun̄ n̄a, riọọn̄ ubọk gban̄ ikọ n̄a; siki utọn̄ nọ inu nkitumu.

²¹Kachieek ibe ikọ chi ilọ owu chieen̄; Sun̄ ema me emen emen ejit kwun̄.

²²Mije, ema ìre ugwem isa inyi ebi ìweweek ema imun̄, mè ire igwagwa inyi otutuuk akpalek kiban̄.

²³Gbala chieen̄ kpọ ejit kwun̄ gak inu geelek, mije, îre emen kan̄ ke inu òkinyi ene ugwem okigbuk isibi.

²⁴Kachechieek ibe ikọ ofiaan̄ inan̄a me otu kwun̄ isibi, kasasa otu alọm kwun̄ ìtumu ikọ ataak.

²⁵Tet chieen̄ kwun̄ tat me enen isi kwun̄, mè gwuun̄ chieen̄ kikpọ ere òtatat owu me isi.

²⁶Rọ oniin̄ otapbe ukot ilibi ìkike, ke owu môkaan̄ utelelek me oniin̄ ugwem kwun̄.

²⁷Kagwaka ìnyi agan̄ ulom mè ìre agan̄ ujit, san̄a ukot kwun̄ me emen ijo inu.