Read obolo Urọk 5 Bible Online

Urọk 5 - obolo bible

Urọk 5

¹Gwun̄ n̄a, riọọn̄ ubọk gban̄ iriọọn̄-inu n̄a; siki utọn̄ nọ ngobo-ntet n̄a,

²inyi owu môkọt isun̄ ata nkeek; ufuna otu alọm kwun̄ ikọt itet ifuk-ibot ikaan̄.

³Mije, usem òkisibi me otu alọm enenwaan̄ barabat ìkirọn̄ọ kubọk aran̄ akwọọk; ikọ òkisibi me otu kan̄ ìkikup eriook eriook.

⁴Ire, me òta kan̄, ọmọ ìkijat kubọk olulut, mè ireke kubọk oge isi iba.

⁵Ukot kan̄ ìkisa ene ije ijet mkpa; ukot ije kan̄ ìbosa ene isi itap me udọn̄.

⁶Ọmọ ìkakikpọ chieen̄ me lek oniin̄ eyi ugwem; oniin̄ kan̄ ìre kọnọkọnọ, ire, ọmọ ìkariọọn̄.

⁷Eya orọ, mgbọ keyi, bọn n̄a, ìgban̄ utọn̄; ikayaka ikọ otu n̄a ìto.

⁸Ìje ìjọn̄ọ ere ìda ìbọkọ me lek enenwaan̄ òkup ikeya; ikajeje ìriaak me otu isotu uwu kan̄,

⁹inyi enyi ekayaka umin kinyi ìnyi ofifi ene, mè ìkana inu enyi ebọmbe otutuuk acha ugwem kinyi ìnyi ogwu nnaan̄,

¹⁰ufuna ebi ofifi ene ekasa inu ubọọn̄ kinyi ìrie ijọk, mè inu enyi ekwookbe ikaan̄ ikasi ìtap uwu ofifi ene ìjot,

¹¹mè enyi etolek enefieek ejit me mgburudun̄, mgbọ ufuk kinyi mè akpalek kinyi môtakabe igwak ita kpai.

¹²Owu mônenikibe, “Jei, ǹjeje icha ikan̄-inu ekikan̄ inyi emi? Ejit n̄a ìkpọkpọ ijit osusut ekisulu emi isa ikineen̄ emi isun̄!

¹³Ǹkagban̄ utọn̄ ìnyi ebi ìkijeen̄ emi inu, ǹkanyi utọn̄ me lek ebi ìkinyi emi nteme.

¹⁴Sọntiik osik mârọn̄ inin̄ me emen ichep me isi ene, eya monitap emi uga esip me isi me ogbo oyet ere ebi ene etitiin̄be.”

¹⁵Nwọ mun̄ eyi ònan̄a me emen eba mun̄ kwun̄ gaalek; nwọ ògbugbuk mun̄ eyi ònan̄a me emen udọn̄ mun̄ kwun̄ gaalek.

¹⁶Ìre mun̄ ogbuuruk kwun̄ ìbokigbọọk me eden̄ oyet, me emen agbugbuk me oyet ama?

¹⁷Tele mè ire eyi kwun̄ gaalek, kasa ìrọ eyi mgba-ubọk melek ogwu ichen òkup melek kwun̄.

¹⁸Tele mè ogbuuruk kwun̄ ire inu egbanabe, mè bele ejit me lek nwa mgbọ nsabọn̄ irieen̄ kwun̄.

¹⁹Ọmọ ìbet lek uman ogaan̄ ekimama, mè uman ebot oron òjajaan̄ uja; eya orọ, tele mè ebe kan̄ ikinyi owu ubelejit mgbọ geelek; mè imumechieen̄ kan̄ ikisa owu kubọk miin̄ mgbọ geelek.

²⁰Gwun̄ n̄a, keke môrọ ibe owu òje òlọ oniin̄ ògọọk enenwaan̄ barabat, mè òsi òkokat ogwu enenwaan̄ ikarege nwa kwun̄?

²¹Inu geelek ene okirọ ìlaak obook me chieen̄ Okumugwem, ọmọ ìkiruruk chieen̄ ikpọ oniin̄ geelek ogwu ebilene okije.

²²Ijo irọrọ ogwu ikpak okirọ môtet ogwukaan̄ gaalek kubọk ufe; ijo inu kan̄ gaalek môbọp ọmọ ikam kubọk olik igbọ.

²³Ọmọ môkwu mkpa, mije, ìkakima ikan̄-inu, ikpele mbubut kan̄ môsa ọmọ ije ilọ oniin̄.