Read obolo Urọk 6 Bible Online

Urọk 6 - obolo bible

Urọk 6

¹Gwun̄ n̄a, ire obọkọ ogwu melek kwun̄ me ata-ikọ, ire ochieek ikpekpe urieek me ibot ogwu okariọọn̄ge isi,

²ikọ otu kwun̄ îtet owu kubọk ufe; inu otumube îtap owu ikam.

³Gwun̄ n̄a, owu orọn̄ inin̄ me emen ubọk ogwu melek kwun̄. Inu owu oborọ mè inwọnọ ìre ikeyi: Je si lek ogwu melek kwun̄ ya, mè gele lek siki, mè riaak ọmọ enenen.

⁴Kachieek ibe ilaak inin̄ owu chieen̄ me irọrọ inu yi, kachieek ibe uga ilaak ikeme owu, îtata òrọrọ.

⁵Nyan̄a lek kwun̄ kubọk òsô me ubọk ogwu ota; nyan̄a lek kubọk ofut me ubọk ogwu òtip-ufe.

⁶Owu ogwu ugbek, je si lek ebi kè atat, kpọ ubọk ema ekirọ inu, mè sa kween̄ inu nyi lek kwun̄.

⁷Ema kpekaan̄ ogwu isi, kpekaan̄ ogwu òkikpọ ikwaan̄, kpekakaan̄ si ogwu mkpulu.

⁸Ire, ema ekisa mgbọ ura ibọm inorie igwook, mè ikisa mgbọ ekirọkọ uko ititiin̄ inu irerie kiban̄ isun̄.

⁹Jei, ogwu ugbek, kpa mgbọ ke owu obolaak inyana ire? Ìre kpa mgbọ ke obobolo chieen̄ me ilaak okilaak?

¹⁰Owu môkup me lek ilalaak-nu sọnja, mè inyenyieen̄-nu sọnja, mè igbagba-nu ubọk ikat isiki efuuk sọnja,

¹¹ugbọọri môkakana isibi owu me uwuuk-lek kubọk ogwu ije; una ubọk mônunu kubọk ogwu inọ afa inichan owu irak.

¹²Ene ikike, ogwu ufialek, ìkije ikana ere ikikan̄ ataak ataak;

¹³ìkisa chieen̄ chieen̄ ifiik ene, mè ikisa ukot ukot ikitumu ikọ inyi ene, mè ikisa ubọk ubọk itọ ijeen̄ ene.

¹⁴Ofiaan̄ ofiaan̄ ke îkaan̄ me ejit; ijo inu ijo inu ke îkitọt mgbọ geelek, mè ikitap yalayala.

¹⁵Eya orọ, ufialek kan̄ ìbonu me nriki; môkpukpuku ọmọ igwook me ekakpọge chieen̄; kpunu ogwu òbokọt inyan̄a ọmọ isibi.

¹⁶Inu gweregwen okup, echi Okumugwem ochabe; in̄-in̄, inu jaaba ore mbuban inu me lek kan̄, inu cha ìre:

¹⁷Chieen̄ òkikpọ ene isiki, otu alọm òkikan̄ ataak, ubọk òkifiat eje ogwu ǹkalọ,

¹⁸ejit òkitọt otitọt ijo inu, ukot òkifet ililibi inin̄ emen ijo inu,

¹⁹ogwu ata-ikọ òkikan̄ ataak ataak igwook, mè ogwu òkitap yalayala me etete bọn ulọk.

²⁰Gwun̄ n̄a, kirọ ikọ nte kwun̄ otọbe inyi owu, mè kakpọ inu nga kwun̄ ojeen̄be owu ìlọ chieen̄.

²¹Bọp ema kaan̄ me ejit kwun̄ mgbọ geelek; tobo ema jeen̄ me ebek kwun̄.

²²Mgbọ osikije me oyet, ema mêkijeen̄ owu oniin̄; osikilaak, ema mêkibem owu; osinan̄a ikeke me ilaak, ema mêkinyi owu nteme.

²³Mije, ikọ etọbe cha, ọmọ ore mkpukan̄ owu obosa imọọn̄ oniin̄; ijejeen̄ ejeen̄be owu, ọmọ ore utoon̄ obosa iriọọn̄ agan̄ okije inin̄; osusut esabe ikan̄-inu inyi owu, ọmọ ore oniin̄ eyi ugwem.

²⁴Echichi môda owu isan̄a me lek ijo enenwaan̄, mè unin̄i otu ikọ ogwu enenwaan̄ ikarege nwa kwun̄.

²⁵Kachieek ibe uja kan̄ itap owu ulọk me ejit; kachieek ibe chieen̄ kan̄ ileke owu ifiin̄.

²⁶Mije, mkpukpe ogwu òje oyet ìre ìkike melek otu ewe okpọkọ fituru ge; ire, irọrọ ugan-nwa melek enenwaan̄ òkaan̄ olom ìkisa mkpa ijet ene.

²⁷Ìre ene môlọbọ ukan̄ igwook me inyọn̄ owut-ukot kan̄, eyi ukan̄ ya kpotakabe ekwut ene ya?

²⁸Sà ìre ene môkọt ije me inyọn̄ mbubuuk ukan̄, eyi ukan̄ ìkpotakabe ene ya ukot?

²⁹Ikeya ke ikup inyi ogwu òsi ìgọọk nwa ofifi ene ilaak; ogwu geelek òchachak nwa ene ubọk me lek igọọk ilaak, ìkponwọnọ osusut.

³⁰Ogwu inọ òsi ìchiin̄ inu ene mije uraafiọọn̄, kpekimalek ifieek ikọ.

³¹Ire, ire itet, mônyi inu îchiin̄be ya irek jaaba; ikerere ibe otutuuk inu ubọọn̄ îkaan̄be me uwu kan̄ ìtata inọọn̄.

³²Ene geelek òsi ìgan nwa ene ìkakaan̄ ngobo-ntet; ogwu òrọrọ inu òkup ikeya, ìjijaka lek kan̄ gaalek.

³³Orukan̄ mè esip ke ìbokaan̄; esip kan̄, kpekọt ituku isan̄a me isi kan̄.

³⁴Mije, chieen̄ ile môbene ogwu olom uga unaan̄-ejit; ikeya orọ, usen ogwu olom môborọ useen̄, ìkpokaan̄ ejit nsan.

³⁵Ìkpobọkọ ikpoko òsi-ugan geelek mêkpebe inyi; inu geelek mêkpebe inyi, ike geelek îwawa, ìkpobọkọ.