Read obolo Urọk 7 Bible Online

Urọk 7 - obolo bible

Urọk 7

¹Gwun̄ n̄a, sun̄ ikọ n̄a, mè tet ikọ ntọbe kaan̄ me ejit kwun̄.

²Sun̄ ikọ ntọbe, mè gat ugwem; gbala chieen̄ me lek ijejeen̄ n̄a kubọk ìre ukwuuk chieen̄ kwun̄.

³Bọp ema kam me otubọk kwun̄, mè ge ema sun̄ me emen emen ejit kwun̄.

⁴Sa iriọọn̄-inu rọ ngwan̄ kwun̄ enenwaan̄, mè gwen ngobo-ntet ibe ìre ogwu ulọk kwun̄.

⁵Ema mêbem owu, inyi okanin̄ ubọk ogwu enenwaan̄ barabat, mè ubọk enenwaan̄ ikarege nwa kwun̄, mè unin̄i otu ikọ kan̄.

⁶Usen ge, nkupbe me agba otu nruruk uwu n̄a, mè ikpọ itibi agbagba otu nruruk ya,

⁷mkpọ me etete ebi ikike, me ogbo ebi nsabọn irieen̄, mè imun̄ ogwu nsabọn irieen̄ ge ikakaan̄ge nden̄,

⁸okije me lek oniin̄ iriaak me lek uwu ogwu enenwaan̄ barabat ge, mè ikije ifo agan̄ uwu ogwu enenwaan̄ ya,

⁹me lek ufit-egwe ya, me ikakwun̄, me lek udun eririeen̄ ya egwe ofitbe.

¹⁰Ogwu enenwaan̄ ge, òkeken nken ogwu òje oyet, osisibi inu ifiọk ifiọk, inichichini ọmọ.

¹¹Enenwaan̄ ya ìre ogwu otu kpamkpam, mè ogwu òkiweek ikọ; ukot kan̄ ìkakikeke me uwu.

¹²Sọnja mgbọ ọmọ me oyet, sọnja mgbọ ọmọ me eden̄ ama; ìkilileek ikana ntutun̄ ere geelek ikiweek ebirieen̄.

¹³Ogwu enenwaan̄ yi okakana ogwu enerieen̄ ya itet gwam, mè ifip otu, mè ita esip me isi itumu inyi ibe,

¹⁴“Me uwu na, nkaan̄ inu ngwugwa esuuk ngwabe; chereyi ke nrọ inyan̄a-ibot n̄a iso.

¹⁵Eya ke nsibi inu inenichichini owu; mweek owu enenen, mè iweek owu imun̄.

¹⁶Mwele ujuja ekwut mkpilaak me inyọn̄ mkpilaak n̄a, ekwut lilin̄ kpa chieen̄ kpa chieen̄ ònan̄a me Ijipiti ke mwele.

¹⁷Nnyan aran̄ òkibubaan̄ olu eyi uti mâa, mè uti alò, mè uti sinamọn me lek mkpilaak n̄a.

¹⁸Na, mè eji elaak ejot, mege ere ewelegwe; eji ebele lek kiji ejit me ima.

¹⁹Nlom n̄a kpunu me uwu; îkọp uran̄ isi ujọn̄ọ ere.

²⁰Îben akpa ikpoko kan̄ isa igbaalek ije, ikaka kan̄ ìbore me etete onyan̄.”

²¹Isasa ogbogbo unin̄i otu ikọ irọ gwun̄ enerieen̄ ya ichieek, mè isa otu ofiaan̄ kan̄ ileke ọmọ.

²²Mgbọ yaage igọgọọk ọmọ ije kubọk eriembuuk ebesa isi ikpan̄, mè ije kubọk ogwu welewele okije melek mkpọn me ukot ifo uwu mkpọn.

²³Môgọọk ikeya, mege oraan̄ ofuun̄ ònin̄ ọmọ ejit, kubọk unọn okiwuwele isi inin̄ me otu ufe, ìkariọọn̄ ibe ke ugwem kan̄ môje igọọk.

²⁴Eya orọ, nsabọn n̄a, mgbọ keyi, ìgban̄ utọn̄ ìnyi emi; ìriọọn̄ ubọk ìgban̄ ikọ otu n̄a.

²⁵Ikachieek ibe ejit kinyi ifo lek ogwu enenwaan̄ ya; ikaje ìlọ oniin̄ ìsi ìnin̄ me oniin̄ kan̄.

²⁶Mije, îrọ owuwa ene ekwaan̄ erurọn̄ọ; ebi îkpan̄be, kpebekọt ifuk otu ifuk.

²⁷Uwu kan̄ ìre oniin̄ ekije isi ama ekwukwu, oniin̄ òkisa ene isi itap me udọn̄ mkpa.