Read obolo Urọk 8 Bible Online

Urọk 8 - obolo bible

Urọk 8

¹Ìre iriọọn̄-inu ìkataan̄ ukpo? Sà ngobo-ntet ìkabene ida unye unye?

²Iriọọn̄-inu ìkeke me inyọn̄ ibot ogoon̄ òbebene, mè agba lek oniin̄, ere owuwa ugwaka oniin̄ onichichini.

³Me otunchit, me ere ekije inin̄ ama, me otu isotu ke îkup mè ikibọn̄ ukpo itumu ibe,

⁴“Enyi ebilene ke nkigwen, enyi bọn ebilene ke ida n̄a okirọn̄ inyi.

⁵Enyi ebi una ekiket, ìkaan̄ ekiket, enyi ebi burubut, ìkaan̄ ejit òkigobo inu itet.

⁶Ìgban̄ utọn̄, mije, m̀batumu inu òkaan̄ oruru me lek, m̀bakama otu itumu inu ònenen.

⁷Atikọ okisibi emi me otu; ikọ ikpak ìre mbuban inu me otu n̄a.

⁸Otutuuk ikọ otu n̄a, ìnenen, kpunu eyi òkọkọọn̄, mè ìre eyi ofiaan̄ me lek.

⁹Ikọ chi ìre ikọ ònenen me lek ebi ìkigobo inu itet, mè ikọ òlilibi itat me lek ebi ìkaan̄ ifuk-ibot.

¹⁰Ìbọkọ nteme n̄a kpan̄asi alata okuket, mè ìbọkọ ngobo-ntet kpan̄asi atalek alata araran̄.

¹¹Mije, iriọọn̄-inu înwọn igak atalek ewuuk unye otu ewe rubi; kpunu inu geege ene okiweek, eyi mêkọtbe isa itọ me lek kan̄.

¹²“Emi, iriọọn̄-inu, melek iriọọn̄-lek egbaan̄ iluk; ifuk-ibot mè ata nkeek, îre emi nkaan̄.

¹³Itetet ukpook me lek Okumugwem ìre ichacha ijo inu; emi ncha ugumulek mè ubene lek, mè ijo eru, mè otu òkitumu ikọ ofiaan̄.

¹⁴Nteme mè ata ifuk-ibot, îre emi nkaan̄; îre emi nkaan̄ ngobo-ntet, mè ikaan̄ unye.

¹⁵Îre emi ke ebi ubọọn̄ esa ikọt ikida ubọọn̄; emi ke ebi mkpulu esa ikọt ikidọmọ ikan ònenen.

¹⁶Îre emi ke ebi ibot mkpulu esa ikikup me ibot; emi ke ebi ilile mè ebi oyerebet ìkisibi unen oyerebet esa ikirọ inu.

¹⁷Emi ǹkima ebi ìma emi; ebi igwuun̄ chieen̄ iweek emi, mêweek emi imun̄.

¹⁸Ubọọn̄ mè ulibi ìkup me ubọk n̄a; inu ubọọn̄ òkifufuk mè ata irọrọ ìkup si me ubọk n̄a.

¹⁹Mfut n̄a îmin igak alata araran̄, iin̄, îmin igak atalek alata araran̄; inu nkisan̄a isibi îmin igak alata okuket ònwọnwọn ichit.

²⁰Ǹkije me lek oniin̄ eyi ata irọrọ, mè lek oniin̄ eyi unen oyerebet,

²¹mè ikinyi ebi ìmama emi inu ubọọn̄, mè ikitap uwu ikpoko kiban̄ ijot.

²²“Okumugwem ìdadasi irom emi sabum înibebene ikwaan̄ kan̄, emi nre adasi inu îsan̄abe isibi bene me atalek ibebene.

²³Ǹkukup bene me karake akat, bene me ibebene, sabum enirorom linyọn̄.

²⁴Mgbọ ugwuuk okwaan̄ ìkakukup-nu, ke eman emi isibi, me mgbọ ogbuuruk geege òkisibi mun̄ ìkakukup-nu;

²⁵sabum enigwugwuun̄ ebi kè ogoon̄ ikam me irek kiban̄, sabum ebi kè orioon̄ enisisibi, mîmaman emi;

²⁶me mgbọ Okumugwem ìkarorom-nu ijọn̄ mè ìre oron; me mgbọ ìkarorom-nu adasi mfuun̄ me linyọn̄.

²⁷Mgbọ îsun̄be akpabin inyọn̄ me irek, emi òwa me ere ya; mgbọ îsabe okwuun̄ inyọn̄ iwak ikana okwaan̄ okokop,

²⁸mgbọ îsun̄be oduku inyọn̄ ikam me akpabin inyọn̄, me mgbọ îsun̄be ogbuuruk echi ugwuuk okwaan̄ inye me irek;

²⁹mgbọ înyibe okwaan̄ okike ere eyi kan̄, ufuna okwaan̄ ikaraka okike îtọbe inyi; mgbọ îtọbe okike ere ọdọ eyi linyọn̄ oyakabe,

³⁰mgbọ ya, emi òwa me agba lek kan̄ nkupbe kubọk ogwu usọ. Emi nkinyi ọmọ ubelejit usen geelek, mè ikijop okwa inwọọn̄ lek me isi kan̄ mgbọ geelek,

³¹mè ikinwọọn̄ unwọọn̄ me linyọn̄ kan̄ ere ebilene ekiluk, mè ikibele ejit melek bọn ebilene.

³²“Eya orọ, mgbọ keyi, bọn n̄a, ìgban̄ utọn̄ ìnyi emi; uga ubelejit òwa inyi ebi ìkije me oniin̄ n̄a.

³³Ìgban̄ utọn̄ me lek ikween̄-inu n̄a, mè ìsa ìriọọn̄ inu; ikakpọ ìlọ chieen̄.

³⁴Uga ubelejit okup inyi ogwu òkinọ nteme n̄a, mè ikikup usen geelek me otu isotu n̄a ikibem, mè ikikup iban emi me agba ubọk afọn̄ uwu n̄a.

³⁵Mije, ogwu òweweek emi imun̄, ìweek ugwem imun̄, ogwa si obokaan̄ nnwọn-isi inan̄a me ubọk Okumugwem.

³⁶Ire, ogwu ìkaweek emi ìmun̄, ene ya ìtap unan me lek kan̄; ebi geelek ìchacha emi, ema mkpa.”