Read obolo Urọk 9 Bible Online

Urọk 9 - obolo bible

Urọk 9

¹Iriọọn̄-inu înama uwu kan̄, mè ikọ atà ewuuk jaaba isa ibene uwu ya.

²Îkpan̄ anam kan̄, mè iwọlọ miin̄ kan̄ isun̄, mè ibala ikasi inorie kan̄ isan̄a.

³Îria nsabọn ibaan̄ kan̄ isibi ibe esi egween̄ ene, mè ikup me ere òbebene ichit me emen ama ikibọn̄ ukpo igween̄ ene ibe,

⁴“Ogwu geelek ikakaan̄ge ekiket, igwaka igba ere keyi!” Îtumu inyi ebi kpekaan̄ ngobo-ntet ibe,

⁵“Ìna, ìnirie inorie n̄a, mè ìnwọ miin̄ mwọlọbe isun̄.

⁶Ìtele burubut, mè ìgat ugwem, mè ìje ìnyi isi me oniin̄ eyi ngobo-ntet.

⁷“Ogwu òsi ìteme ogwu òkirọ ene ochak nteme, ìboben esip; ogwu òsi ìkan̄ inu inyi ogwu ikpak, ìboben unan.

⁸Kateme ogwu òkirọ ene ochak nteme, inyi ikacha owu; kan̄ inu nyi ogwu òriọọn̄ inu, môma owu.

⁹Teme ogwu òriọọn̄ inu nteme, ìborọriọọn̄ inu igak ubọk îriọọn̄be; jeen̄ ogwu ata irọrọ inu, môkween̄ inu isọkọ lek.

¹⁰“Iriọọn̄-inu ìbene me lek itetet ukpook me lek Okumugwem; irọriọọn̄ Ogwu Òkup Mbuban, ọmọ ore ngobo-ntet.

¹¹Emi, iriọọn̄-inu, mârọ ibe usen ugwem kwun̄ iwa, mè itap acha isọkọ lek acha kwun̄.

¹²Ire oriọọn̄ inu, òriọọn̄ inyi lek kwun̄; ire okirọ ene ochak, owu gaalek obobeme ufialek kan̄.”

¹³Enenwaan̄ burubut ìre ogwu otu kpamkpam, mè ogwu una ekiket, mè ogwu ìkakaan̄ nden̄ geege.

¹⁴Ọmọ ìkikup me otu isotu uwu kan̄, me inyọn̄ ikasi me ere òbebene ichit me emen ama,

¹⁵mè ikigwen ebi ìkije iraka, ebi ìtetet isi itat me oniin̄ ije kiban̄,

¹⁶mè ikibe, “Ogwu geelek ikakaan̄ge ekiket, igwaka igba ere keyi!” Îtumu inyi ebi kpekaan̄ ngobo-ntet ibe,

¹⁷“Mun̄ echichiin̄ inwọ, ọmọ okisiki ene lek; inorie enwenween̄ lek ilet irie, ọmọ okitop.”

¹⁸Ire, ife cha kperiọọn̄ ibe ke ere ya ke ebi ìkwakwaan̄ ekup; ke ebi ichen kan̄ cha ekup me emen udọn̄ ama ekwukwu.