Read obolo Etip 1 Bible Online

Etip 1 - obolo bible

Etip 1

¹Echi ìre ikọ Ogwu Etip, òre gwun̄ kè Debit, mè ire ubọọn̄ me Jeruselem.

²“Inu ikike ògak inu ikike!” Ogwu Etip ìtumu ibe, “Inu ikike ògak inu ikike! Otutuuk ìre inu ikike!”

³Ìre keke ore oruru ene okaan̄be me lek kwulukwulu kan̄ geelek echi îkikwukwulu me irak isi ura?

⁴Ukot iraka, ukot ònu, ire, linyọn̄ me ere linyọn̄ okupbe ire mgbọ geelek.

⁵Ura ibum, ura òchep, mè ògwat lek ògwu okom ofo ere îboyaka isi ikpọk ibum.

⁶Efet iwut inin̄ agan̄ osiki, ògwu okom owut ònin̄ agan̄ inyọn̄; efet ìkigba iyak ikana okokop, mè òyaka okana ònonin̄ me akpat ukot kan̄.

⁷Otutuuk mun̄ okolo geelek ìkita isi igwook me emen awaji, ire, emen awaji jojot, ìkajot. Emen okolo cha mun̄ onan̄abe ita isibi, ere yaage si ke îkibaak iyaka isi inin̄.

⁸Inu geelek ìkekita ene efuuk me owot, iraka ubọk ebilene ebekọt itumu. Chieen̄ ìkakimun̄ inu ìjot, utọn̄ ìkakinọ ikọ ìjot.

⁹Kpunu inu geege òrere ayaya me irak ura; inu òwuwuuk lek ikup, ọmọ obokup, inu ewuukbe lek irọ, ọmọ ke eberọ.

¹⁰Ìre îkaan̄ inu eyi ene môtumube ibe, “Ìkpọ, eyiyi ìre ayaya inu”? Inu ya îwuwuuk lek ikup akarake akat, ìkukup sabum ukot kiji.

¹¹Ebi ene kpekikeek inu òrọrọ me mgbọ òraraka. Ikeya si, inu echi òborọ me mgbọ òkup me isi, ebi mênube me udun̄ kpebekeek.

¹²Emi, Ogwu Etip, mwuuk lek ire ubọọn̄ ebi Ijeren me Jeruselem.

¹³Emi ntap lek n̄a me lek ikwekween̄ inu, mè isa me iriọọn̄-inu iwọlọ inu geelek ekirọ me irak isinyọn̄ ikpọ, mè imun̄ ibe ke îre ikpele ukwook ke Awaji osa inyi bọn ebilene, ibe ekekwukwulu me lek!

¹⁴Emi mmọọn̄ otutuuk inu geelek ekirọ me irak isi ura. Otutuuk cha ìre inu ikike, ìkup kubọk ekiweek itetet efet.

¹⁵Inu ònwunwunwunu, kpebekọt inen̄e itat; inu kpunube, kpebekọt ifuk itap me ifuk.

¹⁶Nnenikikeek me lek n̄a ibe, “Kpọ, emi mmin ene, mè iriọọn̄ inu enenen igak ene geelek òkpukpulu Jeruselem sabum emi. Me emen ejit n̄a, emi nriọọn̄ inu iriọọn̄-inu orebe ijaan̄, mè iriọọn̄ si inu ifuk-ibot orebe ijaan̄.”

¹⁷Ntap lek ikween̄ ike mâgobobe iriọọn̄-inu itet, mè igobo si ètele melek mbubut itet. Ire, mweek imun̄ ibe ke eyiyi si ìre iweweek itetet efet.

¹⁸Mije, owuwa iriọọn̄-inu ìre owuwa ufieejit, owuwa ifuk-ibot ìre si owuwa saasaak-ejit.