Read obolo Etip 11 Bible Online

Etip 11 - obolo bible

Etip 11

¹Gwook inorie kwun̄ wele me inyọn̄ isi mun̄, owuwa usen isiraka, owu môyaka imun̄.

²Che usini nyi ene jaaba, iin̄, nyi so ene jeeta, mije, òkariọọn̄ ùrioon̄ mônube me linyọn̄.

³Ibot isijot emen oduku inyọn̄, îra irep igwook me ijọn̄. Akpat ere uti orọn̄be ilaak ke uti okilaak ibia, mè ìre ìrọn̄ inyi agan̄ osiki, mè ìyaka ire agan̄ inyọn̄.

⁴Ogwu òkup ikikpọ efet ibe inyọn̄ ijaan̄, ene ya ìkpowop uko; ogwu òkikpọ oduku inyọn̄ iboriọọn̄ mè ìre ibot môrep, sabum ọmọ ònowop mfut, ene ya ìkporọkọ uko.

⁵Ike owu òkariọọn̄ oniin̄ efet okiwut ije, mè ìre ike gwun̄ okitibi me emen owot ogwu uga, ikeya si, owu òkpokọt iriọọn̄ ubọk ikwaan̄ Awaji, ogwu òrorom otutuuk inu geelek.

⁶Wop mfut kwun̄ me ewelegwe, mè katele si iwowop me ikakwun̄, mije, òkariọọn̄ eyi òbotibi, mè môre eyi, mè môre eyilọ, mè ìre iba cha mêgbaan̄ itibi ijaan̄.

⁷Utoon̄ îtop, ura îjaan̄ isasa chieen̄ ikimun̄.

⁸Owuwa otu ifuk acha geelek ene olukbe ugwem, ene ya ikibele ejit otutuuk mgbọ ya. Ire, ikawuuk ibe ke usen udun òkinu, ke usen kecha ìbowawa. Inu geelek òkinu me isi ìre inu ikike.

⁹Owu ogwu nsabọn irieen̄, bele ejit ibe ke owu ìre nsabọn irieen̄, mè tele ibe unwọọn̄ ikup me ejit kwun̄ mgbọ orebe nsabọn irieen̄. Rọ inu echi ejit kwun̄ otọbe, mè echi chieen̄ kwun̄ omun̄be. Ire, riọọn̄ ibe, me lek otutuuk inu chi, ke Awaji môsibi owu oyerebet me ibot.

¹⁰Eya orọ, san̄a ufieejit me ejit kwun̄, mè san̄a si ufialek eyi anam akpalek kwun̄ san̄a, mije, mgbọ nsabọn irieen̄ mè mgbọ ijeek ikakana isọọn̄, otutuuk cha ìre inu ikike.