Read obolo Etip 3 Bible Online

Etip 3 - obolo bible

Etip 3

¹Inu geelek îkaan̄ mgbọ kan̄, inu geelek me irak isinyọn̄ îkaan̄ ibot mgbọ eyi kan̄:

²mgbọ imaman mè mgbọ ikwukwu, mgbọ iwowop mè mgbọ irọrọkọ inu ewopbe,

³mgbọ ikpakpan̄ mè mgbọ igwagwa, mgbọ igbugbugbọ mè mgbọ inanama;

⁴mgbọ itoto ito mè mgbọ ichachak imọm, mgbọ ifefieek ejit mè mgbọ ijojop okwa;

⁵mgbọ iyiyiyala ewuuk mè mgbọ itititiin̄ ewuuk, mgbọ ikakat ene mè mgbọ ikpekpebe lek me lek ene;

⁶mgbọ iweweek inu mè mgbọ itetele ibe inu ichep, mgbọ isusun̄ mè mgbọ itọtọọn̄ ifiin̄;

⁷mgbọ igwagwak mè mgbọ ichichim igba, mgbọ irariaan̄ ere mè mgbọ isasan̄a amọn;

⁸mgbọ imama mè mgbọ ichacha, mgbọ akọn̄ mè mgbọ esuuk.

⁹Kpasi oruru ke ene okaan̄ me lek ikwaan̄ îkwookbe ukwook me lek?

¹⁰Mmun̄ lek nninaan̄ Awaji osabe bọn ebilene ito ibe ekesa me lek.

¹¹Awaji îrọ inu geelek ijaan̄ me mgbọ eyi inu keya. Îtap mgbọ ikakaan̄ge itata me ejit ebilene. Ire, ogwu ebilene ìkpokọt iriọọn̄ inu Awaji orọbe bene me ibebene isi ire òta kan̄.

¹²Emi nriọọn̄ ibe ke kpunu inu geege ònwọnwọn inyi gwun̄ ebilene igak ibebele ejit mè irọrọ ata inu mgbọ îkupbe me ògat ugwem.

¹³Îre uche Awaji ibe ke ene môrie mè inwọ mè imun̄ nnwọn me lek ikwaan̄ kan̄ îrọbe.

¹⁴Nriọọn̄ ibe ke inu geelek Awaji orọbe, eya obokup ire mgbọ geelek. Kpebekọt itap inu geege isọkọ, kpebekọt isan̄a inu geege me lek. Awaji ìrọ ikeyi, inyi ebilene etet ukpook me lek kan̄.

¹⁵Inu geelek òkukup, ìwuwuuk lek ikup, inu geelek òbokukup, îwuuk lek ikukup. Awaji ìkisa inu mgbọ òraraka iyaka ikpọk inu.

¹⁶Emi mmun̄ si me irak isi ura ibe: ere unen oyerebet okupbe, ichachaka ikan ọmọ òwa; ere ata irọrọ okupbe, inu ikpak ọmọ òwa.

¹⁷Nnenikeek me ejit n̄a ibe, “Awaji môsibi oyerebet me ibot ogwu ata irọrọ mè ogwu ikpak. Mije, Awaji îsun̄ mgbọ inyi otutuuk inu geelek, mè otutuuk ikwaan̄ geelek ene osibe.”

¹⁸Ikeya ke nkeek si ibe, “Òfo me lek ubọk ebilene ekupbe, Awaji ìkiroroon̄ ema ikpọ, inyi ibook ema chieen̄ ibe ke ema ìre anam.

¹⁹Inu òkup inyi ogwu ebilene, ọmọ si okup inyi ebi kè anam. Inu yaage okup inyi ema isi mè udun̄. Ubọk ene okikwu ke anam okikwu. Efuuk ugwem yaage ke ema ekaan̄; kpunu inu geege ene osabe igak anam. Mije, otutuuk inu chi geelek ìre inu ikike.

²⁰Ere yaage ke ema otutuuk ekisi; ema otutuuk enan̄a me mfuun̄ isibi, mfuun̄ si ke ema otutuuk ebegwu ikom ifo.

²¹Ekene oriọọn̄ mè ìre ekwukwu eyi ebilene ìkinene ifo inyọn̄, mè ìre ekwukwu eyi anam ìkisiki ifo ijọn̄?”

²²Emi mmun̄ ibe ke kpunu inu geege ònwọnwọn inyi ogwu ebilene igak ibebele ejit me lek ikwaan̄ kan̄, mije, eya ore inu òkup inyi ọmọ. Bak me lek, ìre ekene obokọt isa ọmọ igwu ikom inu, inyi inimun̄ inu òborọ mgbọ ọmọ isikwu iraka?