Read obolo Etip 5 Bible Online

Etip 5 - obolo bible

Etip 5

¹Mgbọ okisi uwu Awaji, gbala chieen̄ me lek ukot ije kwun̄. Je riaak si gban̄ utọn̄, kpan̄asi obosi igwa ngwugwa ebi mbubut, ebi kperiọọn̄ ibe ke ema ekirọ nlilọ inu.

²Kagwat otu ìchieek Awaji use, kachieek ibe ikọ igwat lek inan̄a owu me ejit isibi irọn̄ me isi Awaji. Mije, Awaji ìkup me akpabin inyọn̄, owu òkup me linyọn̄. Eya orọ, tele ikọ kwun̄ ire inen mè inen gaalek.

³Mun̄umun̄ ilaak ìkije melek owuwa ekiket, ikeya si, ikọ ogwu mbubut ìkije melek owuwa usem.

⁴Ire ochieek Awaji use, kafiat mgbọ irọrọ iso. Ọmọ ìkakibele ejit me lek ebi mbubut. Rọ use kwun̄ so.

⁵Înwọn ibe owu okachieek use, igak ichechieek, òkarọ ìso.

⁶Kachieek ibe otu kwun̄ itap owu me ijo inu. Katumu ìnyi ogwu ikwaan̄ Awaji ibe ke use ya ìnwọnwọnọ owu me otu. Eya môrọ ibe Awaji inaan̄ ejit me lek inu owu otumube, mè ijijaka ubọk ikwaan̄ kwun̄.

⁷Owuwa mun̄umun̄ ilaak mè ogbogbo usem ìre inu ikike. Eya orọ, tet ukpook me lek Awaji.

⁸Osimun̄ ekitutuku ebi ugbọọn̄ me agan̄ ido ge, mè ikijit ema unen oyerebet mè ata irọrọ, kachieek ibe eya ike owu chieen̄. Ìkup ikeya, mije, ogwu ibot ge okigwuun̄ chieen̄ me lek ogwu ibot òkup me irak kan̄. Ebi ibot ebi ìbebene igak ema òwa si.

⁹Oruru ònan̄a me lek ijọn̄ ìkup inyi otutuuk ene. Ogwu ubọọn̄ okikpọ chieen̄ me lek ijọn̄ uko ebakbe isan̄a.[2]

¹⁰Ogwu òma ikpoko, ikpoko ìkakijot owot; ogwu òma ibọbọọn̄ ubọọn̄, mkpukpe geege ìkakijot owot. Eyi si ìre inu ikike.

¹¹Ata inu isikiwa, ebi ìkirerie mîra ikiwa si. Kpasi oruru ke ogwukaan̄ okaan̄ me lek ata inu cha, ilọ me lek isasa chieen̄ ikimun̄ lek gaalek?

¹²Ilaak ogwu òsi ikwaan̄ ìkitotop, mè ìre owot ìjojot, mè ìre ìkajot; ire, owuwa inu ogwu òbọbọọn̄ ubọọn̄ okaan̄be, ìkakichieek ibe ilaak inin̄ ọmọ chieen̄.

¹³Îkaan̄ ijo inu ge òfefieek enenen mmun̄be me irak isi ura: Inu ubọọn̄ etitiin̄be isun̄, eyi òkakana unan inyi ogwukaan̄;

¹⁴mè inu ubọọn̄ esabe itap me ewe, ijo isi otetet, ichechieen̄ ita kpai; mgbọ ogwukaan̄ onikaan̄ gwun̄ enerieen̄, kpunu inu geege òyayaka inisik me ubọk kan̄ inyi gwun̄ ya.

¹⁵Ene ìje njak isibi me owot ogwu uga, ike îjebe inu, ikeya ke ìboje ifo, kpunu inu geege îbomọnọ ikaan̄ me ubọk me lek kwulukwulu kan̄.

¹⁶Eyiyi si îfieek lek enenen: Ike ene ojebe inu, ikeya ke ìboje ifo; ìkisi ikwaan̄ igwook inyi efet, keke ore oruru kan̄?

¹⁷Otutuuk ugwem kan̄, ìkirie inorie me emen udun, me uga saasaak mè ukwook mè unaan̄-ejit.

¹⁸Inu emi mmun̄be ibe ke înwọn ìre ikeyi: Îjaan̄ ibe ene irie mè inwọ, mè irie utop ònan̄a me lek otutuuk ikwaan̄ ukwook îsibe me irak isi ura me sọnja usen ugwem Awaji onyibe ọmọ, mije, eyiyi ore uche eyi kan̄.

¹⁹Ofifi kan̄, ene geelek Awaji orọbe ibe ibọọn̄ ubọọn̄ mè ikaan̄ inu, mè inyi unye, inyi irie inu cha inọ utop, mè ibọkọ uche eyi kan̄, mè ibele ejit me lek ukwook ikwaan̄ îsibe, eya ìre uche Awaji inyi ene ya.

²⁰Ene ya ìkpomalek ikikeek usen ugwem kan̄, mije, Awaji îtap unwọọn̄ ijot ọmọ ejit.