Read obolo Etip 8 Bible Online

Etip 8 - obolo bible

Etip 8

¹Ekene obet lek ogwu òriọọn̄ inu? Ekene obokọt ibum ibot inu? Iriọọn̄-inu ìkirọ isi ene itoon̄, mè onwene ene ya isi, inyi ikayaka ìtobo isi.

²Emi m̀be, “Gban̄ utọn̄ me lek ikọ ogwu ubọọn̄ otọbe, mije, owu onyan̄a ibot me isi Awaji.

³Kagwat lek ìnan̄a me isi kan̄ ìsibi. Kagọọk ìkup me lek ijo otitọt. Mije, inu òneneme ọmọ ke ìborọ.”

⁴Ikọ ogwu ubọọn̄ îkaan̄ unye me lek. Ekene obokọt ido ọmọ ibe, “Keke ke okirọ?”

⁵Unan geege ìkpore lek ogwu òrọrọ inu îtọbe, ogwu òriọọn̄ inu oriọọn̄ mgbọ ògbegbe ibe erọ inu, mè iriọọn̄ si ubọk eberọ.

⁶Mije, inu geelek îkaan̄ mgbọ ògbegbe mè ubọk ebesa irọ, ubọk geelek ukwook osabe imin igak ene.

⁷Eyi ene geege ìkariọọn̄ inu òkup me isi, ekene obokọt itumu inu òkinu me isi inyi ọmọ?

⁸Kpunu ogwu òkakaan̄ unye itetet efet ikaan̄, kpunu si ogwu òkakaan̄ unye ikwekwek usen mkpa kan̄; kpunu ogwu ekirieen̄ ibe igwu ikom ifo me akọn̄ keya, ikeya si, inu ikpak ìkpotele ibe ogwu òkirọ ọmọ inwọnọ mkpa.

⁹Otutuuk inu chi ke mmun̄, mè isa ikween̄ inu inyi lek n̄a mgbọ nkimun̄ otutuuk inu geelek òkirọ me irak isi ura. Îkaan̄ mgbọ ene okikaan̄ unye me lek ofifi ene, mè isa me ikeya itap unan me lek kan̄.

¹⁰Ofifi si, mmun̄ ekifuun̄ ebi ikpak, ebi mgbọ ìkisi Uwu Mbuban, mè ikika. Ebi ene ekekitọn̄ ema me emen ama yaage ema erọbe inu ikpak kiban̄. Eyi si ìre inu ikike.

¹¹Bak me lek kpekigwat lek ifieek oyerebet itip ogwu ikpak, ejit ebi ene ìkikup me mbem-lek mgbọ geelek irọrọ ijo inu.

¹²Ikerere ibe ke ogwu ikpak îrọ ijo inu efit mgbọ, mè iluk ugwem si ijọn̄ọ mgbọ, emi nriọọn̄ ibe ke inu ìbonwọnwọn inyi ebi ìkaan̄ ukpook Awaji, ebi ìkitet ukpook me isi kan̄.

¹³Mije ogwu ikpak ìkakitet ukpook Awaji, ìkponwọn inyi ọmọ, usen ugwem kan̄ si ìkpojọn̄ọ, kubọk ogugo okijọn̄ọ me lek ura ikakwun̄.

¹⁴Îkaan̄ inu ikike ge òkimọnọ irek me linyọn̄. Îkaan̄ ebi ata irọrọ, ebi inu ògbegbe ebi ikpak okirọ ema, mè ikaan̄ si ebi ikpak, ebi inu ògbegbe ebi ata irọrọ okirọ ema. Emi m̀be ke eyi si ìre inu ikike.

¹⁵Eya orọ, emi m̀be ke îgbe ibe ogwu ebilene irie ugwem, mije, kpunu inu geege me irak isi ura ònwọnwọn inyi ene igak irerie mè inwọnwọ mè ibele ejit. Eya mônenire oruru kan̄ me emen ukwook ikwaan̄ kan̄ me otutuuk usen ugwem Awaji onyibe ọmọ me irak isi ura.

¹⁶Mgbọ nsabe me otutuuk ejit n̄a iweek irọriọọn̄ iriọọn̄-inu mè imumun̄ inu ebilene ekirọ me linyọn̄, eyi ilaak ìkakinin̄ ema chieen̄ ikarek mè eririeen̄,

¹⁷mgbọ ya ke mmun̄ otutuuk ikwaan̄ Awaji orọbe. Kpunu ogwu òbokọt igobo inu òkirọ me irak isi ura itet. Ire ene itap lek inyi iweweek iriọọn̄, ìkporọriọọn̄ ibot me lek. Ikerere ogwu òriọọn̄ inu, òbe ke ọmọ miriọọn̄, ìkpokọt iweek iriọọn̄.