Read obolo Okwa 1 Bible Online

Okwa 1 - obolo bible

Okwa 1

¹Eyi ìre okwa ògak okwa kè Solomọn.

²Sa otu kwun̄ tuun̄ emi otu, mije, ima kwun̄ îtop igak miin̄.

³Aran̄ utop olu kwun̄ òkibubaan̄ olu; erieen̄ kwun̄ ìtop kubọk aran̄ utop olu ògbugbuku. Mkpọ si, nsabọn ibaan̄ emabe owu!

⁴Sa emi gbaalek kwun̄ je, eji elibi! Owu ogwu ubọọn̄, sa emi si tap me agwut kwun̄. Eji ekibele ejit mè ikinwọọn̄ owu; eji ekitọn̄ ima kwun̄ igak miin̄; îgbe ibe nsabọn ibaan̄ ema owu!

⁵Jei ebibaan̄ Jeruselem, emi m̀fifit mè ijaan̄ uja; emi m̀fit kubọk uwu ọfọ ebi Keda, mè ijaan̄ ibet lek ekwut isotu uwu ubọọn̄ kè Solomọn.

⁶Ikayaka ìkpọ emi bak me lek nrebe ofifit, mije ke ura îwọp emi ifit. Bọn nga n̄a enanaan̄ ejit inyi emi, mè isa emi ito ogwu òkikpọ chieen̄ me lek uko gerep; uko gerep eyi n̄a ǹkayaka ìkpọ chieen̄ me lek.

⁷Enyi ebi mmabe, ìtumu ìnyi emi nu, ìre ere owa ke enyi ekisa urum arọọn̄ isi inyi urie? Ìre ere owa ke enyi ekisa ema isi mè esi esiki efuuk me ikarek? Ìtumu ìnyi emi, inyi nkajijen̄e ìkana ere kubọk ogwu òje oyet òsasa ekwut ichit isi me agba lek urum arọọn̄ echi ebi unene kinyi.

⁸Jei, ogwu òjaan̄ uja ichit me etete ebibaan̄, ire òkariọọn̄, je sibi gọọk akpat ukot urum arọọn̄, mè sa bọn ebot kwun̄ si nyi urie me agba lek uwu ọfọ ebi òkpukpo arọọn̄.

⁹Ogwu mmabe, ǹsa owu itọ me lek uman inyinya n̄a, eyi òkup me lek uji akọn̄ ogwu Fero.

¹⁰Agba isi kwun̄ îjaan̄ enenen melek mkputọn̄ cha otapbe, ebek kwun̄ si îjaan̄ enenen melek asi ebek ewuuk unye otu ewe otapbe.

¹¹Eji mêrom mkputọn̄ alata araran̄, mè asi ebek alata okuket inyi owu.

¹²Mgbọ ogwu ubọọn̄ oyakabe lek imaan̄ me inyọn̄ ujọn̄ọ ikasi kan̄, aran̄ nâdì n̄a okekidun̄u utop olu kan̄.

¹³Ogwu ima n̄a ìkup me lek n̄a kubọk gwun̄ akpa utop olu aran̄ mâa olaak me agbagba ebe n̄a iba.

¹⁴Ogwu ima n̄a ìkup me lek n̄a kubọk njọ ajakajak uti ena ònan̄a me uko gerep me Engedi.

¹⁵Ogwu mmabe, owu ojaan̄ uja! Me atikọ, owu ojaan̄! Chieen̄ kwun̄ ìkup ilaak ilaak kubọk chieen̄ ekerekwukwu.

¹⁶Ogwu ima n̄a, owu ojaan̄ uja! Me atikọ, owu okọlọ ene ebek! Mkpilaak kiji ìkup geren̄geren̄ kubọk inyọn̄ mbubet.

¹⁷Ntọọk uwu kiji ìre uti olik, mgbugban kiji ìre uti siperes.