Read obolo Okwa 2 Bible Online

Okwa 2 - obolo bible

Okwa 2

¹Emi ìre ajakajak rôs eyi Sarọn, mè ajakajak lili emen iteke.

²Ogwu mmabe ìkup me etete nsabọn ibaan̄ kubọk ajakajak lili òkup me etete ukpak.

³Ogwu ima n̄a ìkup me etete nsabọn irieen̄ kubọk uti apulu òkup me etete uti oron. Mma isisiki ikweek ikwek lek me irak kan̄, mfut kan̄ ìkitotop emi me otu.

⁴Ọmọ îsa emi isi uwu inwọ miin̄, egop kan̄ îsabe ikwek emi ibot ìre imumechieen̄.

⁵Ìnyi emi nchicha nchat gerep ǹtaka ǹsa ǹkaan̄ unye, mè inyi emi mfut uti apulu ǹtaka ǹsa ǹtet efuuk, mije, imumechieen̄ îtet emi kubọk orukan̄.

⁶Ubọk agan̄ ujit kan̄ me irak ibot n̄a, ubọk agan̄ ulom kan̄ îkat emi ikaan̄.

⁷Enyi nsabọn ibaan̄ Jeruselem, ntap mbuban inyi enyi, kè lek òsô, kè lek ogaan̄ òkup me oron: Ikariki, ikatitimi si imumechieen̄, mege ire mgbọ îkembe me lek kan̄.

⁸Ida ogwu ima n̄a ire eya! Kpọ, ọmọ okinu ya! Òkiwulu inu me inyọn̄ ibot ogoon̄, òkirama isaba inyọn̄ ibot orioon̄ inu.

⁹Ogwu ima n̄a ìfet ukot kubọk òsô mè ìre gwun̄ ogaan̄. Kpọ! Ọmọ okeke ya me udun̄ ogọ kiji, ikitaak chieen̄ me otu nruruk, ikikpọ itibi chieen̄ odidọ nruruk.

¹⁰Ogwu ima n̄a îtumu ikọ, mè ibe emi, “Ogwu mmabe, nan̄a keke, ujuja ogwu eyi n̄a, na mè eji eje.

¹¹Kpọ! Mgbọ utọọk îraka; ibot îta, mè ifo.

¹²Ajakajak îgwook ichit ere geelek me inyọn̄ ijọn̄; mgbọ unọn okikọt okwa îre, ida ekerekwukwu îbene ikitaan̄ me lek ijọn̄ kiji.

¹³Uti figi òkigwook adasi isi mfut, ajakajak gerep òkidun̄u utop olu. Ogwu mmabe, nan̄a keke na; ujuja ogwu eyi n̄a, na mè eji eje.”

¹⁴Ekerekwukwu n̄a, òkilet me emen udọn̄ me lek ewuuk, mè emen ere nlelet me agba lek orioon̄, san̄a isi kwun̄ sibi jeen̄ emi, san̄a amọn, inyi ǹnọ owu ida; ida kwun̄ ìkitotop, isi kwun̄ ìjajaan̄ ikup.

¹⁵Ìtet ekpuuruk cha ìnyi eji, asabọn ekpuuruk cha òkijijaka uko gerep, mije, uko gerep kiji îgwook ajakajak.

¹⁶Ogwu ima n̄a ìre eyi n̄a, emi ìre eyi kan̄; ọmọ ìkisa arọọn̄ kan̄ isi urie me etete ajakajak lili.

¹⁷Sabum egwe otoon̄ òta, mè ogugo inu geelek olibi òchieen̄, gwu kom ka, ogwu ima n̄a. Libi kubọk òsô, mè ìre gwun̄ ogaan̄, me inyọn̄ kpunukpunu ogoon̄ cha.