Read obolo Okwa 4 Bible Online

Okwa 4 - obolo bible

Okwa 4

¹Ogwu mmabe, owu ojaan̄ uja! Me atikọ, owu ojaan̄ enenen! Chieen̄ kwun̄, me udun̄ ekwut osabe ichit lek, ìkup ilaak ilaak kubọk chieen̄ ekerekwukwu. Ijeek kwun̄ ìlọlọkọ kubọk urum ebot òkilibi isibi ijọn̄ me ogoon̄ Giliadi.

²Ejeek kwun̄ ìtana ikup kubọk lek urum arọọn̄ esọpbe inwọọn̄, òkinan̄a me ere ekenbe mun̄ isibi ika. Ejeek cha geelek îkaan̄ eyi melek kan̄ egbaan̄be ije, geege ìkakaan̄ ofok ìje ọmọ gaalek.

³Ukpọk-otu kwun̄ ìbet lek ojijeek ekwut eje eje, otu itumu-ikọ kwun̄ mikijaan̄ ikpọkpọ; agba isi kwun̄, me udun̄ ekwut osabe ichit lek, ìjaan̄ ikup nkwa nkwa kubọk okpọkọ mfut pomegaranet.

⁴Ebek kwun̄ ìjaan̄ kubọk uwu-oket kè Debit, eyi enamabe ikisa isun̄ nroon̄ akọn̄; lek kan̄ ke ejijen obop agbọ, otutuuk kiban̄ ìre agbọ ebi usọ akọn̄.

⁵Ebe iba kwun̄ ìje ìkike kubọk bọn òsô iba egbaan̄be iman, echi òkup me etete ajakajak lili ikibọm urie.

⁶Sabum egwe otoon̄ òta, mè ogugo inu geelek olibi òchieen̄, mâsi lek ogoon̄ mâa, mè lek orioon̄ farankinsens.

⁷Ogwu mmabe, owu ojaan̄ iso lek, kubọk ìroon̄ ge, kpunu me lek kwun̄.

⁸Aya nwa n̄a, nan̄a me Lebanọn na, mè eji eje, nan̄a me Lebanọn na, mè eji egbaan̄ eje! Nan̄a me inyọn̄ ibot ogoon̄ Amana sibi na, nan̄a me inyọn̄ ibot ogoon̄ Seniri, me òta ibot ogoon̄ Emọn, me emen okpot egbe àtat cha, mè ogoon̄ cha egbe ntọọk ntọọk okinya ikana inyọn̄.

⁹Ngwan̄ n̄a enenwaan̄, aya nwa n̄a, owu ofiat emi ibot; chieen̄ ge osabe ikpọ emi ya, ibot ewuuk unye otu ewe ge òkup me lek asi ebek kwun̄ ya ke osa ifiat emi ibot.

¹⁰Ngwan̄ n̄a enenwaan̄, aya nwa n̄a, imumechieen̄ kwun̄ mijaan̄! Imumechieen̄ kwun̄ îtop igak miin̄! Utop olu aran̄ kwun̄ îgak eyi otutuuk aran̄ utop olu geelek!

¹¹Ogwu aya nwa n̄a, ukpọk-otu kwun̄ ìnin̄i kubọk aran̄ akwọọk òkirọn̄ọ me lek akpa akwọọk; aran̄ akwọọk mè mun̄ ebe okup me irak alọm kwun̄. Utop olu ofọnti kwun̄ ìbet lek utop olu uti olik oron Lebanọn.

¹²Ngwan̄ n̄a enenwaan̄, aya nwa n̄a, owu ìre uko egonbe otunchit kan̄ ikam; owu ìre ibot mun̄ ewakbe ichit, mè ogbuuruk echitbe otu igọm.

¹³Uti owopbe ìkup kubọk uko mfut uti pomegaranet ònwọnwọn ichit; îkaan̄ ajakajak ena mè ikaan̄ si nâdì,

¹⁴îkaan̄ nâdì mè safurọn, mè kalamus melek sinamọn, mè uti nsensi geelek, mè uti mâa melek àlo, mè otutuuk inu geelek òtotop olu ichit.

¹⁵Owu ìre ogbuuruk emen uko, mè ire udọn̄ mun̄ òkigbugbuk, eyi òkigbuk inan̄a me ogoon̄ Lebanọn isibi.

¹⁶Efet inyọn̄, bene ma, efet osiki, wut na! Ìwut ìgwook me emen uko n̄a, inyi utop olu kan̄ idun̄u ikana iso ere, inyi ogwu ima n̄a inu emen uko kan̄, mè inirie mfut uko kan̄, òrere echi ònwọnwọn ichit.