Read obolo Okwa 5 Bible Online

Okwa 5 - obolo bible

Okwa 5

¹Ngwan̄ n̄a enenwaan̄, aya nwa n̄a, nnu me uko n̄a; nsan̄a mâa n̄a, mè isan̄a inu utop olu n̄a cha. Nlaka aran̄ akwọọk n̄a, mè itaka akpa akwọọk n̄a igbaalek; nnwọ miin̄ n̄a, mè inwọ mun̄ ebe n̄a igbaalek. Ebi une, ìrie mè inwọ, ebi emabe, ìriọọn̄ ubọk ìnwọ ìsa.

²Emi nlaak, ire, ejit n̄a ìkup ọkpọchieen̄. Nnọ ida ogwu ima n̄a òkitọbọ ubọk me isotu ibe, “Ngwan̄ n̄a enenwaan̄, ogwu mmabe, ekerekwukwu n̄a, ogwu n̄a ogwu kpunube ìroon̄ geege me lek, gwuku isotu nyi emi. Mbat îdek emi ibot, ofiik eririeen̄ îreke emi ijeek.”

³Emi nnenibe, “Nwọọk ofọnti me lek; ìre mâyaka ikpọk itap ni? Ngwọk ukot n̄a; ìre mâyaka itap ukot me okpa ni?”

⁴Ogwu ima n̄a îtap ubọk itibi m̀gba afọn̄, ejit n̄a osisisik mije kan̄.

⁵Nnanan̄a ikeke isi igwuku isotu inyi ogwu ima n̄a, mâa okekirọn̄ọ emi me ubọk, mè ikigbọọk me otutuuk otubọk n̄a, igwook me lek ugọbọ isotu.

⁶Ngwugwuku isotu inyi ogwu ima n̄a, ire, ogwu ima n̄a îra igwugwu ikom, îfo. Ikọ îtumube îsisik emi lek; mweweek ọmọ, ire, ǹkaweek ìmun̄. Ngwen ọmọ, ire, ìkabọkọ otu.

⁷Ebi ìkibem ama emumun̄ emi mgbọ ema ekije ikana ikpọ ama; ema mîsulu emi, mè itap emi unan me lek; ebi ìkibem mgban ama esisik ekwut ichit-lek n̄a isan̄a emi me lek!

⁸Enyi nsabọn ibaan̄ Jeruselem, ntap mbuban inyi enyi; ire enyi imun̄ ogwu ima n̄a, keke ke enyi ebetumu inyi? Ìtumu inyi ọmọ ibe ke imumechieen̄ îtet emi kubọk orukan̄.

⁹Ogwu òjaan̄ uja ichit me etete ebibaan̄, ìre keke ke ogwu ima kwun̄ osa inwọn igak ofifi ebi ima? Ìre keke ke ogwu ima kwun̄ osa inwọn igak ofifi ebi ima, eyi owu otapbe mbuban inyi eji ikeyi?

¹⁰Ogwu ima n̄a ìtatana, mè inin̄ irio, ọmọ osibi isi me etete akọp obop ene.

¹¹Ibot kan̄ ìre alata araran̄ eyi atata kan̄, ijeek ibot kan̄ ìkakana igwook, mè ifit kubọk lek ùgọọk.

¹²Chieen̄ kan̄ ìkup ilaak ilaak kubọk chieen̄ ekerekwukwu òkup me lek òkpuku mun̄, mè itana kubọk egwọk me emen mun̄ ebe, mè ikeke kubọk ewuuk unye otu ewe esabe alata irak.

¹³Agba otu kan̄ ìbet lek mkpilaak aran̄ unye otu ewe òkidun̄u utop olu; ukpọk-otu kan̄ ìbet lek ajakajak lili, ìkirọn̄ọ aran̄ mâa me lek.

¹⁴Ubọk kan̄ ìbet lek ekpirikpit alata araran̄, esabe ewuuk berin itet ikaan̄. Akpalek kan̄ ìrọt kubọk oduuk eniin̄ ekwukbe lek, mè isa ewuuk safaya ibala.

¹⁵Ukot kan̄ ìbet lek atà ewuuk urọt lek, eyi urak kan̄ orebe alata araran̄ eyi atata. Akparalek kan̄ ìjojot ichak kubọk ogoon̄ Lebanọn, mè ijaan̄ uja kpunube mbet kan̄, kubọk uti olik.

¹⁶Otu kan̄ ìre uchọk me lek kan̄; ọmọ îjajaan̄ iso ifuk me agan̄ geelek. Enyi nsabọn ibaan̄ Jeruselem, ogwugwu ore ogwu ima n̄a, ọmọ ore ogwu une n̄a.