Read obolo Okwa 6 Bible Online

Okwa 6 - obolo bible

Okwa 6

¹Ogwu òjaan̄ uja ichit me etete ebibaan̄, ogwu ima kwun̄ ìnin̄ ere owa ni? Agan̄ owa ke ogwu ima kwun̄ okana inin̄, inyi eji mêgọọk owu iweek?

²Ogwu ima n̄a îraka ifo uko kan̄, îfo lek mkpilaak kan̄ òkidun̄u utop olu; ìbosi ikpukpo arọọn̄ me uko cha, mè isan̄a si ajakajak lili.

³Emi ìre eyi ogwu ima n̄a, ogwu ima n̄a ire eyi n̄a; ìkikpukpo urum arọọn̄ me etete ajakajak lili.

⁴Ogwu mmabe, owu ojaan̄ kubọk ama Tirija, mè ilọk ene ebek kubọk ama Jeruselem, mè ikup ukpook ukpook kubọk ebi urum akọn̄ ìbebeen̄ egop.

⁵Kayaka ìkpọ emi emen isi, chieen̄ kwun̄ òkisisaak emi; ijeek ibot kwun̄ ìlọlọkọ kubọk urum ebot òkinan̄a me ogoon̄ Giliadi isibi ijọn̄.

⁶Ejeek kwun̄ ìtana lek kubọk urum uman arọọn̄ òkinan̄a me ere ekenbe ema mun̄ isibi ika; Ejeek cha geelek îkaan̄ eyi melek kan̄ egbaan̄be ije, geege ìkakaan̄ ofok ìje ọmọ gaalek.

⁷Agba isi kwun̄, me udun̄ ekwut osabe ichit lek, ìjaan̄ ikup nkwa nkwa kubọk okpọkọ iba mfut pomegaranet.

⁸Akọp nwa ubọọn̄ gweregwen, mè akọp ugan jeeta, mè obaak ebibaan̄ ekariọọn̄ge otu ifuk òwa,

⁹ire, ge gaalek ore ekerekwukwu n̄a, ogwu eyi n̄a, ogwu kpunube ìroon̄ geege me lek, ọmọ ya gaalek ke ogwu uga okaan̄, ọmọ ke uga òmaman oma ichit. Obaak ebibaan̄ mîmun̄ ọmọ, mè igwen ọmọ ogwu egbanabe; nwa ebi ubọọn̄ mè ebibaan̄ ugan mîtọn̄ ọmọ.

¹⁰Ema ekekibe, “Ekene ore enenwaan̄ yi òkitoon̄ inu kubọk utoon̄ egwe, mè ikira kubọk ura, mè ikup ukpook ukpook kubọk ebi urum akọn̄ ìbebeen̄ egop?”

¹¹Nnenisibi isi uko ikọm, inyi ǹsi m̀kpọ inu òtitibi igwook ichit emen iteke, mè m̀mun̄ si mè ìre gerep îtibi, mè ìre pomegaranet îgwook ajakajak me lek.

¹²Sabum nniriọọn̄, ulọk n̄a îtọp emi itap me emen uji akọn̄ ebi ilile kiji.

¹³Gwu kom na, gwu kom na ma, jei enenwaan̄ Sulam; gwu kom na, gwu kom na ma, inyi eji egwuun̄ owu chieen̄ me lek ekekpọ! Keke orọ enyi esabe chieen̄ igwuun̄ me lek enenwaan̄ Sulam ikikpọ, kubọk ekikpọ ebi ìjop ifit ebi Mayanayim?