Read obolo Okwa 7 Bible Online

Okwa 7 - obolo bible

Okwa 7

¹Owu gwun̄ enenwaan̄ ogwu ilile, ikpukot otapbe mijaan̄ owu ukot ije! Owut ukot kwun̄ ìjaan̄ kubọk lek ewuuk unye otu ewe, òre ubọk ikwaan̄ ogwu usọ.

²Ekop kwun̄ ìkup mgbut mgbut, ìbet lek ekpen̄ eyi ata miin̄ egwabe ìkakinan me emen. Owot kwun̄ ìbet lek èdọ akpa wit esabe ajakajak lili iwak ikana.

³Ebe iba kwun̄ ìje ìkike kubọk bọn òsô iba, echi nga kiban̄ ogbaan̄be iman.

⁴Ebek kwun̄ ìjaan̄ kubọk uwu-oket esabe oduuk eniin̄ inama; chieen̄ kwun̄ ìtoon̄ kubọk òkpuku mun̄ Esibon. Inwọm kwun̄ ìbet lek uwu-oket Lebanọn òkiyaka isi ikpọ Damasikọs.

⁵Ibot kwun̄ ìkup òrirọ òrirọ kubọk ogoon̄ Kamen. Ijeek ibot kwun̄ ìkup irio irio kubọk ekwut uwu ebi ubọọn̄, ujọn̄ọ ijeek kwun̄ ìkilọlọk ebi ubọọn̄ ebek.

⁶Ogwu mmabe, owu ojaan̄ enenen, mè ikineme ene; owu ojaan̄, mè ikilọk ene enenen.

⁷Owu òjọn̄ọ kubọk uti asaak; ebe iba kwun̄ ìbet lek njọ m̀firikitik.

⁸Nnenibe, “Mânene uti asaak ya; mâtet ubọk me lek otu agọọk kan̄.” Kè ebe kwun̄ ikup kubọk njọ gerep, mè efuuk kwun̄ itop olu kubọk mfut apulu,

⁹mè itutuun̄-otu kwun̄ iriki ene lek, kubọk miin̄ òtotop ichit. Kè miin̄ yi igbọọk isi ge ifo lek ogwu ima n̄a, mgbọ ìbokigbọọk isaba iraka otu ebi ìkilalaak.

¹⁰Emi ǹkup inyi ogwu ima n̄a, ulọk kan̄ ìkup me lek n̄a.

¹¹Ogwu ima n̄a, na eji enan̄a esibi-nu esi otu oron, esi etap efuuk eririeen̄ me emen asabọn ama.

¹²Eji enan̄a ekeke me mbat egwe esi uko gerep, esi ekpọ-nu mè ìre olik gerep òkitibi aya otu isibi, mè ìre ajakajak kiban̄ òkibak, mè ìre pomegaranet òkigwook ajakajak. Ere keya ke mânyi owu imumechieen̄ n̄a.

¹³Uti manderek òkidun̄u utop olu kiban̄; chieen̄ mfut uti geelek òkinanan, echi ayaya mè echi oka oka, ìsoso isi me otu isotu uwu kiji. Ogwu ima n̄a, ǹsusun̄ ema iban owu.