Read obolo Asaya 10 Bible Online

Asaya 10 - obolo bible

Asaya 10

¹Môfieek inyi ebi ìkitap nlilọ ikan, mè ebi ìge ikpa cha ìkige ikan òkitap tukutuku,

²isa ikigban ibe ebi ugbọọn̄ ekakaan̄ unen kiban̄, mè ijit isisibi unen oyerebet inyi ebi n̄a ebi ekitutuku; ema ekisa ebi nwakpa irọ unọn mfeen̄-ubọk kiban̄, mè ikifiaan̄ ebi kpà-nte ibọkọ inu.

³Keke ke enyi eberọ me usen osusut ya, mgbọ mfufiat mônan̄abe me ujọn̄ọ ere inu? Ekene ke enyi ebelibi isi lek ibe itap ubọk inyi enyi? Sà ere owa ke enyi ebesun̄ inu ubọọn̄ kinyi cha?

⁴Otutuuk inu òkukup ìre enyi igegele igwook me etete ebi mkpọn, mè ìyaka ire irururọn̄ọ ilaak me etete ebi ekpan̄be igwook. Ire, ubọk geelek ibe ke otutuuk inu chi îrọ iso, unaan̄-ejit Okumugwem ìkasiki si, Okumugwem ìkpọkpọ ibene ubọk kan̄ ifo inyọn̄ ikiweek isusulu si ema osusut.

⁵“Môfieek inyi Asiria, ọmọ ore njijan̄ mbasa ijeen̄ unaan̄-ejit n̄a; uyok uyok unaan̄-ejit n̄a ore m̀gbele me ubọk kan̄.

⁶Mâria ọmọ isi lek ido ebi ekariọọn̄ge Awaji, mânyi ọmọ ida ibe isi lek ebi ìkirọ ejit inaan̄ emi, mè ifum mfum, mè ikpulu inu me akọn̄, mè ijak ebi ife cha ikana ibat kubọk ogbọ òkup me eden̄ oniin̄.

⁷Ire, ìkare ikeya ke ọmọ okaan̄ me nkeek kan̄, ìkarere si ikeya ke ọmọ oben me ejit; nkeek kan̄ ìre ijijijaka ere igwook, mè ichechep owuwa ido.

⁸Ọmọ ìkitumu ibe, ‘Ìre otutuuk ebi ibot akọn̄ n̄a kpere ebi ubọọn̄ iso?

⁹Ìre ìkare ubọk ema ejijakabe Kalino ke ema ejijaka Karekemis? Ìre ìkare inu erọbe me Aripadi ke erọ si me Amat, sà ìre ìkare inu òrọ me Damasikọs orọ si me Sameria?

¹⁰Ike ubọk n̄a ojijakabe ebi ido cha ìkiriaak mkpọmfaka, ebi mkpọmfaka kiban̄ okaan̄be unye igak echi ebi Jeruselem mè ebi Sameria,

¹¹ìre emi m̀kpakọt ijijaka si Jeruselem mè mkpọmfaka kan̄ kubọk njijakabe Sameria mè mkpọmfaka kan̄ ni?’ ”

¹²Ogwukaan̄-ene isirọ otutuuk inu ìborọ me ogoon̄ Sayọn melek Jeruselem isan̄a, mônenitumu ibe, “Emi mâsulu ogwu ubọọn̄ Asiria osusut, mije, ìgegen ibak ikigumu lek, mè ikibene oguga.”

¹³Mije ọmọ ìkigugo lek ibe, “ ‘Unye ubọk n̄a ke nsa irọ inu chi, ǹsa me iriọọn̄-inu n̄a irọ, mije, nkaan̄ ngobo-ntet. Mbọkọ owuwa ido me akọn̄, mè itutuku okike ijọn̄ kiban̄ isan̄a kpai, mè ifum inu geelek ema ekukọbe isun̄; emi kubọk ogwu unye, ǹdada ebi ubọọn̄ ido cha isan̄a me inyọn̄ ogboon̄ kiban̄.

¹⁴Ike ene okitap ubọk me uwu ofut, ikeya ke emi ntoon̄ ubọk n̄a me lek inu ubọọn̄ ebi esese ido; ike ebi ene ekikpulu nkwa ofut ogwukaan̄ owulube inan̄a itele, ikeya ke mkpulu otutuuk ido geelek me linyọn̄; kpunu ene geege òkọkọt isulu uwop kan̄ perep perep, kpunu si ene geege òkọkọt ikama otu isan̄a amọn pim.’ ”

¹⁵Ìre otuban môkọt igugo lek ibe ọmọ îmin igak ogwu òkisa ọmọ ifieek uti? Sà ìre ojijọọk môkọt ibene lek igak ogwu òkisa ọmọ ijọọk inu? Eya ìbokup kubọk m̀gbele oyaka ikisa ogwu òtetet ọmọ isulu ene, mè ikup si kubọk mkpat okibene ogwu ebilene ogwu ikarege uti ikiwum ikana.

¹⁶Eya orọ, Ogwukaan̄-ene Okumugwem Ogwukaan̄ Inyọn̄ mè Ijọn̄ môria ijo orukan̄ òkitak ene lek itap me etete ebi akọn̄ ìmimiin̄ ufuk; mè isọk ukan̄ me irak umin kiban̄, inyi ikitaka ema lek kubọk ukan̄ òkisasak.

¹⁷Awaji ogwu òre utoon̄ ebi Ijeren môkana ukan̄, Ogwu Mbuban kiban̄ môkana alọm ukan̄; me egwe ge gaalek, ọmọ môtaka ukpak kiban̄ mè abọm egbe kiban̄ iriọk.

¹⁸Ukan̄ ya môtaka ujuja oron kiban̄ cha, mè itaka si ata ijọn̄ uko kiban̄ otutuuk isan̄a kpai. Lek kiban̄ môtatak ita, kubọk lek ogwu orukan̄ okitak ita.

¹⁹Mgbọ ya, uti òboyaka inisik me oron kiban̄ ìbore ebon inen mè inen gaalek, sọntiik gwun̄ môkọt ifuk otu ifuk uti cha.

²⁰Me usen ya, ebi ìsisik me lek ebi Ijeren, ebi kè Jekọp ebi ìlilibi inwọnọ, kpebeyaka ibieen̄ lek me lek ogwu òkpakpan̄ ema ito, ire, ema ebebieen̄ lek me lek Okumugwem, Ogwu Mbuban ebi Ijeren, me atikọ.

²¹Ebi ìsisik mêkika, ebi kè Jekọp ìsisik mêka me atikọ inu me lek Awaji Òkaan̄ Unye.

²²Jei Ijeren, ikerere ibe ebi kwun̄ ewa kubọk achiaan̄ agba awaji, ebi ìsisik me lek kiban̄ gaalek ebeka. Mîtumu ifieek ibe ke jakajaka mônu inyi ema, ire, ìboje melek ata irọrọ òraraka iman̄.

²³Mije, Ogwukaan̄-ene Okumugwem Ogwukaan̄ Inyọn̄ mè Ijọn̄ mônisa jakajaka îtumube ifieek ibe ọmọ môrọ ya, inu me otutuuk lek ijọn̄ yi.

²⁴Eya orọ, Ogwukaan̄-ene Okumugwem Ogwukaan̄ Inyọn̄ mè Ijọn̄ ìtumu ibe ikeyi, “Jei, ebi n̄a, ebi ìluk me Sayọn, ikatet ukpook me lek ebi Asiria, ebi ìkisa m̀gbele isulu enyi, mè ikibene mkpat isa ikibọn̄ enyi kubọk ebi Ijipiti erọbe enyi.

²⁵Sọnja mgbọ gaalek osik, unaan̄-ejit n̄a me lek kinyi môta, emi mâneniben unaan̄-ejit n̄a iyaka ida ema, isa ijijaka ema isan̄a.”

²⁶Okumugwem Ogwukaan̄ Inyọn̄ mè Ijọn̄ môsa njijan̄ isulu ema, kubọk îsulube ebi Midian me lek ewuuk Orep; ọmọ môbene mkpat kan̄ ijeen̄ okwaan̄, kubọk îrọbe me Ijipiti.

²⁷Me usen ya, mêfeme enyi ulobo akpan kiban̄ ya isan̄a me oguga, mè ifaan̄ ọgbọn kiban̄ cha isan̄a enyi me ebek; mkpọn cha môfaan̄ me ebek kinyi igwook mije enyi emiin̄be ufuk.

²⁸Urum akọn̄ ebi Asiria mînire Ayat, ema eje itibi iraka me Migirọn, mè isun̄ nroon̄ akọn̄ kiban̄ me Mikimas.

²⁹Ema eje me oniin̄ utibi ogoon̄ iraka, mè igba Geba ilaak me eririeen̄ ya. Ebi Rama mêkijijiin̄, ebi Gibiya, ama ebi kè Sọọlu, mîliin̄ ita kpai.

³⁰Enyi ebi ama Galim, ìbene ida ìtaan̄ ukpo! Enyi ebi Layisa, ìgban̄ utọn̄! Jei, ebi Anatọt, njijin me lek kinyi!

³¹Ebi Madimena mîlim ichieen̄ ita, ebi ìluk me Gebim mîweek ere itap ibot.

³²Me usen yaage si, ebi akọn̄ cha eyaka me Nọbu, mè ikiriak lek inyi ebi inyọn̄ ogoon̄ ama Sayọn, mè ebi inyọn̄ orioon̄ ama Jeruselem.

³³Ìkpọ, Ogwukaan̄-ene Okumugwem Ogwukaan̄ Inyọn̄ mè Ijọn̄, mônisọp agọọk ikpele uti ya igwook me unye, mè ichon uti ubene ile cha igwook, mè ikpaan̄ ujọn̄ọ uti cha ilaak ire ijọn̄.

³⁴Ọmọ môsa otuban isọp asabọn uti òkup me oron isan̄a, ikpele uti Lebanọn cha mêgbugbọ irọn̄ me umin kiban̄.