Read obolo Asaya 14 Bible Online

Asaya 14 - obolo bible

Asaya 14

¹Okumugwem môkaan̄ nsan me lek ebi uwu kè Jekọp, mè ikpọk igobo ebi Ijeren inyi lek kan̄, mè isun̄ ema me lek ijọn̄ kiban̄. Ebi ichen mêgọọk ema igbaan̄ iluk, mè itet lek iriaak me lek ebi uwu kè Jekọp.

²Ebi owuwa ido mêbọkọ ema, mè isa ema ika inu me inyọn̄ ijọn̄ kiban̄. Ebi uwu kè Jekọp mênenikaan̄ ebi ido cha me ìrot, me inyọn̄ ijọn̄ Okumugwem, kubọk ebi usun̄ ebirieen̄ mè ebibaan̄. Ebi mgbọ ìkpukpulu ema me usun̄ akọn̄, ema mênenikpulu si ife cha me usun̄ akọn̄, mè ikana ebi mkpulu inyi ebi mgbọ ìtututuku ema me irak kiban̄.

³Usen Okumugwem isirọ mè enyi etọbọ efuuk me emen unaan̄ kinyi, mè ufialek kinyi, mè emen uga kwulukwulu esabe ikeme enyi,

⁴enyi mêkitumu usem ikpak keyi inyi ogwu ubọọn̄ Babilọn: “Ubọk ogwu òtutuku ene îta me mun̄! Nnaan̄ kan̄ îyaka ikeya!

⁵Okumugwem îfan̄a mkpat ebi ikpak, òrere okuba ebi mkpulu,

⁶echi ema ekisa isulu ebi ene me unaan̄-ejit, mè ikpọkpọ ikisa ibọn̄ ebi ene, kpunu iwọwọ ubọk, mè isa ikikpulu ebi ido geelek unaan̄-ejit unaan̄-ejit, mè isa ikitutuku ebi ene, kpetetele ubọk.

⁷Otutuuk linyọn̄ îtọbọ efuuk, ere geelek îsuuk; ida okwa unwọọn̄ òkitaan̄ me agan̄ geelek.

⁸Ikerere ebi kè uti siperes mè ebi kè uti olik Lebanọn, mêkibele ejit mije kwun̄, mè ikibe, ‘Karake echobe owu ito, ogwu òcho-uti geege ìkayaka ìnu ìnichon eji ìgwook.’

⁹“Ama ekwukwu me irak ijọn̄ îdimi, mije kwun̄, mè inu inenichichini owu mgbọ okinu; îtimi ebi ìkwakwaan̄ ibe enetọp owu amọn, îtimi ife cha ebi mgbọ ìrere ebi ibot mkpulu linyọn̄ ibe enu, ebi mgbọ ìrere ebi ubọọn̄ me owuwa ido cha, îrọ inyi ema enan̄a ekeke me inyọn̄ ogboon̄ ubọọn̄ kiban̄ enu.

¹⁰Otutuuk kiban̄ mêfọọk otu, mè itumu inyi owu ibe, ‘Owu si? Owu owọ idek kubọk eji ewọbe! Owu okana ikup kubọk eji ekupbe!’

¹¹Otutuuk umin kwun̄ cha mè ilile ijọk melek ida uneen̄ kwun̄ cha, mîben isiki itap me ama ekwukwu. Ebi kè mkput mîkana ute me irak kwun̄, ebi kè mbuk mîkana ekwut ichit-lek inyi owu.

¹²“Jei, ntoronyan̄ otu ewelegwe, akukọ egwe, kpọ ubọk owu onan̄abe me akpa isinyọn̄ irọn̄! Jei, owu ogwu òkpukpuku esese ido igwook, kpọ ubọk efieekbe owu ito me ijọn̄!

¹³Owu otumu me emen ejit kwun̄ ibe, ‘Emi mânene ifo akpabin inyọn̄, mâbene ogboon̄ ubọọn̄ n̄a isaba iraka ebi kè ntoronyan̄ Awaji, emi mâkweek irek me inyọn̄ ogoon̄ ntitiin̄ me okputut agan̄ inyọn̄.

¹⁴Emi mânene iraka òta ubọk oduku inyọn̄, emi mâbet lek Ogwu Òbebene Ichit.’

¹⁵Ire, ama ekwukwu ke egele owu isiki initap, me okputut ere udọn̄ odọkbe iyaka.

¹⁶“Ebi geelek ìmumun̄ owu mêyaka chieen̄ igwuun̄ owu me lek, mè ikijiin̄ lek ibe, ‘Ìre ene ya ogwu mgbọ òkirọ otutuuk linyọn̄ isisik ya ire ogwu? Ìre ogwu òkirọ ebi ogbogbo ido ekeran ya ire ogwu?

¹⁷Ìre ogwu òkpukpuku linyọn̄ ikana èwê, mè igbugbọ owuwa ama me linyọn̄ igwook ya ire ogwu? Ìre ene yi ore ogwu ìkakichili isotu ìnyi ebi îtapbe mkpọn esibi efon?’

¹⁸“Otutuuk ebi ubọọn̄ ido geelek mîlilam me umin kiban̄, kpa ogwu me udọn̄-ufuun̄ eyi kan̄.

¹⁹Ire, mîtọp owu isibi me emen udọn̄-ufuun̄ kwun̄, kubọk agọọk uti ejijit ibe ìkakup me lek inu geege. Mêgbaan̄ owu melek ogbogbo ebi ekpan̄be me akọn̄ itọp itap me emen udọn̄ ewuuk ewuuk ge, nkwukwu ene mônenikana ofọnti inyi owu. Enyi mênenigbaan̄ ikwala igwook me emen ewuuk udọn̄ mkpa, kubọk nkwukwu ene ekijak me ukot iraka.

²⁰Kpebefuun̄ owu kubọk ekifuun̄ ebi ubọọn̄, mije, owu ojijaka lek ijọn̄ kwun̄ igwook, mè ikpan̄ ebi kwun̄. “Bọn owot iman ebi ijo irọrọ, kpebeyaka igwen erieen̄ kiban̄ ofifi, mege ire ukot geelek.

²¹Ìnen̄e ere ìsun̄ mêsabe nsabọn kan̄ isi igwu, mije ijo inu ebi nte kiban̄, inyi ema ekanan̄a ìkeke ìnibọkọ inyọn̄ ijọn̄ ya me ìrot, mè ìnama ama ìchit linyọn̄.”

²²Okumugwem Ogwukaan̄ Inyọn̄ mè Ijọn̄ ìbe, “Emi mânan̄a ikeke ije ikeme ema. Mâchep erieen̄ Babilọn mè echi ebi kan̄ ìsisik, mè erieen̄ ebi bọn mè eyi ebi owot iman kan̄, emi Okumugwem Ogwukaan̄ Inyọn̄ mè Ijọn̄ ntumu.

²³Mârọ si inyi ebi kè ukọ ebọkọ ere ya ekaan̄, mè irọ inyi ikana nria mun̄. Mâsa jakajaka ichan ema isan̄a, kubọk ìre ajijan̄, emi Okumugwem Ogwukaan̄ Inyọn̄ mè Ijọn̄ ntumu.”

²⁴Okumugwem Ogwukaan̄ Inyọn̄ mè Ijọn̄ înyan̄a ibot ibe, “Me atikọ, ike emi ndọmọbe, ikeya ke ìborọ, ike emi ntọtbe, ikeya ke ìbokeke.

²⁵Emi mâgbugbọ ebi Asiria igwook me lek ijọn̄ n̄a, mè ijak ema ikpukpuku me inyọn̄ ogoon̄ n̄a geelek. Mâgbeme mkpọn kiban̄ isan̄a me ebek ebi n̄a, mè ifeme ulobo akpan kiban̄ isan̄a me oguga ebi n̄a.

²⁶“Eyiyi ore inu edọmọbe isun̄ iban otutuuk linyọn̄, eyiyi si ore ubọk kan̄ îbenebe ifo inyọn̄ ikiweek isusulu ebi ido geelek osusut.

²⁷Mije, Okumugwem Ogwukaan̄ Inyọn̄ mè Ijọn̄ îra idọmọ isan̄a, ìre ekene obokọt igbuku nkeek kan̄ icho? Ọmọ îbene ubọk kan̄ itele, ìre ekene obokọt itet igele isiki?”

²⁸Me acha ogwu ubọọn̄ Ayaji okwube ke nriran keyi onu:

²⁹“Otutuuk kinyi ebi Filisia, ikabele ejit ibe ke mîra ifan̄a mkpat ya ekisa isulu enyi; ijo ulu mônan̄a me lek ugwun̄-ijọn̄ ijijinu keya ifubu isibi, gwun̄ kan̄ mônenire ijijinu òkiwuwulu itọk ene.

³⁰Mgbọ ya ebi n̄a ebi ìgbọgbọọn̄ ichit mêkaan̄ inorie, ebi una ubọk mêlaak inyana itọbọ efuuk. Ire, mâsa una inorie ijijaka ebi kinyi ebi mêsikbe, mè isa me ikeya ikpan̄ ema isan̄a kpai.

³¹“Jei, enyi ebi ama geelek ìdimi ito! Otutuuk kinyi ebi Filisia ìjet ìta mije ukpook! Oduku òkibumu me agan̄ inyọn̄ inu, kpunu ogwu ukot owọbe me urum kiban̄.

³²Keke ke ebefọọk ebi osat ebi ido Filisia eriabe inu? Mêtumu inyi ema ibe, ‘Okumugwem îra itọbọ ọdọ Sayọn inye, me emen kan̄ ke ebi ugbọọn̄ ìkup me etete ebi kan̄, ebelet lek.’ ”