Read obolo Asaya 17 Bible Online

Asaya 17 - obolo bible

Asaya 17

¹Eyi ìre nriran ofolek ebi Damasikọs: “Ìkpọ, Damasikọs ìkpoyaka ire ama ofifi, ire, ìbokana èdọ ǹrioon̄.

²Ama ebi Aroweri cha, môyat ita, ama cha ìboyaka inikup inyi ebi kè arọọn̄, ema ebekililam ijot, kpunu ogwu òbokililaba ema itap ukpook me lek.

³Ama mgban okanabe me Iferem ya môchep, unye eyi mkpulu me Damasikọs môchep; ebi Aram ebi mêsikbe mêfiin̄ umin kiban̄, kubọk ebi Ijeren efiin̄be eyi kiban̄. Emi, Okumugwem Ogwukaan̄ Inyọn̄ mè Ijọn̄ ntumu.

⁴“Me usen ya, umin kè Jekọp môgwọk ita, ufuk kan̄ môgbọkọ.

⁵Jekọp ìbokup kubọk ogwu òkifaan̄ akpa okwọọk uti akpa igbaan̄ ititiin̄ me uko, mè isa ubọk ifaan̄ akpa isan̄a me lek. Môkup si kubọk ogwu òkirọọn̄ inu òrọrọn̄ me ijọn̄ me uko osi irọọn̄ akpa me iteke ijọn̄ Refayim.

⁶Ubọk geelek si, môkaan̄ echi mêrọọn̄be isik, kubọk mgbọ ekisisik uti olifu igen̄ mfut me lek, ibot mfut iba mè ìre ita îra isik me lek agọọk eyi inyọn̄ inyọn̄, mè ibot ini mè ìre go òsik si me lek agọọk echi òtoto mfut ichit. Emi Okumugwem, Awaji ebi Ijeren ntumu.

⁷“Me usen ya, ebilene mêbene chieen̄ ikpọ Ogwu Òrom kiban̄ iweek ntap-ubọk, mè iyaka chieen̄ igwuun̄ me lek Ogwu Mbuban ebi Ijeren.

⁸Ema kpebeyaka ikibene chieen̄ ikpọ ntook cha, echi òrere ikwaan̄ ubọk kiban̄. Uti yọk Asera mè ntook nsensi cha, òrere inu otubọk kiban̄ osisọkọbe, ema kpebeyaka ikisa igwen inu.

⁹“Me usen ya, ama mgban akọn̄ kiban̄ cha môkana oron mè inyọn̄ ibot ogoon̄ eyatbe itele, kubọk ama echi elimbe itele mgbọ ebi Ijeren ejibibe akọn̄ inin̄. Yalayala môkup me otutuuk ere cha.

¹⁰“Mije, enyi mîwuuk Awaji Ogwu Unyan̄a kinyi, enyi kpekeek Ewuuk ya eyi òre mgban kinyi. Eya orọ, enyi mêwop atalek mfut uko ònwọnwọn, mè iwop gerep echi enyi elepbe inan̄a me ofifi ido,

¹¹ikerere ibe enyi mîkọt irọ inyi itibi me usen yaage enyi ewopbe, mè irọ inyi ito ajakajak me ewelegwe kan̄, me usen irọkọ-uko, enyi kpeberọkọ inu geege, ilọ me lek orukan̄ mè ufiak kpêkọtbe igwa.

¹²“Jei! Okput akọn̄ ebi owuwa ido òkitaan̄ inu! Ìkikput inu kubọk emen awaji okikput! Ebi owuwa esese ido mêkikput ikinu! Ema ekikput inu kubọk ogbururu onin̄ okwaan̄ ile!

¹³Ebi owuwa esese ido mêkikput inu kubọk ekoon̄ okwaan̄ okigbuku inu. Ire, Awaji môrama ema, mè ema eliliin̄ eyiyala èjọn̄ọ ere; ìbolililaba ema ikpọk iche kubọk efet okiwut mfuun̄ inyọn̄ ogoon̄ ikpọk ikana ere, mè ililaba ema kubọk inu egwijo okatbe isa ikigba iyak ije.

¹⁴Me ikakwun̄, uga ukpook mônunu inyi ema; ire, sabum ewelegwe, îta! Eyiyi obore mkpukpe ebi ìkifum inu kiji, mè inu ògbegbe ebi ìkichiin̄ inu kiji.”