Read obolo Asaya 18 Bible Online

Asaya 18 - obolo bible

Asaya 18

¹Jei, enyi ebi lek ijọn̄ ere ogbogbo asabọn inu òkiwulu me inyọn̄ okisulu uwop iwulu ikana, enyi ebi ìkup me usaba agan̄ okwaan̄ cha òkup me Etiopia,

²enyi eria ebi otuchieen̄ me okwaan̄ okwaan̄, me inyọn̄ isi mun̄ me emen uji esabe osùkut irom. Enyi ebi etip ebi ukot ofetbe, ìsi lek ido ebi ìjujujọn̄ mè irọt akpa, ebi ekitet ukpook me lek me agan̄ ya mè agan̄ geelek, ebi ido òkakaan̄ unye mè ikijak ene ikpukpuku, ebi okwaan̄ ochebe ijọn̄ kiban̄.

³Otutuuk kinyi ebi linyọn̄, enyi ebi ìluk me lek ijọn̄, isitaba egop me inyọn̄ ogoon̄, enyi mêmun̄; isiwut si otita, enyi mênọ.

⁴Mije, Okumugwem ìtumu inyi emi ibe ikeyi, “Mâriaan̄ ere nu, mè ikup me ere nlukbe ikikpọ, m̀bakup kubọk uyok ura ejit ikarek, kubọk oduku mbat òkisuuk uyok me lek ene me mgbọ ekirọkọ inu me uko.”

⁵Mije, sabum mêberọkọ uko, mgbọ oduuk isibak isan̄a, mè ajakajak isikana gerep òbebene ikiren̄e, ogwu uko môsasa oge isọp nsek otu agọọk, mè ifieek agọọk òsisisana igwook, mè ikpulu isan̄a.

⁶Mêtele ema otutuuk inyi unọn inyọn̄ ogoon̄ òkitaka nkwukwu inu, mè anam oron òluk me lek ijọn̄ ya; ebi kè unọn cha mêsa ema ikpukpo lek kiban̄ otutuuk mgbọ ura, ebi kè anam oron mêkirie ema otutuuk mgbọ ibot.

⁷Me mgbọ ya, ido ebi ìjujujọn̄ mè irọt akpa cha, ebi ekitet ukpook me lek me agan̄ ya mè agan̄ geelek cha, òrere ebi ido òkakaan̄ unye mè ikijak ene ikpukpuku, ebi okwaan̄ ochebe ijọn̄ kiban̄ cha, ife chi mêsa uche ijet Okumugwem Ogwukaan̄ Inyọn̄ mè Ijọn̄, ema mêsa uche inu me inyọn̄ ogoon̄ Sayọn, ere erieen̄ Okumugwem Ogwukaan̄ Inyọn̄ mè Ijọn̄ okupbe.