Read obolo Asaya 19 Bible Online

Asaya 19 - obolo bible

Asaya 19

¹Eyi ìre nriran ofolek ebi Ijipiti: Kpọ, Okumugwem òkikọp ugwat ugwat me inyọn̄ inu, ìkikọp inu me Ijipiti. Mkpọmfaka ebi Ijipiti mêkiriran inyi ukpook mije kan̄, ufieek-owot înin̄ igak emen ebi Ijipiti.

²“Mâgbaan̄ ibot ogwu Ijipiti mè ogwu Ijipiti ikwak, ngwan̄ mè ngwan̄ mêtim etim, ikeya si, ogwu melek mè ogwu melek, ama melek ama, ogwu ubọọn̄ melek ogwu ubọọn̄.

³Ekwukwu ebi Ijipiti môsisik enenen, Emi mâwuwọlọ otitọt ema etọtbe; ema mêsisi isi mkpọmfaka kiban̄, mè isi lek ekwukwu ebi ìkwakwaan̄, mè ekwukwu jom-jòm, mè ebi ìkido ido-inu.

⁴Mâyaka ebi Ijipiti itap me ubọk ebi mkpulu ìkirọ nnaan̄, ogwu ubọọn̄ òkirọ ikpak obokpulu ema. Emi Ogwukaan̄-ene Okumugwem Ogwukaan̄ Inyọn̄ mè Ijọn̄ ntumu.”

⁵Mun̄ okwaan̄ Nali môchat isan̄a, okwaan̄ ya môchiaak ikana nchat ijọn̄.

⁶Okolo Ijipiti geelek môjọ olu, ibot mun̄ geelek môchiaak ususuk ususuk, mè ichat ita. Osùkut mè anyiaan̄ môchiaak, mè ikwaan̄ isan̄a,

⁷inu geelek òkitibi me agba okwaan̄ Nali, mè echi òkitibi me otu mun̄ okwaan̄ ya, mè inu geelek ewopbe me uko me agba lek okwaan̄ ya môchiaak ita kpai; efet môwuwut ema ichieen̄ ita, kpunu geege òboyaka ikup.

⁸Ebi mbọm irin̄ mêto ito, mè ifieek ejit, ebi ìkito ukọọk me lek okwaan̄ Nali, mè ebi ìkitọp njin me lek okwaan̄ ya mêyiyeek ita.

⁹Ebi ìkisa uti fàlâs isi ikwaan̄ mêgak iweek, ebi ìkichak atata ekwut lilin̄ kpebeyaka ikaan̄ ikpọchieen̄ geege.

¹⁰Ùrioon̄ mônin̄ me lek ebi ìkichak ekwut, ufieejit môninin̄ me lek ebi ìkisi ikwaan̄ irie ikpoko onyan̄.

¹¹Me atikọ, ebi ibot me Sowan mîkana ndide, ebi nteme ogwu Fero ebi ìriọọn̄ inu cha ekinyi burubut nteme. Kpa ubọk ke owu obokọt itumu inyi Fero ibe, “Emi ìre gwun̄ ebi ìriọọn̄ inu, gwun̄ ebi ubọọn̄ ukot ikaan̄”?

¹²Ebi ìriọọn̄ inu kinyi cha ekup me owa? Mgbọ keyi, ema enu ma enetumu enyi enyi, mè erọ inyi enyi eriọọn̄, inu Okumugwem Ogwukaan̄ Inyọn̄ mè Ijọn̄ odọmọbe isun̄ ibak ebi Ijipiti.

¹³Ebi ibot me Sowan mîkana ndide, mîfiaan̄ ebi ibot ama Memfis ifiin̄; ebi ìrere atà inyi ebi Ijipiti mîfiaan̄ ebi kiban̄ ifiin̄.

¹⁴Okumugwem îria erumun̄ wọlọwọlọ itap me etete kiban̄, ema erọrọ inyi ebi Ijipiti ekerọ inu kpekpekpe, kubọk ebi usa-miin̄ ekigbugbe ikana, mè ikikpukpọt me emen igbọ kiban̄.

¹⁵Kpunu inu geege ebi Ijipiti ebeyaka ikọt irọ, mè ìre ema ìre ibot mè ìre edim, mè ìre nlak mè ìre osùkut.[7]

¹⁶Me usen ya, ebi Ijipiti ebekup kubọk ebibaan̄. Ema mêfieek owot, mè ikiran bak me lek ubọk Okumugwem Ogwukaan̄ Inyọn̄ mè Ijọn̄, eyi ìbobene ifo inyọn̄ iyaka ida ema.

¹⁷Mgbọ ya, lek ijọn̄ ebi Juda môkup me lek ebi Ijipiti nriki nriki. Ogwu isinọnọ ebakbe erieen̄ Juda, ukpook mônin̄ igak lek, mije inu Okumugwem Ogwukaan̄ Inyọn̄ mè Ijọn̄ otọtbe irọrọ ema.

¹⁸Me usen ya, ama go me Ijipiti mêkitumu usem ebi Kenan. Ema mênyan̄a ibot ibe ema mêsiki ibot inyi Okumugwem Ogwukaan̄ Inyọn̄ mè Ijọn̄. Ge me lek ama cha, mêkigwen Ama Mfufiat.[8]

¹⁹Me usen ya, mênama ntook ngwugwa inyi Okumugwem me inyọn̄ ijọn̄ ebi Ijipiti, mè iwat ewuuk igwuun̄ me lek okike ijọn̄ kiban̄ inyi Okumugwem.

²⁰Eya more inu ijejeen̄, mè ire inu ata-ikọ inyi Okumugwem Ogwukaan̄ Inyọn̄ mè Ijọn̄ me inyọn̄ ijọn̄ Ijipiti. Ema isitaan̄ ukpo igwen Okumugwem mije ebi ìkitutuku ema, Okumugwem môria ogwu unyan̄a mè ogwu môtimbe akọn̄ ibot kiban̄, mè isa me ikeya inyan̄a ema isibi.

²¹Okumugwem môrọ ibe ebi Ijipiti eriọọn̄ ogwu ọmọ orebe, ema mêrọriọọn̄ Okumugwem usen ya. Ema mêgwa ngwugwa inyi ọmọ, mè inyi ọmọ inyinyi. Mênyan̄a si ibot inyi Okumugwem, mè irọ si iso.

²²Okumugwem môsulu ebi Ijipiti osusut, môsulu ema osusut, mè igwa ema. Ema mêgwu ikom inu me lek Okumugwem. Ọmọ mônọnọ mbeek kiban̄, mè igwa ema.

²³Me usen ya, uga oniin̄ mônan̄a me Ijipiti isi ire Asiria. Ebi Asiria mêkinu me Ijipiti, ebi Ijipiti mêkekisi Asiria. Ebi Ijipiti mè ebi Asiria mêkekigbaan̄ itọbọ ebum inyi Okumugwem.

²⁴Me usen ya, ebi Ijeren mêre òso ita me lek ebi Ijipiti mè ebi Asiria. Ema ido ita chi mênenikana ire ugbana inyi ebi linyọn̄.

²⁵Okumugwem Ogwukaan̄ Inyọn̄ mè Ijọn̄ mônenigbana ema ibe, “Ugbana ikup inyi ebi Ijipiti ebi n̄a, mè ebi Asiria ebi ìre ubọk ikwaan̄ n̄a, mè ebi Ijeren ebi ìre ìrot n̄a.”