Read obolo Asaya 2 Bible Online

Asaya 2 - obolo bible

Asaya 2

¹Eyi ìre ilaak ọkpọchieen̄ eyi Asaya gwun̄ kè Amọs omun̄be ofolek Juda melek Jeruselem.

²Me mgburudun̄ usen cha, ogoon̄ Uwu Mbuban Okumugwem okupbe me inyọn̄, môkeke inye isaba iraka otutuuk ogoon̄ kechilọ; mêjibi ọmọ ibene igak ebi kè orioon̄, otutuuk ebi ido geelek mêgbuku inu me lek kan̄.

³Ebi owuwa ido mêkinu, mè ikitumu ibe, “Ìna, inyi eji enene esi inyọn̄ ogoon̄ Okumugwem, esi uwu Awaji kè Jekọp, inyi ijeen̄ eji oniin̄ kan̄, mè eji ekeje me oniin̄ kan̄.” Mije, îre me Sayọn ke Ikan obonan̄a isibi, ikọ Okumugwem ìbonan̄a me Jeruselem isibi.

⁴Okumugwem môsibi oyerebet inyi ido mè ido, mè ineen̄ gọlọgọlọ òkup me etete ife mè ife isun̄. Mgbọ ya, ema mêbọn̄ oge akọn̄ kiban̄ ikana orọk, mè ibọn̄ otunwa kiban̄ ikana oge ikwaan̄ uko. Ido ge ìkpoyaka ibene oge akọn̄ itim akọn̄ me lek ofifi ido, ema kpebeyaka ikpọk ikween̄ ukot akọn̄ ofifi.

⁵Enyi ebi uwu kè Jekọp ìna; ìna, inyi eji eje me emen utoon̄ Okumugwem.

⁶Okumugwem, owu ojuuk ebi kwun̄, ebi uwu kè Jekọp, itele, mije, ema mîtap nlilọ inu ebi agan̄ mbum-ura ekirọ ijot etete kiban̄; ema ekido ido-inu kubọk ebi Filisia, mè ikigọọk ebi ofifi ido ikigbaan̄ ifufuku me emen esese orọmijọn̄ kiban̄.

⁷Alata okuket mè alata araran̄ ìjojot lek ijọn̄ kiban̄, inu ubọọn̄ ema ekaan̄be, ìkakaan̄ okputut. Inyinya ìjojot lek ijọn̄ kiban̄, uji akọn̄ kiban̄ echi inyinya okitaba ije, kperiọọn̄ otu ifuk.

⁸Mkpọmfaka ìjojot lek ijọn̄ kiban̄, ema ekitọbọ ebum inyi inu ubọk kiban̄ orọbe, inu echi otubọk kiban̄ gaalek orombe.

⁹Mêkeme otutuuk ebilene isiki, mè irọ inyi ema esiki lek. Okumugwem, katele ijo kiban̄ ìnyi ema.

¹⁰Ìnyiọọn̄ ìnin̄ emen ǹkororok lek ewuuk, ìlileek me irak ijọn̄, inyi enyi enan̄a me lek ikpele ukpook Okumugwem, mè òrirọ eyi umin ubọọn̄ kan̄.

¹¹Mêgele ugumu ebi ugumulek igwook, mè isan̄a ubene oguga ogwu ebilene ito me ijọn̄. Okumugwem gaalek ke ebebene ifo inyọn̄ me usen ya.

¹²Mije, Okumugwem Ogwukaan̄ Inyọn̄ mè Ijọn̄ îsun̄ usen, inyi otutuuk ebi ugumu mè ebi ìkibene lek, mè otutuuk ebi geelek ìjijibi lek kiban̄ ibene ifo inyọn̄; ebegegele ema otutuuk isiki ilaak akpakpa me ijọn̄.

¹³Okumugwem îsun̄ si usen inyi otutuuk uti olik oron Lebanọn cha, òjijijọn̄ mè ibene ichep me akpabin inyọn̄, melek otutuuk uti ilip òkup me Basan,

¹⁴mè isun̄ si usen inyi otutuuk ogoon̄ cha òbebene ichep me inyọn̄, mè otutuuk ubene ubene orioon̄ cha,

¹⁵mè isun̄ si usen inyi otutuuk ubene ubene uwu-oket geelek, melek otutuuk mgban akọn̄ geelek ònyenye,

¹⁶mè isun̄ si usen inyi otutuuk uji ile ebi Tasis geelek, melek otutuuk òrirọ òrirọ bọn uji geelek.

¹⁷Mêgele ugumulek ogwu ebilene igwook, mè isan̄a ubene oguga ogwu ebilene ito me ijọn̄; Okumugwem gaalek ke ebebene ifo inyọn̄ me usen ya.

¹⁸Mkpọmfaka môchieen̄ otutuuk ita dìp dìp.

¹⁹Ebilene mêlilim inin̄ emen ǹkororok lek ewuuk, mè emen udọn̄ me inyọn̄ ijọn̄, inyi ema enan̄a me lek ikpele ukpook Okumugwem, mè òrirọ eyi umin ubọọn̄ kan̄, me mgbọ Okumugwem môjibibe isibi inu inisisik linyọn̄.

²⁰Me usen ya, ebilene mêkpulu mkpọmfaka alata okuket mè echi alata araran̄, echi ema erombe, mè ikitọbọ ebum inyi cha, itọọn̄ ifiin̄ inyi ebi kè ejook mè ebi kè afian̄.

²¹Ema mêlilim inene isi inin̄ emen udọn̄ me lek ewuuk, mè isi inin̄ si agbagba ewuuk me inyọn̄ ubene ubene agba ngigo, inyi ema enan̄a me lek ikpele ukpook Okumugwem, mè òrirọ eyi umin ubọọn̄ kan̄, me mgbọ Okumugwem môjibibe isibi inu inisisik linyọn̄.

²²Ìtele itotoon̄ ejit me lek ogwu ebilene, ogwu ìkakup me lek inu geege ilọ me lek efuuk îkifuuk me udọn̄ inwọm kan̄ gaalek. Ìre ebefuk ọmọ itap me lek keke ni?