Read obolo Asaya 22 Bible Online

Asaya 22 - obolo bible

Asaya 22

¹Eyi ìre nriran ofolek iteke Imọọn̄-inu.[11] Ìre keke osibi, eyi enyi otutuuk esi inene inyọn̄ otoon̄-uwu?

²Owu ama òkirariak, ama òkikpukput, owu ama unwọọn̄? Ebi kwun̄ ebi ekpan̄be kpeje me otu oge akọn̄, ema kpekwakwaan̄ si me akọn̄.

³Otutuuk ebi ibot kinyi egbagbaan̄ ilim, eteen̄ ema ubọk ubọk, kpesosook oraan̄ geege. Otutuuk ebi kinyi ebi esoon̄be itet, egbagbaan̄ ema si ikpulu, me ujọn̄ọ ere geelek ema elibibe isi igwook.

⁴Eya orọ emi nnenibe, “Ìda isi ìsan̄a emi me lek, ìtele me ǹto ujat ito. Ikasa me lek ikakat emi ejit ofolek ikpakpan̄ ekpaan̄be ebi kiji isan̄a.”

⁵Mije, Ogwukaan̄-ene Okumugwem Ogwukaan̄ Inyọn̄ mè Ijọn̄ îsun̄ usen ididimi ere mè ijajak inu ikpukpuku mè ukpook, me iteke Imọọn̄-inu, usen igbugbugbọ mgban igwook mè itataan̄ ukpo ilibi ifo lek ogoon̄.

⁶Ebi Elam mîbeen̄ akpa oraan̄ ikaan̄, ebi akọn̄ kiban̄ elibi me inyọn̄ inyinya; ebi Kiri si mîkpulu agbọ kiban̄ isibi.

⁷Ebi akọn̄ uji akọn̄ mênin̄ ijot emen iteke kinyi cha echi enyi ekima, ebi ìlibi me inyọn̄ inyinya ebemọmọnọ irek me otunchit kinyi.

⁸Mêsan̄a ukwek-lek ebi Juda isan̄a. Usen ya, enyi mêlilibi isi iweek nroon̄ akọn̄ kinyi, òkup me Uwu Ejit Oron.[12]

⁹Enyi mîmun̄ ibe ke mgban ama kè Debit[13] îkaan̄ ere ògbugbugbọ iwa me lek enenen, enyi mîtitiin̄ mun̄ isun̄ me emen Òkpuku Agan̄ Osiki.

¹⁰Enyi mîfuk otu ifuk uwu me Jeruselem, mè igbugbọ usini isa inama mgban inye.

¹¹Enyi mînama udọn̄ mun̄ me agbagba mgban iba, isasa ititiin̄ mun̄ itap me emen Oka Òkpuku. Ire, enyi kpeweek Ogwu Òrorom inu cha, enyi kpekakaan̄ si ulibi inyi Ogwu Òdọdọmọ inu cha isun̄ karake akat.

¹²Me usen ya, Ogwukaan̄-ene Okumugwem Ogwukaan̄ Inyọn̄ mè Ijọn̄, îgwen enyi ibe enyi eto ito, mè efieek ejit, mè ekwọkọ ijeek esan̄a me ibot, mè etap ofọnti ufieejit.

¹³Kpan̄asi ikeya, enyi enikinwọnwọọn̄ unwọọn̄, mè ikibele ejit, mè ikigwu eriembuuk, mè ikikpan̄ arọọn̄, mè ikitaka anam, mè ikinwọ miin̄, mè ikitumu ibe, “Eji erie, mè enwọọn̄, mije, iyakwut, eji mêkwaan̄!”

¹⁴Okumugwem Ogwukaan̄ Inyọn̄ mè Ijọn̄ îtumu ichili inyi emi ǹnọ ibe, “Ijo irọrọ keyi, kpebetele inyi enyi, mege ire usen enyi mêkwaan̄be ita. Emi Ogwukaan̄-ene Okumugwem Ogwukaan̄ Inyọn̄ mè Ijọn̄ ntumu.”

¹⁵Ogwukaan̄-ene Okumugwem Ogwukaan̄ Inyọn̄ mè Ijọn̄ îtumu si ibe, “Je, si lek Sebina, ogwu ikwaan̄ yi, ogwu ibot ikwaan̄ me uwu ogwu ubọọn̄, mè tumu nyi ibe,

¹⁶‘Ìre keke ke okirọ me ere keyi? Ekene ke owu okaan̄ me ere keyi, eyi okinirọkọ udọn̄-ufuun̄ inyi lek kwun̄ me ere keyi, eyi okirọkọ udọn̄-ufuun̄ me inyọn̄ ere òbebene, mè ikitibi ere iwọ-efuuk inyi lek kwun̄ me lek ewuuk?’

¹⁷“Kpọ, owu ogwu unye, Okumugwem mônitọp owu ifiin̄, ìbokakat owu ikam, mè itọp owu ifiin̄ ijọn̄ọ ere.

¹⁸Ìbokakat owu ikam ikup obot obot, mè itọp owu isi ito me ido òmimin. Ere keya ke owu obokup ikwu, ere ya si ke ujuja uji akọn̄ kwun̄ cha obobia; owu ìre inu esip inyi uwu nte uwu kwun̄.

¹⁹Okumugwem môlap owu isibi me uwu ikwaan̄ kwun̄, mè isan̄a owu isan̄a me irek kwun̄.

²⁰“Me usen ya, emi mâgwen ogwu ikwaan̄ n̄a, Eliakim gwun̄ kè Ilikiya.

²¹Mâsa ofọnti inyọn̄ kwun̄ itap ọmọ, mè isa fanti kwun̄ itobo ọmọ, mè iyaka unye eyi mkpulu kwun̄ itap ọmọ me ubọk. Ọmọ mônenikana ute inyi ebi ìluk me Jeruselem melek ebi uwu kè Juda.

²²Mâben atafi uwu kè Debit itoon̄ ọmọ me oguga. Ọmọ isichili, kpunu ogwu òbochit. Ọmọ isichit, kpunu ogwu òbochili.

²³Mâgwuun̄ ọmọ kubọk okpọ̀kọ me ere ònyenye, ọmọ mônenikana ogboon̄ ubọọn̄ òkakaan̄ umin me uwu ogwu ute.

²⁴Otutuuk ulobo akpan uwu nte kan̄ ìbojeen̄ ọmọ me lek, ibene me lek bọn mè bọn bọn uwu ya, ire lek otutuuk asasa nroon̄ uwu cha, kubọk alala inorie mè ugọn̄ mudim.”

²⁵Okumugwem Ogwukaan̄ Inyọn̄ mè Ijọn̄ onenitumu ibe, “Me usen ya, mêjibi okpọ̀kọ ya egwuun̄be me ere ònyenye, mêcho ito, môrọrọn̄ ire ijọn̄. Ulobo akpan cha geelek òjijijeen̄ me lek kan̄, mêsọp igwook. Emi Okumugwem ntumu.”