Read obolo Asaya 3 Bible Online

Asaya 3 - obolo bible

Asaya 3

¹Ìkpọ, Ogwukaan̄-ene Okumugwem Ogwukaan̄ Inyọn̄ mè Ijọn̄, mônibọkọ ebi ama Jeruselem mè ebi ido Juda otutuuk uche geelek, mè ntap-ubọk geelek ema ekisa ibene ibot, isan̄a ema me ubọk; môbọkọ ema otutuuk uche inorie, mè otutuuk uche mudim ema ekisa iluk ugwem, isan̄a.

²Môbọkọ ema si ebi unye kiban̄ melek ebi usọ akọn̄ kiban̄, mè ebi oyerebet melek ebi nriran, mè ebi ìtet ǹcha, melek ebi ugane,

³mè ebi ibot urum akọn̄ akọp ene go, melek ebi ilile ebi ekinyi umin, mè ebi nteme, melek ebi usọ ikwaan̄ ubọk, mè atalek ebi usọ ifit ibọk.

⁴Okumugwem mônenisa nsabọn irieen̄ irọ ebi ibot inyi ema; ebi ìkup me otu ebe mênenikikpulu ema.

⁵Ebi ene mêkekitutuku lek kiban̄; enerieen̄ môtutuku enerieen̄ ogbo kan̄, ogwu mbuuruk môtutuku ogwu mbuuruk kan̄. Nsabọn mêkinye chieen̄ inyi ebi ugane, ebi kpekup me lek inu mêkinye chieen̄ inyi ebi ilile.

⁶Ene ge môtet ogwu ngwan̄ me emen uwu ogwu ute, mè ibe, “Owu okaan̄ ofọnti. Owu môkana ogwu mkpulu inyi eji; ido yi, òkakana èdọ inu òjijijaka itọm ibene, owu obokpọ chieen̄ me lek!”

⁷Ene ya môjijit, mè initumu, me usen yaage, ibe, “Emi m̀kpakana ogwu òkibọp chieen̄ inya, kpunu inorie me uwu n̄a, kpukpunu si ofọnti. Ikasa emi ìrọ ogwu ibot ìnyi ebi ene.”

⁸Ama Jeruselem òkisisik, ido Juda înan̄a irọn̄, mije, ikọ ema ekitumu mè inu ema ekirọ, ekirọ ikeme Okumugwem; ema kpetet ukpook ibe ke chieen̄ mgbugbo kan̄ òwa me lek kiban̄.

⁹Ukpook òkup ema me inyọn̄ isi gaalek okisibi ata-ikọ ikeme ema, ema erọrọ ijo inu kiban̄ ikpọk mbum kubọk ebi Sodọm, kpelelet. Môfieek enenen inyi ema! Mije, ema gaalek etitiin̄ uyọrọlek itoon̄ me ibot kiban̄.

¹⁰Tumu nyi ebi ata irọrọ ibe ke mônwọn inyi ema, mije, ema mêrie mfut ubọk ikwaan̄ kiban̄.

¹¹Môfieek inyi ogwu ikpak! Ìkpomun̄ nnwọn! Mije, inu ọmọ okirọ ebi ofifi ene, eya ke eberọ ọmọ.

¹²Nsabọn ekitutuku ebi n̄a, ebibaan̄ ekekikpulu ema. Jei, ebi n̄a! Ebi ìkijeen̄ enyi oniin̄ ekisasa enyi ije ilọ oniin̄, ema mîwuwọlọ oniin̄ kinyi.

¹³Okumugwem îmọnọ irek kan̄ me ere oyerebet, îbem lek isisibi oyerebet me ibot ebi kan̄.

¹⁴Okumugwem ìbonin̄ oyerebet melek ebi ugane ebi kan̄, melek ebi ìkikpulu ema. Ogwukaan̄-ene Okumugwem Ogwukaan̄ Inyọn̄ mè Ijọn̄ ìkitoon̄ ema ikọ ibe, “Îre enyi ejijaka uko gerep n̄a isan̄a kpai! Inu ebi ugbọọn̄ cha enyi efumbe, ọmọ òwa me uwu kinyi okupbe.

¹⁵Keke orọ enyi ekpukpukube ebi n̄a igwook, mè itet isi ebi ugbọọn̄ ikwuk me ijọn̄?”

¹⁶Okumugwem ìbe, “Ebibaan̄ Sayọn ekigumu lek, mè ikinyana ebek ije ije, mè ikinin̄i chieen̄, mè ikije, mè ikiteek, ekwe ebek ukot kiban̄ okekisan̄a amọn nyak nyak nyak.

¹⁷Eya orọ, Ogwukaan̄-ene môrọ inyi mfem itaka eden̄ ibot ebibaan̄ Sayọn igwak; Okumugwem ìbochichili njak kiban̄ ijeen̄ oyet.”

¹⁸Me usen ya, Ogwukaan̄-ene môsan̄a inu mbala-lek kiban̄ cha isan̄a ema me lek. Môsan̄a asi ebek ukot cha òkisan̄a amọn, mè echi ekikwaan̄ me inyọn̄ isi, mè echi òkigọbọ kubọk aya onyan̄,

¹⁹mè mkputọn̄, mè asi ebek ubọk, mè ekwut ekisa ifiaka ichit isi,

²⁰mè akisi ekisa ifiaka ibot, mè akọlọ ekisa ibala ebek ukot, mè ujuja fanti kiban̄ cha, mè aran̄ òkibubaan̄ olu, mè igba kiban̄ cha,

²¹mè mkpọtubọk, mè asi inwọm,

²²mè ujọn̄ọ ofọnti kiban̄, mè ofọnti ekijejeen̄ me lek, mè ofọnti inyọn̄, mè akpa ubọk,

²³mè umọọn̄, mè ofọnti lilin̄, mè ekwut igọbọ ibot, mè ekwut ekitoon̄ me oguga cha.

²⁴Kpan̄asi aran̄ utop olu, ema ebeyaka inikidun̄u njijọ olu; kpan̄asi uja fanti ekisa ikana me ebon, ìboyaka inire olik; kpan̄asi ijeek ekpabe ijaan̄, ìboyaka inire ǹlak ibot; kpan̄asi uja ekwut ebon, ìboyaka inire ekwut ufieejit; kpan̄asi uja, ìboyaka inire iman̄ òriọọn̄ ebi usun̄ esabe okwukwut òreren̄e itap.

²⁵Ebirieen̄ kinyi mêkwaan̄ me otu oge akọn̄, ebi unye kinyi mêchieen̄ ita me akọn̄.

²⁶Otunchit ama Sayọn môkup me uga ufieejit mè ito, ama Sayọn me lek kan̄ môlaak ukpọk, mè isiki ikweek irek me ukpọk ijọn̄.