Read obolo Asaya 30 Bible Online

Asaya 30 - obolo bible

Asaya 30

¹Okumugwem onenitumu ibe, “Môfieek inyi bọn unye-ibot ebi ìsi ìtọt otitọt ikarege eyi n̄a, ebi ìsi ìkaan̄ mgbaan̄-nchieek eyi ikanan̄age me ekwukwu n̄a, mè isa me ikeya irọ owuwa ijo inu, ge me inyọn̄ ge.

²Ema ejeje iraka isi Ijipiti, kpedo emi ikọ me otu, ema esi ikiweek ere itap-ibot me ubọk ogwu Fero, mè isi iweek okwukwek me ubọk ebi Ijipiti.

³Ire, ere itap-ibot ogwu Fero môre esip inyi enyi, okwukwek ebi Ijipiti môtap enyi esip igak isi.

⁴Ubọk geelek ibe ke ema mîkaan̄ ebi ibot me Sowan, ebi otuchieen̄ kiban̄ erere ama Anes,

⁵esip môtet ema otutuuk ene, mije, ife cha kpebenin̄ ema oruru, kpebekaan̄ ntap-ubọk inyi ema, kpebesibi oruru geege, ire, ebere inu esip mè ochak.”

⁶Eyi ìre nriran ofolek ebi kè anam oron emen èwê agan̄ osiki: Ebi otuchieen̄ kiban̄ cha ebeme ikpoko me inyọn̄ inyinya akpan, mè ikpulu inu ubọọn̄ kiban̄ me inyọn̄ ebi kè aligọ, isa ikije itibi lek ijọn̄ ufialek mè ukwook, ere ebi kè egbe àtat, uman mè orie, elukbe, ere ebi kè ijo ulu mè ijijinu òkiwulu itọk ene, isa ijet ebi ido ya ebi kpekaan̄ oruru geege inyi ema.

⁷Ntap-ubọk ebi Ijipiti mênyibe ema ìkposibi oruru geege. Eya orọ, emi ngwenbe ebi Ijipiti anam ukpook ikakaan̄ge ejeek ilom ene.

⁸Mgbọ keyi, je si ge inu yi me lek akpakpa ewuuk nyi ema, ge tap me ikpa, inyi, me mgbọ òkup me isi, mônenikana inu ata-ikọ ire mgbọ geelek.

⁹Ebibi ìre ebi unye-ibot, mè nsabọn ìkikan̄ ataak, nsabọn ekamage igbagban̄ nteme Okumugwem.

¹⁰Ema etumu inyi ebi ìkimọọn̄ inu òborọ ibe, “Ikayaka ìmọọn̄ inu,” mè itumu inyi ebi nriran ibe, “Ikayaka ìben ata nriran ìnyi eji! Ìtumu inu òkitotop, ìben nriran ataak.

¹¹Ìkpebe lek ìnan̄a me oniin̄ keyi, ìjuuk lek oniin keyi ìtele, ìben ikọ ofolek Ogwu Mbuban ebi Ijeren ìnan̄a eji me isi.”

¹²Eya orọ, Ogwu Mbuban ebi Ijeren ìbe ikeyi: “Mije enyi ejitbe etip keyi, mè itoon̄ ejit me lek tukutuku, mè isa ofiaan̄ ibieen̄ lek,

¹³ijo inu keyi môkup inyi enyi kubọk ubene mgban òtọtọbọ ibum, mè ibeke, mè ijene irọn̄ isi ge me ekakpọge chieen̄.

¹⁴Môrọn̄ ikpukpuku kubọk ugọn̄ òsesek ijijaka, eyi kpemun̄ okpọkọ kan̄ geege eyi òmimin iso isasa ilọbọ ukan̄ me ototun̄, mè ìre isasa ichibi mun̄ me emen òkpuku mun̄.”

¹⁵Ogwukaan̄-ene Okumugwem, Ogwu Mbuban ebi Ijeren, ìtumu ibe ikeyi: “Ìgwu ìkom, mè ìtọbọ efuuk, inyi enyi mêkaan̄ unyan̄a; ìriaan̄ ere, mè ìkaan̄ utoon̄-ejit, inyi enyi mêkaan̄ unye.” Ire, enyi kpechieek.

¹⁶Kpan̄asi ikeya, enyi ebebe, “In̄-in̄, eji mêlibi me inyọn̄ inyinya.” Eya orọ, enyi mêlibi ekot. Enyi ebe si, “Eji mêkọp me inyọn̄ inyinya echi òkigwagwat ukot ekot.” Eya orọ, ebi ìkigọọk enyi ebegwagwat si ukot ekot.

¹⁷Ene ge kiban̄ isiriki enyi, obop ene kinyi mêlilim; ene go me lek kiban̄ iriki enyi, otutuuk kinyi mêlilim ita kpai, mege mêtelebe enyi kubọk uti egop ge òkup me inyọn̄ ogoon̄, mè ìyaka ire egop ge òkup me inyọn̄ orioon̄.

¹⁸Ire, Okumugwem òkikup ikpọ enyi, inyi ọmọ môrọ enyi nsan; ọmọ môtọbọ ijibi, mè ito enyi njijin, mije, Okumugwem ìre Awaji unen oyerebet. Uga unwọọn̄ môkup inyi ebi ìkikup ikpọ ọmọ.

¹⁹Me atikọ, enyi ebi Sayọn, ebi ìluk me Jeruselem, enyi kpebeyaka ito ito ofifi. Me atikọ, enyi isitaan̄ ukpo iweek ntap-ubọk, Awaji môrọ enyi nsan! Ọmọ isinọ ida ukpo kinyi, môfọọk enyi otu.

²⁰Ubọk geelek Ogwukaan̄-ene onyibe enyi ujaralek erie kubọk inorie, mè inyi enyi ukwook enwọ kubọk mudim, ebi ijejeen̄ kinyi kpebeyaka ilet lek kiban̄ me lek kinyi ofifi. Ire, chieen̄ kinyi mômun̄ ebi ijejeen̄ kinyi.

²¹Mè ìre enyi ekana inyi agan̄ ulom, mè ìre agan̄ ujit, utọn̄ kinyi mônọ ida ge me udun̄ kinyi okitumu ibe, “Kpọ oniin̄ ire eyi, ìnije ikeyi.”

²²Mgbọ ya, enyi mêfifila mkpọmfaka kinyi cha esabe alata okuket itọkọ ichit lek mè inu ebobot kinyi cha esabe alata araran̄ igwook iso lek. Enyi mêtọọn̄ ema ifiin̄ kubọk oka ekwut ibaan̄, mè ibe ema, “Ìsibi ìfon!”

²³Awaji môria ibot igwook me lek mfut enyi ewopbe me ijọn̄. Inorie òbosibi me ijọn̄ ya môwa, mè iso lek. Me mgbọ ya, anam kinyi môkaan̄ ere òwewele ìbokitaka mbubet.

²⁴Eriembuuk mè inyinya akpan echi ekisa ibak ijọn̄ uko mêtaka atata nchat mbubet òkaan̄ uchi me lek, echi esabe orọk mè ugen̄ sanasana otu igen̄.

²⁵Me usen mêkpan̄be ogbogbo ene ya, mgbọ uwu-oket cha môgbugbọbe igwook, mun̄ mônan̄a me lek ogoon̄ geelek òbebene mè lek orioon̄ geelek òbebene ikigbuk isibi.

²⁶Me usen ya Okumugwem môbọpbe inya ebi kan̄, mè igwa unan îsakbe ema me lek, onyan̄ môtoon̄ kubọk ura. Ura môtoon̄ mgbọ jaaba igak ubọk îkitoon̄. Ìbokup kubọk ura ìgbaan̄ utoon̄ eyi egwe jaaba itoon̄ mgbọ yaage.

²⁷Ìkpọ, Okumugwem me lek kan̄ òkinan̄a me ujọn̄ọ ujọn̄ọ ere inu; ìkinu melek uyok uyok unaan̄-ejit eyi okpukpuk oduku okibumu isibi me lek; ikọ kan̄ geelek ìre ikọ uga unaan̄-ejit, ikọ otu kan̄ ìre ukan̄ òkitaka inu geelek iriọk.

²⁸Efuuk kan̄ ìbet lek ukot mun̄ ile òkigbugbuk, eyi òkimeen̄ ene ire ebek. Ọmọ môsa ugen̄ eyi mkpa igen̄ ebi ido geelek, mè isa mgbidim okwukwut ikwuk irieen̄ me uga ebi ife geelek, mè isa ema ije ilọ oniin̄, inyi ema echieen̄ eta dìp dìp.

²⁹Enyi mêkọt okwa, kubọk enyi ekikọt me eririeen̄ mgbọ enyi ekirie ijọk mbuban; enyi mêbele ejit, kubọk mgbọ ebi ene ekiwut òja isa ikinene ogoon̄ Okumugwem, isi lek Ewuuk ebi Ijeren.

³⁰Okumugwem môrọ ibe ebi ene enọ ida kan̄ òkup urimi urimi, mè emun̄ ubọk kan̄ okigele isiki inu, melek unaan̄-ejit òkup afa afa, mè ukan̄ òkitaka inu iriọk, melek egwijo mè unye otu ibot mè ibot mgbọlọ.

³¹Ida Okumugwem môkpọk ebi Asiria isan, ọmọ môsa okuba kan̄ isulu ema igwook me ijọn̄.

³²Mgbọ Okumugwem isikisa okuba kan̄ isulu ema, okuba ya ìbokitaan̄ ema me lek igọọk me ida ekpete mè ida uneen̄ ile; Okumugwem ìbokiwum okuba kan̄ isa ikitim ema akọn̄ me lek.

³³Mîneneen̄ ere iwọp-inu isan̄a mgbọ òjọjọn̄ọ, isun̄ iban ogwu ubọọn̄. Mîrọkọ udọn̄ ukan̄ ya idọk, mè iwele; ukan̄ mè iye ìjojot emen gboi. Efuuk Okumugwem òbet lek ukan̄ biridọni òkinwọ ere mônirọ inyi ukan̄ ya ibumu.