Read obolo Asaya 31 Bible Online

Asaya 31 - obolo bible

Asaya 31

¹Môfieek inyi ebi ìsi Ijipiti isi iweek ntap-ubọk, ebi ìbieen̄ ejit me lek inyinya, mè itoon̄ ejit me lek owuwa uji akọn̄, melek ogbogbo ebi akọn̄ inyọn̄ inyinya, ire, ikpọchieen̄ kiban̄ ìkakup me lek Ogwu Mbuban ebi Ijeren, kpeweweek si ntap-ubọk me ubọk Okumugwem.

²Ire, Okumugwem si ìre ogwu òriọọn̄ inu, môkọt isa ùrioon̄ ijet ema. Ikọ geelek îtumube, ìkakilọ irọrọ iso. Ọmọ mônan̄a ikeke irọ ikeme ebi uwu ìkirọ ikpak, mè ebi ìtatap ubọk inyi ebi ijo irọrọ.

³Ebi Ijipiti ìre ebilene ikike, kpere Awaji, inyinya kiban̄ ìre anam ikike, ìkare ekwukwu. Okumugwem isinyana ubọk kan̄, ogwu òtap ubọk inyi ene môkwaak irọn̄, ogwu etapbe ubọk inyi mônan̄a irọn̄, ema isi mè udun̄ mêgbagbaan̄ ikwaan̄ ita.

⁴Okumugwem onenitumu inyi emi ibe ikeyi: “Mgbọ egbe àtat mè ìre gwun̄ egbe àtat okigọt me lek anam îchimbe, ikerere egwegween̄ urum ebi òkpukpo arọọn̄ inigban me isi kan̄, ukpo kiban̄ ìkakifieek ọmọ owot, okput kiban̄ ìkakiriki ọmọ. Ikeya ke Okumugwem Ogwukaan̄ Inyọn̄ mè Ijọn̄ obosibi inu initim akọn̄ me ogoon̄ Sayọn mè lek orioon̄ kan̄.

⁵Ike ebi kè ofut ekiwuwum ikana ikibem uwu kiban̄, ikeya ke Okumugwem Ogwukaan̄ Inyọn̄ mè Ijọn̄ obosa lek iwele ikwek Jeruselem, môsa lek iwele ikwek, mè inyan̄a ọmọ isibi, môsaba iraka, mè itaba ọmọ isibi.”

⁶Ebi Ijeren, ìgwu ìkom ìka ìnu me lek ogwu enyi ekatbe ejit ifieek inan̄a me lek.

⁷Mije, me usen ya, ene geelek me lek kinyi môjit mkpọmfaka alata okuket mè mkpọmfaka alata araran̄ cha enyi esabe ubọk ijo inu kinyi irom.

⁸“Mgbọ ya, ebi Asiria mêkwaan̄ me otu oge akọn̄ ikarege eyi ebilene; oge akọn̄ ikarege eyi ogwu ebilene môrie ema. Ema mêlilim inan̄a me otu oge akọn̄ ya, nsabọn irieen̄ kiban̄ si mênin̄ usun̄ ikwaan̄ òbọp.

⁹Ukpook môrọ inyi ewuuk òkikput ema lek inan̄a irọn̄; ebi ibot kiban̄ mêriki inyinya mgbọ ema mêmun̄be egop akọn̄.” Îre Okumugwem, ogwu ukan̄ kan̄ okupbe me Sayọn, ogwu orioon̄ ukan̄ kan̄ okupbe me Jeruselem, otumu.