Read obolo Asaya 32 Bible Online

Asaya 32 - obolo bible

Asaya 32

¹Kpọ, ogwu ubọọn̄ ge môkeke ubọọn̄ me ata irọrọ, ebi ibot mêkpulu me unen oyerebet.

²Ene geelek me etete kiban̄ ìbore ere ilet-lek me isi efet, mè ere irak-ibot me irak egwijo; mè ikisuuk ene lek kubọk ibot mun̄ me emen èwê, mè ikisiki ene lek kubọk ogugo ikpele ewuuk me inyọn̄ ijọn̄ òkirọ lek ene iweek.

³Mgbọ ya, chieen̄ ebi ìkimọọn̄ inu ìkpoyaka ichit, utọn̄ ebi ìkinọ ikọ ìbokinọnọ ikọ.

⁴Ejit ebi uran-lek môtolek inikaan̄ ngobo-ntet, alọm ebi ochichi môtolek inikitumu ikọ ibolo.

⁵Kpebeyaka ikiben ogwu mbubut igwen ogwu ilile, kpebeyaka ikinyi ogwu ngan ulibi.

⁶Mije, ogwu mbubut ìkitumu ikọ mbubut, ijo inu ìkakinan me emen ejit kan̄; ọmọ ìkirọ inu ebi ekariọọn̄ge Awaji ekirọ, mè ikitumu Okumugwem ilọ; ìkitele ebi uraafiọọn̄ me ukpọk owot, mè ojit ebi ebek orakbe mudim.

⁷Nroon̄ ikwaan̄ ogwu ngan ìre ijo inu; ọmọ ìkitọt inu ikpak, inyi ọmọ isa ikọ ataak ifiat ebi ugbọọn̄, mè ifiat si ebi ijo irek, ikerere mgbọ unen kiban̄ osibibe utoon̄.

⁸Ire, ogwu òkirọ inu òtatat, ìkitọt otitọt òtatat, ìkikeke si inye me lek inu òtatat.

⁹Enyi ebibaan̄ ebi ìkiluk kubọk enyi kpekaan̄ saasaak, ìnan̄a ikeke, mè ìnọ ida ikọ n̄a; enyi nsabọn ibaan̄ ebi ìkup kubọk mîkaan̄ utelelek, ìgban̄ utọn̄ me lek ikọ n̄a!

¹⁰Acha ge mè usen inen, enyi ebibaan̄ ìkup kubọk enyi kpekaan̄ ufialek geege, mêbene ikiran; mije, enyi kpebeyaka ikigbeme gerep ofifi, irọrọkọ mfut me uko si ìkpoyaka ikup.

¹¹Ìkiran, enyi ebibaan̄ ebi ìkiluk kubọk enyi kpekaan̄ saasaak, ìfieek owot, enyi nsabọn ibaan̄ ìkup kubọk mîkaan̄ utelelek! Ìtọn̄ọ ekwut kinyi ìgwook, mè ìtobo ekwut ufieejit ìnye me ebon.

¹²Ìsulu ubọk me ejit, ìfieek ejit, mije atalek uko cha, ìfieek ejit mije ata gerep cha òkitoto mfut ijot lek,

¹³mè ìfieek ejit, mije ijọn̄ ebi n̄a, eyi ukpak mè abọm egbe otibibe ichit; iin̄, ìfieek ejit, mije otutuuk uwu ubelejit cha, mè ama unwọọn̄ ya.

¹⁴Mije, mêyat itele ama mgban akọn̄, mè iyat ita me emen ama mgbọ òkikpukput ya; uwu mgban akọn̄ òkup me inyọn̄ ogoon̄, mè uwu-oket akọn̄, môkpukpuku igwook, mè ikana ere eyatbe itele mege ire mgbọ geelek; ere ebi kè inyinya akpan oron ebekinibọm urie, mè ere ebi kè arọọn̄ ebekinitaka mbubet,

¹⁵mege mêriabe Ekwukwu Awaji inan̄a me emen inyọn̄ igwook me lek kiji. Mgbọ ya, emen èwê mônenikana ata ijọn̄ uko, ata ijọn̄ uko môneniyaka inikup kubọk aka oron.

¹⁶Mgbọ ya, unen oyerebet môkup me emen èwê, ata irọrọ môkup me ata ijọn̄ uko ya.

¹⁷Ata irọrọ môsa esuuk inu, ikwaan̄ ata irọrọ mônenisa utelelek mè ikpọchieen̄ inu, mege ire mgbọ geelek.

¹⁸Ebi n̄a mêluk me ere esuuk, mè uwu òkup me utelelek, me ere isiki-efuuk eyi kpebemun̄ saasaak.

¹⁹Ubọk geelek ibot mgbọlọ môgbugbọbe oron igwook, ubọk geelek mêgwakbe ama ikpukpuku igwook,

²⁰môre ikpele ubelejit inyi enyi, mgbọ enyi isikiwop mfut uko me otutuuk agba mun̄ geelek, eriembuuk kinyi melek inyinya akpan kinyi mêkekije ikana ere ikibọm urie.