Read obolo Asaya 33 Bible Online

Asaya 33 - obolo bible

Asaya 33

¹Môfieek inyi enyi ebi ìkijijaka ebi ofifi ife, ire, ebi ofifi ife kpejijijaka enyi! Môfieek inyi enyi ebi ìkirọ inu ofiaan̄ ofiaan̄ me lek ebi ofifi ene, ire, ebi ofifi ene kpekirọrọ enyi inu ofiaan̄ ofiaan̄ me lek! Mgbọ enyi isijijaka ifieek, mêjijijaka enyi; mgbọ enyi isifiaan̄ ene ikem, mêfafiaan̄ enyi.

²Jei Okumugwem, kaan̄ nsan me lek kiji, owu ke eji ekup ikikpọ. Re ogwu unye kiji ewelegwe geelek, mè ogwu unyan̄a kiji me mgbọ ufialek.

³Ida kwun̄ isiseme, ebi ife geelek mîra ililiin̄ ita; owu osibene lek igwuun̄, ebi ido geelek mîra iyiyala ita.

⁴Mêkpulu inu kwun̄ ema efumbe inọọn̄ kubọk ituuk onin̄ uko, ebi ene mêkpulu inu kwun̄ inọọn̄, kubọk ego akaka ituuk ogwook ichit lek mfut me uko.

⁵Okumugwem îbene, mije, ọmọ ìluk me emen inyọn̄ ere òbebene; ọmọ môtap unen oyerebet mè ata irọrọ ijot me Sayọn.

⁶Ọmọ obotet enyi ikaan̄ inye me ukot mgbọ kinyi, mè ire si ere unyan̄a mè iriọọn̄-inu mè ifuk-ibot òjojot obokinan̄a isibi. Ikakaan̄ ukpook Okumugwem, ọmọ ore inu ubọọn̄ kinyi.

⁷Ìkpọ, ebi unye kiban̄ mêkitaan̄ ukpo ito ito me lek oniin̄, ebi otuchieen̄ ìbeben etip eyi esuuk mêkito ujat ito.

⁸Uga oniin̄ geelek înọọn̄, ebi ije kpeyaka ikije me lek. Mgbaan̄-nchieek îgwak, mîkpọ chieen̄ ilọ me lek ama ile cha, kpeyaka ikinyi ebilene ulibi.

⁹Ijọn̄ ìkup me ufieejit mè ikitak ita; esip îtet uti oron Lebanọn, ema mîriọkọ isan̄a; òla ijọn̄ Sarọn îkana èwê, uti òtibi me Basan mè inyọn̄ ogoon̄ Kamen îgen inwan̄ isan̄a me lek.

¹⁰Okumugwem onenibe, “Mgbọ keyi, emi mânan̄a ikeke, mgbọ keyi, mâjibi lek n̄a ibene, mgbọ keyi, mêrọ emi imin.

¹¹Otitọt kinyi ìbore ìkike kubọk ogwu ònin̄ owot ikpọk akpa, mè iman nchat mbubet; efuuk enyi ekifuuk obore ukan̄ òbotaka enyi iriọk.

¹²Mêwọp ebi ife geelek ikup kubọk akanwen̄, ema mêsak ukan̄ kubọk nchat ukpak efieekbe igwook.”

¹³Enyi ebi ìkup me ujọn̄ọ ere, ìnọ inu nrọbe; enyi ebi ìkup me mgbet mgbet ere, ìriọọn̄ unye n̄a.

¹⁴Ebi ìkirọ ijo inu me Sayọn mêkifieek owot, ebi kperiọọn̄ Awaji mêkiran. Ema ekibe, “Ekene me lek kiji obokọt iluk melek ukan̄ òkitataka inu iriọk? Ekene me lek kiji obokọt iluk melek ukan̄ òkisasak ire mgbọ geelek?”

¹⁵Îre ogwu òkiluk ugwem ata irọrọ, mè ikitumu inu òtatat; ogwu òjijit oruru òje me oniin̄ ngan, ogwu òkisa ubọk kan̄ irieen̄ ikpoko udun̄ isan̄a, ogwu ìkakichieek isasa utọn̄ inọ ekitọt ifafiat eje ene, mè òchit chieen̄ kan̄, inyi ọmọ ikasa ìmun̄ ijọ inu.

¹⁶Ọmọ ore ogwu òboluk me ere òbebene, ere itap ibot kan̄ ìbore uwu mgban akọn̄ òkeke me inyọn̄ ewuuk. Mêkinyi ọmọ inorie kan̄, mudim ìkponan ọmọ.

¹⁷Chieen̄ kinyi mômun̄ ogwu ubọọn̄ okikpulu me uja kan̄, mè imun̄ ijọn̄ kan̄ òwewele isaak ijọn̄ọ ere.

¹⁸Enyi mêkekikeek inu ukpook òrọrọ mgbọ ya me ejit kinyi: enyi mêkibe, “Mọmọ ogwu òkifuk inu efumbe ya? Mọmọ ogwu òkitọ ikpoko otitip ido etipbe? Mọmọ ogwu òkifuk otu ifuk uwu-oket cha?”

¹⁹Enyi kpebeyaka imun̄ ebi ikpak cha ofifi, ebi ìkitumu nke nke usem kpekinọ ibot, ebi ochichi cha ìkifufuku usem kpekikọt igobo itet.

²⁰Ìkpọ Sayọn, ama ere eji ekirie ijọk; chieen̄ kinyi mômun̄ Jeruselem, ere nluk òkup me esuuk, uwu ọfọ eyi kpebekọt ijibi inan̄a me akpat; kpebejibi okpọ̀kọ kan̄, mege ire mgbọ ikakaan̄ge itata, otutuuk olik kan̄, kpunu geege òbofieek.

²¹Okumugwem ore Ogwu Unye kiji me ere ya. Ìbokup kubọk ere uwele okwaan̄, mè uwele okolo òbabaak ichit agan̄ iba kan̄. Uji awala mè uran̄ geege ìkpoje me lek okwaan̄ cha, nga uji ile geege ìkpokọp me lek.

²²Mije Okumugwem ore ogwu oyerebet kiji, Okumugwem ore ogwu òkinyi eji ikan, Okumugwem ore ogwu ubọọn̄ kiji, îre ọmọ obonyan̄a eji.

²³Olik awala kinyi îwuwọk: Uga uti awala ìkayaka ìnye, awala ìkachili ìgwook. Mgbọ ya, mêche ogbogbo inu efumbe me akọn̄, ebi akọọk otutuuk mêgọọk ikpulu inu efumbe me akọn̄ isa ifon.

²⁴Kpunu ogwu òluk me Sayọn ogwu òbobe, “Lek n̄a ìkanye.” Mgbọ ya, ebetetele otutuuk nrọ-nlọ ebi ìluk me ere ya, inyi ema.