Read obolo Asaya 34 Bible Online

Asaya 34 - obolo bible

Asaya 34

¹Ido geelek, ìje igbet, ìninọ; ebi ife geelek, ìnigban̄ utọn̄! Linyọn̄ mè otutuuk inu òkup me lek kan̄, ìnọ, linyọn̄ mè otutuuk inu geelek òsibi me lek kan̄, ìgọọk ìnọ!

²Okumugwem înaan̄ ejit inyi otutuuk ido, unaan̄-ejit kan̄ îyok me lek otutuuk urum akọn̄ kiban̄. Ọmọ môjijaka ema isan̄a kpai kubọk inu oniin̄ akọn̄, môyaka ema inyi ekpan̄ esan̄a.

³Mêtọọn̄ ebi kiban̄ ekpan̄be cha ifiin̄, olu nkwukwu ene kiban̄ môkekijọ ikana ere; eje kiban̄ ìbokigbọgbọọk ikana me inyọn̄ ogoon̄.

⁴Otutuuk ntoronyan̄ me akpabin inyọn̄ mêyiyeek ita kpai, mêkakat akpabin inyọn̄ isan̄a, kubọk ikpa ekakat; otutuuk inu òkup me isinyọn̄ mêrurọn̄ọ kubọk inwan̄ gerep òrọriọkọ, mè igen̄ igwook me ijọn̄ kubọk nchiaak mfut uti figi okigen̄ igwook me ijọn̄.

⁵Oge akọn̄ n̄a înwọ eje ijot me akpabin inyọn̄. Ìkpọ, mônirọn̄ itoon̄ me lek ebi Edọm, ebi ife cha emi nsibibe oyerebet me ibot, mè ibajijaka isan̄a kubọk inu oniin̄ akọn̄.

⁶Oge akọn̄ Okumugwem ìkeken eje ijot, okpọn̄ ìkakam me lek gbak, eje bọn arọọn̄ mè ebot, mè okpọn̄ ònan̄a me lek ichip orie arọọn̄. Mije, Okumugwem îkaan̄ ngwugwa me Bojira, mêgwu ogbogbo anam inyi ọmọ me Edọm.

⁷Eriembuuk echi oron mêkwaan̄ inin̄ emen, orie bọn eriembuuk melek ikpele eriembuuk echi orie. Eje mômeen̄ lek ijọn̄ kiban̄, mfuun̄ ijọn̄ kiban̄ mônwọ okpọn̄, mè ikana ikup ibat ibat.

⁸Mije, usen Okumugwem oborọ useen̄ inu îre, acha Okumugwem obosulu ene osusut me lek inu erọbe ebi Sayọn îso.

⁹Mun̄ emen okolo ebi Edọm geelek môkana agba ofifit òkitet ukan̄, achiaan̄ ijọn̄ kiban̄ môkana biridọni òkisak ukan̄, ijọn̄ kiban̄ môkana agba ofifit eyi ukan̄ okibumu me lek!

¹⁰Ikarek mè eririeen̄, kpebeniin̄ ukan̄ ya; oduku kan̄ môkibumu ifo inyọn̄ ire mgbọ geelek. Nan̄a me ukot re me ukot, ìbolaak ikeya ukpọk ukpọk; ene geege ìkpojeje iraka me ere ya, ire mgbọ geelek, mgbọ geelek.

¹¹Ebi kè ùgọọk melek ukọ ebekaan̄ ere ya; ebi kè ikwurikwu oron melek ikwurikwu emen èwê[17] ebenibọkọ ere ya iluk. Awaji môsa olik mfufiat initaba isaba Edọm, mè isa ewuuk itọ-inu eyi jakajaka inijijaka ema igwook.

¹²Ebi ibot kiban̄ kpebeyaka ikaan̄ ere mkpulu ema ebekigwen ido ofifi, ebi ilile kiban̄ kpebeyaka ikup me lek inu geege.

¹³Ukpak môtibi ichit uwu akọn̄ kiban̄, òriaak me akpa mè alaga oron môkakana ichit ama mgban akọn̄ kiban̄. Ama ya ìbokana ere ebi kè ibo oron ekiluk, mè ikana ere ifit ifit inyi ebi kè wukuwuku.

¹⁴Anam emen èwê mè ebi kè ibo oron ngwugwat lek ebekichichini me ere ya, ebi kè ebot oron mêkitaan̄ ukpo inyi lek kiban̄ ge ge; ere ya si ke ebi kè anam òkibọm urie me eririeen̄ ebekitọbọ efuuk, mè ikisa irọ ere iwọ-ifi.

¹⁵Ebi kè ikwurikwu mêkinama uwu me ere ya mè ikito nkwa, mè ikikpọk bọn, mè ikikwuun̄ ema me irak uwop kiban̄; ebi kè mkpukpo mêkititiin̄ si me ere ya, kpa ogwu mè ogwu olom.

¹⁶Ìweek me emen ikpa Okumugwem ìfuk: Inu chi geege ìkpochep me emen, kpunu nwa geege òbonan ogwu olom; mije, Okumugwem osa otu kan̄ inyi ida ya, Ekwukwu kan̄ si môgbaan̄ ema ititiin̄.

¹⁷Ọmọ môsa ubọk kan̄ idọmọ okike ijọn̄ inyi ema, môsa olik itọ-inu me ubọk kan̄ itọ okike ijọn̄ iche inyi ema. Mônenikana eyi kiban̄ ire mgbọ geelek, ema mêluluk me ere ya, nan̄a me ukot re me ukot.