Read obolo Asaya 35 Bible Online

Asaya 35 - obolo bible

Asaya 35

¹Emen èwê mè lek ijọn̄ òchachat môbele ejit, ijọn̄ ìkakitibi inu mônwọọn̄ unwọọn̄, mè igwook ajakajak.

²Môgwook ajakajak kubọk ukan̄-oron; môbele ejit enenen, mè itaan̄ ukpo inwọọn̄ unwọọn̄, mênyi ọmọ uja eyi oron inyọn̄ ogoon̄ Lebanọn okaan̄be, mè umin eyi ogoon̄ Kamen mè òla ijọn̄ Sarọn; ema mêmun̄ ujamgbugbo Okumugwem, mè imun̄ òrirọ eyi Awaji kiji.

³Ìrọ inyi ubọk òwọwọ inye, mè akpatukot òkiraran ikeke.

⁴Ìtumu ìnyi ebi owot okifieek ibe, “Ìtet lek ìnye, ikayaka ìfieek owot; Ìkpọ, Awaji kinyi òkinu, ìbonirọ useen̄ inu erọbe enyi, mkpukpe ijo inu ònan̄a me ubọk Awaji òkinu; Awaji mônu ininyan̄a enyi.”

⁵Mgbọ ya, chieen̄ ebi ǹnàan̄ môbolo, utọn̄ ebi ìnan môchili.

⁶Mgbọ ya, ebi akọọk mêraan̄ iwulu kubọk ogaan̄ sanasana iko, ebi mbuuk mêsa alọm kiban̄ ikikọt okwa inwọọn̄ unwọọn̄. Mije, mun̄ môsook isibi me emen èwê, okwaan̄ môkekigbuk me ijọn̄ òchachat.

⁷Ijọn̄ òchachat môkana òkpuku mun̄, ijọn̄ òchachiaak môkana ògbugbuk mun̄. Ere mgbọ ebi kè ibo oron afa ekililam ikana, mbubet mè anyiaan̄ mè osùkut obotibi ichit.

⁸Uga oniin̄ môkup me lek ijọn̄ ya; mêgwen oniin̄ ya Oniin̄ Mbuban. Ebi ìkaan̄ mbuban me lek kpebeje me lek, ire, ìkup inyi ema; ebi geelek ìkije me lek oniin̄ ya, ikerere ebi mbubut, kpebelọ oniin̄.

⁹Egbe àtat ìkpokup me lek oniin̄ ya, kpunu anam afa geege òbonene lek oniin̄ ya ije, kpebemumun̄ ema me ere ya. Ire, ebi Awaji ofakabe isibi gaalek ebeje me lek oniin̄ ya.

¹⁰Sa me ikeyi, ebi Okumugwem okpebe mkpukpe ibot kiban̄ mêkika. Ema mêkikọt okwa inu me Sayọn; unwọọn̄ eyi kpotabe obochit ema me ibot kubọk okpibot ubọọn̄. Ubelejit mè unwọọn̄ mômin igak ema ejit; ufieejit mè igwugwuku mfi ìkpoyaka ikup.