Read obolo Asaya 38 Bible Online

Asaya 38 - obolo bible

Asaya 38

¹Me ike mgbọ ya, Ejikaya onenirọn̄ orukan̄, mè ibokwu. Ogwu nriran Asaya gwun̄ kè Amọs onenisi lek kan̄, mè itumu inyi ọmọ ibe, “Okumugwem ìbe owu: Nen̄e uwu kwun̄ sun̄, mije, owu mônikwu. Lek kwun̄ ìkponye.”

²Ejikaya oyayaka isi ida agba uwu, mè iriaak Okumugwem ibe,

³“Jei Okumugwem, soso, keek ubọk nsabe iluk ugwem melek kwun̄ me otutuuk ejit n̄a mè otutuuk atikọ, mè ikirọ inu ònwọnwọn me chieen̄ kwun̄.” Ejikaya obubumu ito, mè ito ito enenen.

⁴Okumugwem otutumu inyi Asaya ibe:

⁵“Si tumu nyi Ejikaya ibe, ‘Okumugwem, Awaji nte nte kwun̄ Debit, ìtumu ibe ikeyi: Nra inọ uriaak kwun̄, mè imun̄ mun̄ ito kwun̄. Mâtap akọp mè acha go isọkọ me lek acha ugwem kwun̄.

⁶Mânyan̄a owu melek ama yi isibi me ubọk ogwu ubọọn̄ Asiria. Emi mâkwek ama yi lek.

⁷“ ‘Inu ijejeen̄ eyi emi Okumugwem mbanyi owu, inyi owu òsa òriọọn̄ ibe ke emi mârọ use yi nchieekbe owu iso ìre ikeyi:

⁸Mârọ inyi ogugo ura ògwogwook me lek obeek kè Ayaji iso akọp otitop iyaka ikpebe inyi udun̄ akọp otitop cha.’ ” Ikeya si, ogugo ura ya okpekpebe inyi udun̄ akọp otitop.

⁹Mgbọ Ejikaya ogwu ubọọn̄ Juda ofiakbe orukan̄, lek oyakabe inye, igege okwa ibe:

¹⁰Emi m̀be, “Ìre me etete usen ugwem n̄a ke emi mbafat ininan̄a ije ukot ukot ifo otunchit ama ekwukwu; menibọkọ emi acha ugwem n̄a echi òsisik?

¹¹Emi m̀be ke m̀kpayaka ikpọk imun̄ Okumugwem; iin̄, Okumugwem, me linyọn̄ ebi ìkup me ugwem; ke m̀kpayaka irieen̄ chieen̄ me lek ebilene, m̀kpayaka ikup me etete ebi ìgat ugwem.

¹²Mîjibi ugwem n̄a imaan̄, mè ibọkọ ugwem n̄a isan̄a emi me ubọk, kubọk uwu ọfọ ogwu òkpukpo arọọn̄; Awaji îkat ugwem n̄a igba, kubọk ogwu òchak ekwut okat ekwut igba, mè ifieek emi isan̄a me lek agbasi ichak ekwut; me mgbidim mgbọ, kubọk ewelegwe re ikakwun̄, owu osasa ugwem n̄a ire okputut.

¹³Ǹtetet lek n̄a ikaan̄ mege iwele egwe; ọmọ ofafaan̄ emi otutuuk ukwuuk isan̄a me lek, kubọk egbe àtat ofaan̄ ukwuuk me lek anam; me mgbidim mgbọ, kubọk ewelegwe re ikakwun̄, owu osasa ugwem n̄a ire okputut.

¹⁴Nsan̄a amọn agagawaji mè ìre amọn aba mbese, ntaan̄ ito ekerekwukwu. Chieen̄ îwọ emi inyi ibebene ifo inyọn̄. Ǹkup me emen ujaralek; jei Ogwukaan̄-ene nin̄ emi lek!

¹⁵“Keke ke mbayaka itumu ni? Ọmọ otumu ikọ inyi emi, ọmọ me lek kan̄ orọ inu yi. Mâsiki lek ikiluk ugwem otutuuk acha ugwem n̄a, mije uga ujaralek òkup emi me ejit.

¹⁶Ogwukaan̄-ene, inu kechi ke ebilene ekisa iluk, sa me lek inu chi si ke ekwukwu n̄a okaan̄ ugwem. Owu otap emi ayaya unye me emen, mè itele ibe emi ǹgat ugwem.

¹⁷Me atikọ, uga ujaralek ya ìnu inyi emi, inyi ǹsa me ikeya ǹkaan̄ esuuk. Sa me imumechieen̄ kwun̄ ke owu onyan̄a emi isibi me udọn̄ mkpa; owu obieen̄ otutuuk ijo inu n̄a ikana ito me udun̄ kwun̄.

¹⁸Ama ekwukwu ìkpokọt ibe owu onirọ, mkpa me lek kan̄ ìkpokọt itọn̄ owu, Ebi ìninin̄ udọn̄ mkpa kpebekọt ikpọ chieen̄ ibe owu ogbe utoon̄-ejit.

¹⁹Ebi ìkup me ugwem, ebi ìkup me ugwem ere ebi ìkitọn̄ owu, kubọk nkirọ me cherekeyiyi. Ebi ute ekikpa inyi nsabọn kiban̄ ibe ke owu ogbe utoon̄-ejit.

²⁰“Okumugwem înyan̄a emi, eya orọ eji mêkwak uneen̄ isa ikọt okwa otutuuk usen geelek me ugwem kiji me emen Uwu Mbuban Okumugwem.”

²¹Me mgbọ Asaya olookbe Ejikaya etip Okumugwem ya, ìtumu ibe, “Ìkọk mfut figi, mè ìsa ìtoon̄ me chieen̄ okporotu ya ìbọp, ke lek kan̄ mônye.”

²²Mgbọ ya, Ejikaya îdo ibe, “Ìre keke obore inu ijejeen̄ ibe ke emi mânan̄a ikeke ije isi Uwu Mbuban Okumugwem?”