Read obolo Asaya 39 Bible Online

Asaya 39 - obolo bible

Asaya 39

¹Me ike mgbọ ya, ogwu ubọọn̄ Babilọn, Merodak Baladan gwun̄ kè Baladan, oneniria ikpa etip mè iche uche igbaalek ijet Ejikaya, mije, înọ ibe ke Ejikaya îfiak orukan̄, lek kan̄ oyayaka inye.

²Ejikaya obebele ejit, mè ibọkọ ebi osat cha itap, mè isa ema isi ijeen̄ uwu isun̄-inu kan̄, mè ijeen̄ ema inu ubọọn̄ òkup me uwu isun̄-inu ya. Îjeen̄ ema alata okuket mè alata araran̄, mè inu ekisa ibala inorie, mè atalek aran̄ unye otu ewe, mè otutuuk uwu nroon̄ akọn̄ kan̄, mè otutuuk inu ubọọn̄ kan̄ geelek. Kpunu inu geege òkup me uwu kan̄ mè ìre me otutuuk ido kan̄ eyi Ejikaya ìkajeen̄ ema.

³Asaya ogwu nriran onenisi lek ogwu ubọọn̄ Ejikaya, mè ido ibe, “Ìre keke ke ife cha etumu inyi owu? Ìre ema enan̄a me ere owa inu?” Ejikaya ofọfọọk ibe, “Ema enan̄a me ujọn̄ọ ere inu. Enan̄a me Babilọn inu me lek n̄a.”

⁴Asaya ogwu nriran onenido ibe, “Keke ke ema emun̄ me uwu kwun̄?” Ejikaya obebe, “Ema mîmun̄ otutuuk inu òkup me uwu n̄a. Kpunu inu geege me lek inu ubọọn̄ n̄a eyi nkajeen̄ge ema.”

⁵Asaya onenitumu inyi Ejikaya ibe, “Gban̄ ikọ Okumugwem Ogwukaan̄ Inyọn̄ mè Ijọn̄ otumube:

⁶Mgbọ òkinu mgbọ mêkpulube otutuuk inu òkup me uwu kwun̄, mè otutuuk echi ebi nte nte kwun̄ ekukọbe ititiin̄ isun̄ mege inire cherekeyi, isa ifo Babilọn. Inu geege ìkposik. Emi Okumugwem ntumu.

⁷Usini me lek bọn kwun̄, ebi owu môbonbe, ebi ebemaan̄ inyi owu, mêkpulu si ema isa ifon. Ema mênenisi ikana ebi ikwaan̄ ebi esan̄abe òsok me uwu ogwu ubọọn̄ Babilọn.”

⁸Ejikaya ofọfọọk Asaya ibe, “Ikọ Okumugwem eyi owu otumube înwọn.” Ọmọ ìtumu ikeya, mije, nkeek kan̄ ìre ke esuuk mè utelelek môkup me ukot eyi kan̄.