Read obolo Asaya 40 Bible Online

Asaya 40 - obolo bible

Asaya 40

¹Awaji kinyi ìtumu ibe, “Ìkat ebi n̄a ejit! Ìkat ema ejit!

²Ìtumu ikọ ìtap ebi Jeruselem me ejit, ìlook ema ibe ke akọn̄ òkitim ema me lek îta, ke mîra ikpe mkpukpe ibot ijo inu kiban̄ isan̄a, ke ema mîbọkọ osusut me ubọk Okumugwem itoon̄ urot, mije ijo inu kiban̄.”

³Ida ge òkitaan̄ ukpo ibe, “Ìnen̄e oniin̄ ìsun̄ me emen èwê ìnyi Okumugwem, ìrọ oniin̄ òtatat me emen èwê ìnyi Awaji kiji.

⁴Mêtọm otutuuk iteke geelek ibene, mè igbugbọ otutuuk ogoon̄ geelek mè orioon̄ geelek isiki, mêkwaak ijọn̄ geelek òkup kpunukpunukpunu, inyi irọt, mè ibak ere geelek òkup okpurukpu okpurukpu, inyi inyana.

⁵Mgbọ ya, mêchili ujamgbugbo Okumugwem ibook, inyi otutuuk ebilene mêgbaan̄ imun̄ lek; mije, Okumugwem osa otu kan̄ itumu.”

⁶Ida ge ìbe, “Taan̄ ukpo!” Emi mbebe, “Ǹtaan̄ ukpo m̀bebe?” “Taan̄ ukpo be, ‘Otutuuk ebilene ekup kubọk mbubet, uja kiban̄ ìbet lek uja ajakajak otu oron.

⁷Mbubet môchiaak, ajakajak môgegen̄ igwook, mije, Okumugwem okifuuk efuuk igwook ema me lek. Me atikọ, ebilene ìre mbubet.

⁸Mbubet môchiaak, ajakajak môgegen̄, ire, ikọ Awaji kiji ìbokukup ire mgbọ geelek.’ ”

⁹Owu ogwu òsa ata etip inu me Sayọn, nene inyọn̄ ogoon̄ si look. Owu ogwu òsa ata etip ijet Jeruselem, bene ida kwun̄ taan̄ ukpo look; bene ida, katet ukpook; tumu nyi ebi ama cha òkup me Juda ibe, “Ìkpọ, Awaji kinyi ire ogwu.”

¹⁰Ìkpọ, Ogwukaan̄-ene Okumugwem òkinu melek unye, ìkisa unye eyi ubọk kan̄ ikpulu. Ìkpọ, îsa mkpukpe kan̄ igbaalek inu, mkpukpe ubọk ikwaan̄ kan̄ ìkukup me isi kan̄.

¹¹Ọmọ môkpukpo arọọn̄ kan̄ kubọk ogwu òkpukpo arọọn̄; môsa ubọk kan̄ ikpulu bọn arọọn̄ kan̄ ititiin̄ isun̄, mè ibeen̄ ema ikọọk me isi ejit; môsa echi òkaan̄ bọn ikije ususuk.

¹²Ìre ekene orak isa akajit ubọk kan̄ itọ mun̄ òkup me okwaan̄, mè ìre isa agbagba otubọk kan̄ itọ akpa isinyọn̄? Ekene orak isa okwun iroon̄-inu iroon̄ achiaan̄ òkup me linyọn̄, mè ìre isa okwukwut itọ-inu itọ ulobo ebi kè ogoon̄ melek orioon̄?

¹³Ìre ekene ojeen̄ Ekwukwu Okumugwem inu ìborọ, sà ìre ekene ore ogwu nteme kan̄, ogwu òkinyi ọmọ nteme?

¹⁴Ekene ke Okumugwem ogọọk inin̄ oru, mè ibọkọ nteme me otu? Ekene ojeen̄ ọmọ ubọk ekirọ inu ònenen? Ekene ojeen̄ ọmọ ifuk-ibot, mè ijeen̄ ọmọ ubọk ekisa ikaan̄ ngobo-ntet?

¹⁵Me atikọ, me lek Okumugwem, otutuuk ido linyọn̄ egbaan̄ ikup kubọk otu mun̄ ge erọn̄ọbe kpọm itap me ugọn̄ mun̄; mè ikup kubọk mfuun̄ ikike me inyọn̄ alala itọ-inu; me ubọk kan̄, otutuuk achọ linyọn̄ egbaan̄ ikup kubọk mfuun̄ ikike.

¹⁶Otutuuk iye oron Lebanọn ìkaso isasa isọk ukan̄ me inyọn̄ ntook, otutuuk anam òkup me oron ya si ìkasoso inu ebesa igwa ngwugwa ewọwọp iriọk.

¹⁷Me isi kan̄, otutuuk ido linyọn̄ ìkakup me lek inu geege, ìmọnọ ema kubọk ukpọk ukpọk inu ikike, eyi ikakukupge me lek inu geege.

¹⁸Ekene ke owu obosa Awaji itọ me lek? Ìre mbet keke ke owu môsa ọmọ itọ me lek?

¹⁹Ire me lek mkpọmfaka, ogwu usọ ikwaan̄ ubọk otọkọ, mè isa alata araran̄ igwook ichit lek, mè irom mkpọn alata okuket ijeen̄ me lek.

²⁰Ogwu ògbọgbọọn̄ enenen ikọkọt inyi uche òkup ikeya, ìkigobo uti eyi kpojọbe, mè isi iweek ogwu usọ ikwaan̄ ubọk, ogwu òrọriọọn̄ ikwaan̄, ibe isa uti ya ikọ mkpọmfaka eyi kponan̄abe irọn̄.

²¹Ìre enyi kperiọọn̄? Sà ìre enyi kpenọnọ ni? Ìre kpewuwuuk lek ikpa inyi enyi me ibebene? Sà ìre enyi kpegobo itet karake linyọn̄ osibibe?

²²Îre Awaji okweek me ogboon̄ ubọọn̄ me inyọn̄ okwuun̄ òkana linyọn̄ okokop, ebi ìkup me linyọn̄ ekup kubọk akaka. Îre ọmọ ochili akpa isinyọn̄ iwele kubọk ekwut ugbaka, mè iyat isinyọn̄ iwele kubọk uwu ọfọ ekinin̄ emen iluk.

²³Îre ọmọ okirọ inyi ebi ibot ekayaka ìkup me lek inu geege, mè irọ ebi mkpulu linyọn̄ keyi ekana ukpọk ukpọk ife ikike.

²⁴Kpewowop ema isan̄a me ubọk, kpedada-nu ntitaak ichit ema me ijọn̄ isan̄a, ema kpetitibi-nu ugwun̄-ijọn̄ itet ijọn̄, Awaji owuwut efet igwook ema me lek, ema echachiaak ita, egwijo okwọkwọọk ema ije kubọk nchat mbubet.

²⁵Ogwu Mbuban ìbe, “Ìre ekene ke enyi ebesa emi itọ me lek? Sà ìre ekene melek n̄a ere ìkike?”

²⁶Ìbene chieen̄ kinyi ìfo inyọn̄, mè ìkpọ-nu akpabin inyọn̄. Ìre ekene orom inu kechicha? Ogwu òsasan̄a urum ebi kè ntoronyan̄ isibi me ge me ge, mè inyi ema erieen̄ me ge me ge. Sa me ubọk unye kan̄ ominbe ire, mè sa me ikpele unye oguga îkaan̄be, kpunu geege me lek kiban̄ ònanan̄a ichep.

²⁷Owu Jekọp, òrere si Ijeren, keke orọ mè òtumu òbe, “Irek n̄a îlet me lek Okumugwem, Awaji ìkakpọ chieen̄ me lek unen n̄a”?

²⁸Ìre owu òkariọọn̄? Sà ìre owu òkanọnọ ni? Okumugwem ìre Awaji ogwu òkup mgbọ geelek; ọmọ orom okputut ere geelek me linyọn̄; efuuk ìkakita ọmọ me owot, lek kan̄ ìkakiwọ, ngobo-ntet kan̄, ene geege ìkpokọt iweek iriọọn̄.

²⁹Ebi lek owọbe, ọmọ okinyi ema efuuk; ebi kpekaan̄ unye, ọmọ okinyi ema unye.

³⁰Efuuk ìkekita me owot nsabọn irieen̄, mè lek kiban̄ òwọ, ogbaragbat ebirieen̄ ekekigbugbe, mè erurọn̄ọ.

³¹Ire, ebi ìtoon̄ Okumugwem ejit me lek, efuuk kiban̄ ìbokire ayaya ayaya. Ema mêwulu me uwop ifo inyọn̄ kubọk igo, ema mêlibi ekot, efuuk ìkpotet ema; ema mêje ije, lek ìkpowọ ema.