Read obolo Asaya 43 Bible Online

Asaya 43 - obolo bible

Asaya 43

¹Ire, mgbọ keyi, Okumugwem ogwu òrorom owu Jekọp, ogwu òbobot owu Ijeren, ìtumu ibe ikeyi, “Katet ukpook, mije, nra ifaka owu isibi; ǹgwegwen owu me erieen̄ kwun̄; owu ìre eyi n̄a.

²Mgbọ owu osikije itibi emen mun̄, emi mâkup melek kwun̄; mgbọ owu osikije itibi okwaan̄, okwaan̄ ìkpomeen̄ owu. Mgbọ owu osikije itibi ukan̄, ukan̄ ìkpowọp owu, alọm kan̄ si ìkpotataka owu.

³Mije, emi nre Okumugwem, Awaji kwun̄, Ogwu Mbuban ebi Ijeren, Ogwu Unyan̄a kwun̄. Nsa ebi Ijipiti inwene ibot kwun̄, mè isa ebi Etiopia[20] mè ebi Seba ito me useen̄ kwun̄.

⁴Mije owu onyebe otu ewe, mè ikaan̄ umin me chieen̄ n̄a, emi me lek n̄a mma owu, emi mâsa ebilene inyi me ibot kwun̄, mè inyi esese ife me ibot ugwem kwun̄.

⁵Katet ukpook, mije, emi òwa melek kwun̄. Mâsa bọn kwun̄ me agan̄ mbum-ura ika inu, mè ikpulu enyi me agan̄ ichep-ura inititiin̄.

⁶Mâtumu inyi ebi agan̄ inyọn̄ ibe, ‘Ìyaka ema ìnyi!’ mè itumu inyi ebi agan̄ osiki ibe, ‘Ikayaka ìtet ema ìkaan̄!’ Ìsa bọn n̄a ebirieen̄ me ujọn̄ọ ere ìka ìnu, mè ìsa bọn n̄a ebibaan̄ me okputut linyọn̄ ìka ìnu.

⁷Ìsa otutuuk ebi geelek ìkichieek erieen̄ n̄a ìnu, ebi emi nrombe bak me lek umin n̄a, ebi emi mbotbe, mè irọ isibi.”

⁸Ìsa ebi ìkaan̄ chieen̄, ire, kpekimọọn̄ inu, ìsibi ìnu, mè ebi ìkaan̄ utọn̄, ire, kpekinọ ikọ.

⁹Ebi otutuuk ido geelek mîgbaan̄ ititiin̄, ebi ife geelek mîgbaan̄ ikup. Ekene kiban̄ owuuk lek itumu inu chi òkirọ, mè ikpa inu echi òrọrọ iraka inyi eji? Ema esa ebi ata-ikọ kiban̄ enu, inyi enebieen̄ ema enye, mè ebi ofifi ene enọ, mè etumu ebe ke îre atikọ.

¹⁰Okumugwem onenitumu ibe, “Enyi ere ebi ata-ikọ n̄a, mè ebi ikwaan̄ n̄a ebi emi ngobobe, inyi enyi mêriọọn̄, mè ichieek me lek n̄a, mè igobo itet ibe ke emi nre ene ya. Sabum emi, kpunu awaji geege òkukup, me udun̄ n̄a, kpunu si geege òbokukup.

¹¹Emi, iin̄ emi, nre Okumugwem, ilọ me lek n̄a, kpunu ogwu unyan̄a.

¹²Emi nchili ibook, mè inyan̄a, mè ikpa isibi, ìkare ofifi awaji cha òkup me etete kinyi. Enyi ìre ebi ata-ikọ n̄a ibe ke emi nre Awaji. Emi Okumugwem ntumu.

¹³Bene me karake akat, emi nre Awaji. Kpunu ogwu òbokọt inyan̄a ene isibi me ubọk n̄a. Nsirọ inu, kpunu ogwu òbokọt inwene.”

¹⁴Emi Okumugwem, Ogwu Òfafaka enyi Isibi, mè Ogwu Mbuban ebi Ijeren ǹkitumu inyi enyi ibe: “Mije kinyi, emi mâria urum akọn̄ ibe esi etim akọn̄ me Babilọn, mè ikpulu otutuuk kiban̄ ika kubọk ebi mkpat akọn̄; uji ile ema ekisa itaan̄ ukpo igugo lek cha ke ebesa ikpulu ema.

¹⁵Emi nre Okumugwem, Ogwu Mbuban kinyi, emi nrom Ijeren, emi nre Ogwu Ubọọn̄ kinyi.

¹⁶“Emi nre Okumugwem, ogwu òrọrọ oniin̄ itibi emen okwaan̄, ogwu òrọrọ oniin̄ itibi emen uga mun̄ okwaan̄ ile.

¹⁷Emi nre ogwu òtataba ebi uji akọn̄ mè ebi akọn̄ inyọn̄ inyinya isibi, mè itaba si urum akọn̄ mè ebi usọ akọn̄ kiban̄ inigwook, ema otutuuk egbagbaan̄ ililam ibia me ijọn̄, kpebeyaka ikọt inan̄a ikeke; ewuwut ema iniin̄ dìp dìp kubọk mkpukan̄.

¹⁸Emi Okumugwem ogwu òrọrọ inu chi ǹkitumu inyi enyi ibe, ‘Ìwuuk inu echi òraraka, ìsan̄a ejit me lek inu echi ukot oka mgbọ cha.

¹⁹Ìkpọ, emi gwa ǹkirọ ayaya inu! Îbebene ikisibi utoon̄ mgbọ keyi; ìre enyi kpemun̄ ni? Emi gwa ǹkirọ oniin̄ me emen èwê, mè ikibum okwaan̄ me lek ijọn̄ òchachat.

²⁰Ebi kè anam oron mêkinyi emi ulibi, ebi kè ibo oron afa melek ebi kè wukuwuku; mije, ntap mun̄ me emen èwê, mè ibum okwaan̄ me ijọn̄ òchachat, isasa inyi ebi n̄a, ebi ngobobe, mudim mè enwọ.

²¹Emi nsan̄a ema isibi inyi lek n̄a, ibe ema eketumu itọn̄ n̄a esibi.’

²²“Ire, owu Jekọp, òrere si Ijeren, òkakitọbọ ebum ìnyi emi, kpan̄asi ikeya, efuuk îta owu me owot me lek n̄a.

²³Owu òkasa arọọn̄ ìnigwa ngwugwa ewọwọp iriọk ìnyi emi, òkagwagwa ngwugwa geege ìsa ìnyi emi umin. Ǹkanyi owu saasaak ibe owu ònogwa ngwugwa akpa ònyi emi, ǹkadodo si ibe owu òwọp nsensi ònyi emi, inyi efuuk ikata owu me owot.

²⁴Owu òkasa ikpoko ìlep nsensi utop olu ìjet emi, òkagwagwa si ngwugwa okpọn̄ òjojot emi owot. Ire, owu onenikisa ijo inu kwun̄ ikisisaak emi, mè ikisa nrọ-nlọ kwun̄ irọ ibe efuuk ita emi me owot.

²⁵“Emi, iin̄ emi, me lek n̄a nre ogwu òkitetele nrọ-nlọ kwun̄ sa mije n̄a gaalek, emi m̀kpayaka ikeek ijo inu kwun̄ ofifi.

²⁶Keek emi nu, inyi eji egbaan̄ etap chieen̄ ekpọ; kpa otu ikọ kwun̄ nu sa jeen̄ ibe ubọk kwun̄ îtana.

²⁷Bene me ibebene, ebi nte nte kwun̄ mîrọ ijo inu; ebi ibot ìkitumu ikọ ibot kwun̄ mîkpaka ibot inyi emi.

²⁸Eya orọ, mâtap ebi ibot Uwu Mbuban esip me isi, mè iyaka Jekọp inyi ibe ejijaka esan̄a kpai, mè Ijeren inin̄ me ochak.