Read obolo Asaya 44 Bible Online

Asaya 44 - obolo bible

Asaya 44

¹“Ire, mgbọ keyi, Jekọp gwun̄ ikwaan̄ n̄a, gban̄ utọn̄, owu Ijeren, ogwu emi ngobobe.

²Emi nre Okumugwem ogwu òrorom owu isibi, ogwu òbobot owu me emen owot, mè ogwu òbotap ubọk inyi owu. Emi Okumugwem ogwu òrọrọ inu chi nkitumu ibe ikeyi: ‘Owu Jekọp, gwun̄ ikwaan̄ n̄a, katet ukpook, Jesurun, ogwu emi ngobobe.

³Mije, mâgwook mun̄ me inyọn̄ nchat ijọn̄, mè ibum ibot mun̄ me lek ijọn̄ òchachat. Mâgwook Ekwukwu n̄a me lek bọn kwun̄, mè igwook ugbana n̄a me lek ebi owot iman kwun̄.

⁴Bọn kwun̄ mêtitibi isibi kubọk mbubet ere mun̄ owabe, mè ikup kubọk uti wilo òkup me agba ibot mun̄ òkigbugbuk.

⁵Ene ge môbe, “Okumugwem okaan̄ emi;” ofifi ene môsa erieen̄ kè Jekọp igwen lek kan̄; ene ge si môge me lek ubọk kan̄ ibe, “Eyi kè Okumugwem,” mè ikichieek erieen̄ kè Ijeren.’

⁶“Okumugwem, Ogwu Ubọọn̄ ebi Ijeren, mè Ogwu Òfafaka ema Isibi, Okumugwem Ogwukaan̄ Inyọn̄ mè Ijọn̄ ìtumu ibe ikeyi: Emi nre adasi, emi nre òta; ilọ me lek n̄a, kpunu Awaji.

⁷Ìre ekene obet lek n̄a? Ene ya itumu ma. Ọmọ inikpa ma me isi n̄a, mè ikigo-nu inu òbọbọkọ irek karake nsun̄be ebilene me ukot ikaan̄; mè itumu si inu echi òbonunu, iin̄, ọmọ itumu-nu inu echi òbonu me isi.

⁸Ikafieek owot, ikatet ukpook. Ìre emi ǹkatumu inu yi ìnyi enyi, mè ìkpọk mbum ìnyi enyi karake akat? Enyi ìre ebi ata-ikọ n̄a. Ìre îkaan̄ Awaji òkukup isan̄a me lek n̄a? In̄-in̄, kpunu ofifi Ewuuk geege òkukup; ǹkariọọn̄ kubọk ge.

⁹Ebi ìkirọ mkpọmfaka kpekup me lek inu geege, mkpọmfaka cha òmimin ema me lek enenen ìre inu ikike; ema ìre ebi ata-ikọ ibe ke îre ikeya. Ema cha kpekimọọn̄ inu geege, kpenọ lek, eya orọ, esip ìbotetet ema.

¹⁰Ìre ekene okọ awaji, mè itọkọ mkpọmfaka, eyi kponin̄be ọmọ oruru geege?

¹¹Esip ìbotetet ebi ìkitọbọ ebum inyi mkpọmfaka; ebi usọ ikwaan̄ cha ìre ebilene ikike. Otutuuk kiban̄ esibi-nu enetitiin̄, mè ekeke ekpọ; ukpook mè esip ìbogbagbaan̄ ema otutuuk itet iso.

¹²“Ogwu usọ okwukwut osa nroon̄ ikwaan̄ kan̄ irọ mkpọmfaka; ìtatap me ukan̄ ikala, mè isa abaracha ibọn̄ ike îweekbe ibe ikup. Unye oguga kan̄ ke îsa isi ikwaan̄ me lek. Uraafiọọn̄ otetet, efuuk otata ọmọ me owot, ìkanwọ mudim geege, lek owọwọ.

¹³Ogwu usọ uti ìsasa olik itọ-inu itọ uti, mè isa ndun̄ igwat ike mkpọmfaka ya obokup; mè inisa otut itibi, mè isa otitọ ekisa itọ inu okokop itọ, mè inibala mkpọmfaka ya ibet lek ebilene, me otutuuk uja ebilene, inyi inikup me isi yọk.

¹⁴Ọmọ ìchochon uti olik igwook inyi lek kan̄, mè ìre igobo uti siperes mè ìyaka ire uti ilip isun̄, mè itele inyi igọọk uti oron kechilọ ikitibi imiin̄. Ọmọ môkọt iwop si uti olik, mè ibot orọ inyi itibi.

¹⁵Usini me lek uti cha onenire iye ebilene mêsabe isọk ukan̄; ọmọ mônenisa usini me lek isọk ukan̄ igwele, mè isa isọk ukan̄ iwọp fituru. Ire, îsa usini si ikọ awaji, mè ikitọbọ ebum inyi; îsa irọ mkpọmfaka, mè ikilaak inyana me ijọn̄ inyi.

¹⁶Îsa okpọkọ me lek uti ya isọk ukan̄, mè item inorie kan̄ me lek, mè iwọp anam kan̄ itaka ijot owot, mè igwele si ukan̄ ya iyok lek, mè ibe, ‘Jei, lek îyok emi! Mmun̄ lek ukan̄!’

¹⁷Inenisa uti òsisik ikọ awaji, òrere mkpọmfaka kan̄; mè igele ibot ikwuun̄ me isi, mè itọbọ ebum inyi, mè ikiriaak uriaak inyi ibe, ‘Nyan̄a emi! Owu ore awaji n̄a!’

¹⁸Ema kperiọọn̄ inu geege, kpekọt igobo inu geege itet; mîchọkọ ema chieen̄ ichit, ufuna ema ekamọọn̄ inu, mè igon ema ejit igọm, inyi ema ekakọt ìgobo inu ìtet.

¹⁹Ene geege ìkakeek inu geege me ejit kan̄, kpunu ogwu òkakaan̄ ifuk-ibot mè ìre ngobo-ntet itutumu ibe, ‘Okpọkọ me lek uti yi ke nsa isọk ukan̄, mè iwọp fituru me lek mbubuuk ukan̄ kan̄, mè iwọp anam me lek, mè itaka. Ìre emi m̀bayaka inisa uti eyi òsisik irọ òchichaka inu ni? Sà ìre mgbidim uti ke emi mbagele ibot ikwuun̄ inyi?’

²⁰Ene ogwu òkirie ntọn̄, ogwu ejit kan̄ ofiaan̄be ifiin̄, ìkpokọt inyan̄a lek kan̄, ìkpokọt itutumu ibe, ‘Inu yi ntetbe ikaan̄ me ubọk agan̄ ulom n̄a, ìre ikare ofiaan̄?’

²¹“Owu Jekọp, keek inu chi, mije, owu Ijeren, owu ìre gwun̄ ikwaan̄ n̄a. Emi nrom owu, owu ìre gwun̄ ikwaan̄ n̄a. Owu Ijeren, emi m̀kpawuuk owu.

²²Nra itutuku nrọ-nlọ kwun̄ isan̄a kubọk oduku inyọn̄, mè ichan ijo inu kwun̄ ininiin̄ ichieen̄ ita kubọk àbaan̄. Gwu kom na me lek n̄a, mije, emi nra ifaka owu isibi.

²³“Owu akpabin inyọn̄, kọt okwa nwọọn̄ unwọọn̄, mije, Okumugwem îrọ isan̄a! Owu, ere òdọdọk ichit me linyọn̄, bene ida taan̄ ukpo! Ebi kè ogoon̄, ìdimi okwa, enyi ebi kè oron mè otutuuk uti geelek òkup me emen kinyi! Mije, Okumugwem îfaka Jekọp isibi, mè ijeen̄ umin kan̄ sa me lek kè Ijeren.”

²⁴Okumugwem, Ogwu Òfafaka enyi Isibi, ogwu òbobot owu me emen owot, ìtumu ibe ikeyi: “Îre emi Okumugwem nrom otutuuk inu, emi gaalek ndut akpabin inyọn̄ inyana ichak, emi me lek n̄a nyat linyọn̄ iwele isaak.

²⁵Îre emi nkitọp otu ikọ ebi nriran ataak ikana ikaak, mè irọ ebi ìdo inu ekana mbubut; emi nkirọ ebi ìriọọn̄ inu ekana ndide, mè ikirọ ifuk-ibot kiban̄ ikana mbubut.

²⁶Ire, emi nkirọ otu ikọ ebi ikwaan̄ n̄a inye, mè ikirọ inu geelek ebi nriabe etip etumube irọ iso. “Emi ntumu ikọ ofolek Jeruselem ibe, ‘Mêluk me emen kan̄,’ mè itumu ofolek ama ebi otoko kè Juda ibe, ‘Mêkpọk ema inama, emi mâkpọk inama ǹrioon̄ ama cha ibene, ubọk îkupbe me adasi mgbọ.’

²⁷Emi nkitumu inyi ugwuuk okwaan̄ ile ibe, ‘Chiaak! Emi mârọ otutuuk okwaan̄ kinyi ichiaak isan̄a.’

²⁸Emi ntumu ikọ ofolek kè Sarọs ibe, ‘Ọmọ ìre ogwu òkpukpo arọọn̄ n̄a, otutuuk inu geelek òkup emi me ejit, ọmọ ìborọrọ iso.’ Ọmọ môtumu ikọ ofolek Jeruselem ibe, ‘Ekpọk enama!’ Òfo me lek Uwu Mbuban, môbe, ‘Etọbọ ọdọ kan̄!’ ”