Read obolo Asaya 45 Bible Online

Asaya 45 - obolo bible

Asaya 45

¹“Emi Okumugwem ntumu ikọ inyi Sarọs ogwu ntọkọbe aran̄ me ibot, ogwu ntetbe ubọk agan̄ ulom kan̄ inye isasa itim ikpan̄ ebi ido geelek me isi kan̄, mè ibọkọ ebi ubọọn̄ nroon̄ akọn̄ kiban̄, mè igwuku isotu geelek ibook me isi kan̄, inyi otunchit geege ikayaka ìgon ìchit. Emi ǹtumu ìnyi ọmọ ibe ikeyi:

²Emi me lek n̄a mbaje me isi kwun̄, okpurukpu ijọn̄ geelek, m̀bababak isan̄a, inyi ilaak; otunchit ekwe geelek, m̀bagbugbugbọ igwook, olọkọrọ okwukwut geelek, m̀basọsọp ifaan̄ igwook.

³Mânyi owu inu ubọọn̄ cha esun̄be me ere ndudun, mè inyi owu inu unye otu ewe elileekbe me ere nlelet, inyi owu môriọọn̄ ibe ke emi, Okumugwem, ogwu ògwegwen owu me erieen̄ kwun̄, ke emi nre Awaji ebi Ijeren.

⁴Mije kè Jekọp gwun̄ ikwaan̄ n̄a, mije kè Ijeren ogwu emi ngobobe, emi ǹgwegwen owu me erieen̄ kwun̄, mè inyi owu erieen̄ umin, ubọk geelek owu òkariọọn̄ emi.

⁵Emi me lek n̄a nre Okumugwem, kpunu ofifi; isan̄a me lek n̄a, kpunu Awaji. Emi mâtobo owu ekwut inye me ebon, ubọk geelek owu òkariọọn̄ emi,

⁶inyi bene me agan̄ mbum-ura si re agan̄ ichep-ura, ebilene mêriọọn̄ ibe ke kpunu Awaji, ilọ me lek n̄a. Emi me lek n̄a nre Okumugwem, kpunu ofifi.

⁷Emi nnyi utoon̄, mè irom udun, emi nkirọ inu ije ijaan̄, mè ikirom ùrioon̄; îre emi Okumugwem nkirọ otutuuk inu chi geelek.

⁸“Owu akpabin inyọn̄, rep ata irọrọ gwook kubọk ibot; owu oduku inyọn̄, rurọn̄ọ ata irọrọ gwook! Owu linyọn̄, chili book, inyi unyan̄a itibi iwọọk isibi; inyi ata irọrọ melek unyan̄a egbaan̄ etibi esibi! Emi Okumugwem nrom ema.

⁹“Môfieek inyi ogwu òtoto ibaak me lek Ogwu Òrom ọmọ; ọmọ ìre sọntiik okpọkọ ugọn̄ ge me etete ogbogbo okpọkọ ugọn̄ òjojot otutuuk lek ijọn̄. Ìre arika môsan̄a amọn ido ogwu òbot ugọn̄ ibe, ‘Òkibobot keke?’ Sà ìre ikwaan̄ ubọk kwun̄ môkọt itumu inyi owu ibe, ‘Òkakaan̄ ubọk me lek’?

¹⁰Môfieek inyi ogwu òtutumu inyi ogwu ute ibe, ‘Keke ke owu obon ikeyi?’ mè ìre ogwu òbe ogwu uga, ‘Keke ke owu oman ikeyi?’

¹¹“Okumugwem Ogwu Mbuban ebi Ijeren, mè Ogwu Òrorom ema ìbe ikeyi: Ìre kpasi unen ke enyi ekaan̄ idodo emi ikọ òfo me lek inu òkup me isi? Sà ìre enyi ebekitọ ikọ inyi emi me lek nsabọn n̄a melek ubọk ikwaan̄ n̄a ni?

¹²Îre emi me lek n̄a nrom linyọn̄, mè irom ebilene ito me lek. Emi nsa ubọk n̄a idut akpabin inyọn̄ inyana ichak, mè ikitọ ikọ inyi otutuuk urum inu geelek òkup me lek kan̄.

¹³Emi me lek n̄a mbasa me ata irọrọ n̄a ijibi Sarọs ibene; mârọ otutuuk oniin̄ kan̄ itat. Ọmọ môkpọk ama n̄a inama, mè iria ebi n̄a, ebi ìlibi mkpat akọn̄, ibe efon me ikike, ìkpodo mkpukpe, ìkpodo ikpoko udun̄ geege. Emi Okumugwem Ogwukaan̄ Inyọn̄ mè Ijọn̄ ntumu.”

¹⁴Okumugwem îtumu si ibe, “Ebi uko Ijipiti mè ebi mbit Kus, mè ebi Saba, ife ujọn̄ọ ile cha, mênu me lek kinyi, mè ikana ebi kinyi; ema mêkije igọọk enyi me udun̄ mè mkpọn me ukot egugọbọbe. Ema mêkigele ibot ikwuun̄ inyi enyi, mè ikiriaak enyi ibe, ‘Me atikọ, Awaji òwa melek kinyi, kpunu ofifi; kpunu ofifi awaji geege.’ ”

¹⁵Me atikọ, owu ìre Awaji ogwu òsun̄ lek kan̄ me nlelet, owu Awaji ebi Ijeren, owu ìre Ogwu Unyan̄a!

¹⁶Esip môtet otutuuk ebi ìkirom mkpọmfaka, iin̄, ochak môchak ema; ema otutuuk mêgbaan̄ irie esip iso.

¹⁷Ire, Okumugwem mônyan̄a ebi Ijeren, unyan̄a ìbonyan̄a ema ìre unyan̄a eyi kpotabe; esip ìkakaan̄ mgbọ itetet ema, kpeberọ ema inu esip mege ire mgbọ geelek, mgbọ geelek.

¹⁸Mije, Okumugwem orom akpabin inyọn̄; ọmọ ore Awaji, ogwu òrorom linyọn̄, mè irọ ibe ikup, ogwu òrọrọ ibe ikeke inye; ìkarom ibe ire ukpọk ukpọk, ire, ìrom ibe eluluk me lek. Okumugwem ìtumu ibe: “Emi nre Okumugwem, kpunu ofifi.

¹⁹Emi ǹkatumu ikọ me nlelet, me ere ge me lek ijọn̄ òkup me emen udun. Ìkare me ikike ke ntumu inyi ebi owot iman kè Jekọp ibe, ‘Ìweek emi.’ Emi, Okumugwem ǹkitumu ikọ ata irọrọ; ǹkikpa inu òtatat.

²⁰“Ìgbaan̄ ìtitiin̄, mè ìna; enyi ebi ido geelek ìlilibi inwọnọ, ìtitiin̄. Ebi ìkibeme mkpọmfaka esabe uti ikọ ikana ere, ebi ìkiriaak awaji echi ìkpokọt inyan̄a ene, ife cha kperiọọn̄ inu geege.

²¹Ìkpa-nu inu òbobọkọ irek; ìsan̄a ibot ikọ kinyi ìsibi; ìgbaan̄ ibot ìsọk. Ìre ekene owuuk lek itumu inu chi me ujọn̄ọ mgbọ òraraka? Ekene okpa isibi karake akat? Ìre ìkafat ìre emi Okumugwem? Kpunu Awaji geege, ita me lek n̄a; emi ìre Awaji òkirọ inu ònenen, mè ire Ogwu Unyan̄a; kpunu ofifi, ilọ me me lek n̄a.

²²“Enyi otutuuk ebi ìkup me okputut linyọn̄, ìgwu ikom ìna me lek n̄a, ufuna ǹnyan̄a enyi; mije, emi nre Awaji, kpunu ofifi òkukup.

²³Emi nsa lek n̄a inyan̄a ibot; ata ikọ onan̄a emi me otu isibi, ikọ eyi kpebekọt ifaan̄: Akpatukot geelek môgwook ekpe inyi emi, otu alọm geelek ìbosa emi inyan̄a ibot.

²⁴Ema mêtumu ibe, ‘Me emen Okumugwem gaalek ke ata irọrọ mè unye okup’ ” Otutuuk ebi ìnanaan̄ ejit ikeme ọmọ, mênu me lek kan̄, esip môgagak ema isi.

²⁵Me emen Okumugwem, otutuuk owot iman ebi Ijeren mêkana ebi ata irọrọ, mè ikigugo lek.