Read obolo Asaya 47 Bible Online

Asaya 47 - obolo bible

Asaya 47

¹“Sibi ijọn̄, kweek me achiaan̄, owu ama Babilọn; siki kweek me ukpọk ijọn̄, 10 ke owu onan̄a me ogboon̄ ubọọn̄, owu ama ebi Kalidia. Kpebeyaka ikpọk ikigwen owu ogwu nsek, mè ogwu òkup ufe ufe ofifi.

²Ben ewuuk ikọk-akpa, mè kọk akpa, kala ekwut ichit-lek san̄a me lek, chiaan̄ ekwut kwun̄ san̄a me lek ukot kwun̄, mè wook saba okolo cha.

³Mêmun̄ njak kwun̄, esip kwun̄ mônenikpọk mbum. Mârọ owu useen̄ ijo inu orọbe, kpunu ogwu mbakpọ isi.”

⁴Ogwu Òfaka eji Isibi, erieen̄ kan̄ ìre Okumugwem Ogwukaan̄ Inyọn̄ mè Ijọn̄, ọmọ ore Ogwu Mbuban ebi Ijeren.

⁵“Nin̄ emen udun riaan̄ otu siki kweek irek, owu ama ebi Kalidia; kpebeyaka ikpọk ikigwen owu nga uwu ebi owuwa ido ofifi.

⁶Emi nnaan̄ ejit ikeme ebi n̄a, mè ichaka mbuban me lek ebi nkaan̄be me ìrot; emi nkana ema itap owu me ubọk, ire, owu òkakaan̄ ema ejit nsan me lek. Ikerere ebi ìkakan me etete kiban̄, owu òsasa ulobo ikwaan̄ ikeme enenen.

⁷Owu òbe, ‘Emi mâre nga uwu ire mgbọ geelek.’ Owu òkawọlọ inu chi ìkpọ me ejit kwun̄, òkakekeek si ekiket ìbak inu inu chi obosa inu me mgburudun̄ mgbọ.

⁸“Eya orọ mgbọ yi, gban̄ utọn̄, owu ogwu barabat, ogwu òkup me utelelek, mè ikitumu inyi lek kwun̄ ibe, ‘Emi òwa, kpunu ofifi ene ilọ me lek n̄a. Emi m̀kpare nwakpa mgbọ geege, ǹkabarere si ogwu ǹkwaan̄ bọn!’

⁹Ire, inu iba chi mônitoon̄ owu mgbọ yaage, mè egwe usen ge gaalek. Owu môkaan̄ ǹkwaan̄ bọn, mè ikana si nwakpa òjot òjot, ubọk geelek owu okaan̄be yọk ofia ijot ere, mè ikaan̄ ikpele unye okisa itap ene èweke.

¹⁰Owu òsa inu ikpak kwun̄ itoon̄ ejit, mè ikitumu ibe, ‘Kpunu ogwu òmumun̄ emi.’ Iriọọn̄-inu kwun̄ mè ifuk-ibot kwun̄ îsa owu ije ilọ oniin̄, owu okekitumu inyi lek kwun̄ ibe, ‘Emi òwa, kpunu ofifi ene, ilọ me lek n̄a.’

¹¹Ùrioon̄ môtoon̄ owu, owu òkporiọọn̄ lek ibọk obosa iwut isan̄a. Ufialek môrọn̄ ikeme owu, owu òkpokọt isa inu inwene ibot ibe ifo. Mfufiat eyi owu òkporiọọn̄ môrọn̄ ikeme owu me uwuuk-lek.

¹²“Tet lek nye me lek itatap ene èweke melek owuwa yọk ofia kwun̄, eyi okimun̄ ukwook ikitọbọ ebum inyi karake orebe ijija. Usini mgbọ, owu môkaan̄ oruru me lek, usini mgbọ, owu môkọt isa itap ene ikpele urimi me lek.

¹³Owuwa nteme enyibe owu ìnitata owu efuuk me owot. Ebi ìkikpọ ntoronyan̄ mè ikibum ibot, ema enan̄a esibi enu ma; ebi ìkisa ntoronyan̄ ikpọk mbum inu òborọ me onyan̄ me onyan̄ cha; ngwa, ema enu-nu enenyan̄a owu esibi me ubọk inu òbonu inyi owu.

¹⁴Kpọ, ema ekup kubọk mfufe; ukan̄ ìbotataka ema iriọk. Ema kpebekọt inyan̄a lek kiban̄ isibi me unye otu alọm ukan̄ ya. Ukan̄ keyi ìkare mbubuk ukan̄ ebegwele iyok lek, ìkare si ukan̄ ebesiki ikweek irek igba.

¹⁵Ebi owu ogọọkbe ikinyam ewe karake ijija kwun̄ cha, otutuuk inu ema ebere inyi owu ire ya. Otutuuk kiban̄, ogwu ikup, oje ònin̄ agan̄ eyi kan̄, kpunu ene geege me etete kiban̄ òbokọt inyan̄a owu.”