Read obolo Asaya 48 Bible Online

Asaya 48 - obolo bible

Asaya 48

¹“Ìgban̄ ikọ yi, enyi ebi uwu kè Jekọp, enyi ebi ìkichieek erieen̄ kè Ijeren, mè inan̄a me ọgbọn̄ kè Juda isibi, enyi ebi ìkisa erieen̄ Okumugwem inyan̄a ibot, mè ikigwen Awaji kè Ijeren, ire, ìkare me atikọ mè ata irọrọ.

²Mije, ekigwen enyi bọn owot ama mbuban, enyi si ekibieen̄ lek me lek Awaji kè Ijeren, ogwu erieen̄ kan̄ orebe Okumugwem Ogwukaan̄ Inyọn̄ mè Ijọn̄.

³Inu cha òrọrọ iraka, emi mwuuk lek itumu isibi karake akat, sabum ema enirọ iso, emi nsa otu n̄a ilook, mè irọ inyi eriọọn̄; Me uwuuk-lek, nrọrọ inu mbarọ, inu cha ntumube isibi orọrọ iso.

⁴Mije, emi nriọọn̄ ibe enyi ìre ebi unye-ibot; nlik ebek kinyi ìnye kubọk okwukwut, sà okwut isi kinyi obet lek ekwe.

⁵Eya orọ ntumube inu chi inyi enyi karake ujọn̄ọ mgbọ òraraka; sabum ema enirọrọ, mwuuk lek ilolook enyi isan̄a, ufuna enyi ekatumu ibe, ‘Mkpọmfaka kiji orọ; awaji kiji cha echi ekọkọ mè echi ebobot, ema etọ ibe irọ.’

⁶Enyi mîra inọ inu kechi; ìkpọ otutuuk ìsi ìchak. Ìre enyi kpebechieek? “Bene me mgbọ keyi nyi isi, mâkpa aya inu inyi enyi, nlelet inu echi enyi kperiọọn̄-nu.

⁷Mgbọ keyi ke erom, ìkare mgbọ òjọjọn̄ọ; enyi kperarak inọ inu ofolek sabum cherekeyi. Eya orọ, enyi kpekọt itumu ibe, ‘Iin̄, mwuuk lek iriọọn̄ inu kechi.’

⁸Enyi kperarak si inọ, enyi kperarak iriọọn̄; karake akat, utọn̄ kinyi si ìkachili, mije, nriọọn̄ ibe ke enyi ìre atalek ebi ofiaan̄; bene me karake emen owot ke egwen enyi ebi òkpaka ibot.

⁹Bak me lek erieen̄ n̄a, nkeme unaan̄-ejit n̄a isiki; mije umin n̄a, ntet lek n̄a ikaan̄ me lek kinyi, inyi nkakpan̄ enyi ìsan̄a.

¹⁰Ìkpọ, ǹkakala enyi, ìkare kubọk alata okuket; nroon̄ enyi ikpọ me emen ukan̄ eyi ukwook.

¹¹Îre mije n̄a, iin̄, îre mije n̄a ke nrọ inu yi; emi m̀kpakọt itele ibe echaka emi mbuban me lek. M̀kpayaka umin n̄a inyi ofifi ene.

¹²“Owu Jekọp, gban̄ utọn̄, owu Ijeren ogwu emi ngwenbe inyi lek n̄a. Emi nre ene ya; emi nre adasi, emi si nre òta.

¹³Ubọk n̄a ke nsa itọbọ ọdọ linyọn̄; ubọk ulom n̄a oyat akpabin inyọn̄ iwele. Nsigwen ema, ema ekigbagbaan̄ inan̄a ikeke.

¹⁴“Otutuuk kinyi, ìgbaan̄ ìtitiin̄, mè igban̄ utọn̄: Ìre mkpọmfaka eyi owa otumu isibi ibe ke inu kechi môrọ? Sarọs, ogwu Okumugwem omọnọbe ima, ọmọ oborọ ebi Babilọn inu Okumugwem obenbe me ejit; ìbobebene ubọk kan̄ isulu ebi ido Kalidia osusut.

¹⁵Îre emi, iin̄, emi me lek n̄a ntumu; emi ngwen ọmọ. Emi mbasa ọmọ inu, ọmọ si ìborọrọ ikwaan̄ kan̄ itet.

¹⁶“Ìje igbet emi lek ìnigban̄ eyiyi: “Bene me ibebene, emi ǹkanwenween̄ lek ìtumu ikọ; mgbọ inu ya orọbe, emi me ere ya.” Me mgbọ keyi, Ogwukaan̄-ene Okumugwem oria emi, mè itap emi Ekwukwu kan̄ me emen.

¹⁷Okumugwem Ogwu Òfaka enyi Isibi, ogwu Mbuban ebi Ijeren ìtumu ibe ikeyi: “Emi ìre Okumugwem Awaji kinyi, ogwu òkijeen̄ enyi inu òbonin̄ enyi oruru, ogwu òkisa enyi ijeen̄ oniin̄ enyi ebeje.

¹⁸Mebe enyi mîgban̄ utọn̄ me lek inu ntọbe inyi enyi, esuuk kinyi kè mokibaak kubọk mun̄ obaak me okwaan̄, ata irọrọ kinyi kè mokibaan̄ kubọk ekoon̄ obaan̄ me okwaan̄ ile.

¹⁹Owot iman kinyi kè mowa kubọk achiaan̄ agba awaji, bọn kinyi kè memumana iwa kubọk nkwukwuuk achiaan̄; erieen̄ kiban̄ si, kpemefefieek isan̄a, kpemekpan̄ ema isan̄a me isi n̄a.

²⁰“Ìsibi ìtele Babilọn, ìlibi ìnan̄a me lek ebi Kalidia! Ìtaan̄ ukpo unwọọn̄ ìlook etip yi, ìkpa inu yi ìkana! Ìria ìsibi ìso ntutun̄ ere geelek me linyọn̄! Ìlook ibe ke Okumugwem îra ifaka Jekọp ogwu ikwaan̄ kan̄ isibi.

²¹Ebek ìkarak ema mgbọ îsabe ema ije itibi emen èwê; îrọ mun̄ igbuk me lek ewuuk isibi inyi ema; ọmọ ìbubum ewuuk, mun̄ ògbugbuk isibi.”

²²Okumugwem ìbe, “Esuuk geege kpunu inyi ebi ikpak.”