Read obolo Asaya 49 Bible Online

Asaya 49 - obolo bible

Asaya 49

¹Ìgban̄ utọn̄, enyi ebi lek achọ geelek; ìnọ ikọ keyi, enyi ebi ido ujọn̄ọ ere: Okumugwem ìgwegwen emi sabum enimaman emi; îriọọn̄ emi erieen̄ bene me mgbọ nkupbe me emen owot nga n̄a.

²Îrọ otu n̄a ireke kubọk oge akọn̄ òrereke, mè ilet emi me irak ubọk kan̄; îsa emi irọ oraan̄ ewatbe otu isọọk, mè ilet emi me emen akpa oraan̄ kan̄.

³Îtumu inyi emi ibe, “Ijeren, owu ìre gwun̄ ikwaan̄ n̄a, m̀basa me lek kwun̄ ikaan̄ umin.”

⁴Ire, emi nnenibe, “Kwulukwulu n̄a nkwukwulube ìchechep; otutuuk efuuk n̄a, mfiat isan̄a me lek inu ikike, mè lek inu ikakaan̄ge oruru. Ubọk geelek si, unen n̄a ìkup me ubọk Okumugwem, mkpukpe n̄a ìkup melek Awaji n̄a.”

⁵Me mgbọ keyi, Okumugwem ore ogwu òbobot emi me emen owot nga n̄a, ibe emi ǹnenre ogwu ikwaan̄ kan̄, mè ǹnensa bọn kè Jekọp ǹgwu ǹkom ǹka ǹjet ọmọ, mè ǹtitiin̄ ebi Ijeren ǹsa ǹnu me lek kan̄. Emi nkaan̄ umin me chieen̄ Okumugwem; Awaji n̄a, ọmọ ore unye n̄a.

⁶Okumugwem ogwu òrọrọ inu chi ìtumu ibe ikeyi: “Owu irere gwun̄ ikwaan̄ n̄a, mè ikpọk inama ebi otoko kè Jekọp, mè ititiin̄ ebi Ijeren ebi nsan̄abe isun̄ isa inu, otutuuk kecha ìre sọntitiik inu gaalek. Emi mârọ owu òre utoon̄ inyi ebi ido geelek, inyi owu môsa unyan̄a n̄a ijet ntutun̄ ere geelek me linyọn̄.”

⁷Okumugwem, Ogwu Òfaka ebi Ijeren Isibi, òrere Ogwu Mbuban ebi Ijeren, ìtumu inyi ogwu ebilene ekpọbe isiki chieen̄, ogwu ebi ido geelek ejọbe ejit me lek, ogwu òrere ogwu usun̄ inyi ebi mkpulu, ibe ikeyi: “Ebi ubọọn̄ mêmun̄ owu, mè inan̄a ikeke inyi owu umin, ebi ilile mêmun̄ owu, mè igele ibot isiki inyi owu ulibi, mije Okumugwem, ogwu ògbegbe utoon̄-ejit, mije Ogwu Mbuban ebi Ijeren, ogwu ògogobo owu.”

⁸Okumugwem ìtumu ibe ikeyi: “Me mgbọ òneneme emi, mâfọọk owu otu; me usen unyan̄a, mâtap ubọk inyi owu. Emi mâsun̄ owu, mè irọ owu òre inyan̄a-ibot ònyi ebi ido geelek, mè owu òyaka ijọn̄ ebi Ijeren ònyi ebikaan̄, mè òyaka ìrot kiban̄ cha ejijakabe isan̄a ònyi ema.

⁹Owu môtumu inyi ebi ìkup me mkpọn ibe, ‘Ìnan̄a ìsibi,’ mè itumu inyi ebi ìkup me emen udun ibe, ‘Ìsibi ìna me emen utoon̄!’ “Ema mêrie inorie me lek oniin̄, mè imun̄ urie me inyọn̄ ogoon̄ geelek òlalaak ukpọk.

¹⁰Uraafiọọn̄ ìkpotaka ema, ebek ìkporak ema, uyok emen èwê mè unye ura ìkpotet ema, mije, ogwu òkaan̄ njijin me lek kiban̄ obosa ema ije; ìbosa ema ije me agba lek ibot mun̄.

¹¹Mârọ otutuuk ogoon̄ ikana oniin̄, mè uga oniin̄ n̄a ibene ikeke.

¹²Ìkpọ, ife chi ebenan̄a me ujọn̄ọ ujọn̄ọ ere inu, usini kiban̄ ebenan̄a me agan̄ inyọn̄, usini me agan̄ ichep-ura, sà usini ebenan̄a me agan̄ Asuwan me osiki ido Ijipiti.”

¹³Akpabin inyọn̄, taan̄ ukpo nwọọn̄ unwọọn̄; linyọn̄, bele ejit; ebi kè ogoon̄, ìtaan̄ ukpo ìkọt okwa unwọọn̄! Mije, Okumugwem îkat ebi kan̄ ejit, môkaan̄ njijin me lek ebi kan̄ ebi ekitutuku.

¹⁴Sayọn ìbe, “Okumugwem îjit emi itele, Ogwukaan̄-ene îwuuk emi.”

¹⁵“Ìre uga môkọt iwuuk gwun̄ kan̄ òkinwọ ọmọ ebe me ejit, mè itele ikakaan̄ njijin me lek gwun̄ òsibi ọmọ me owot? Iin̄, môkọt iwuuk, ire, emi me lek n̄a m̀kpawuuk owu!

¹⁶Kpọ, ǹgege erieen̄ kwun̄ ikam me akajit ubọk n̄a; mgban kwun̄ ìkikukup me isi n̄a mgbọ geelek.

¹⁷Bọn kwun̄ mêkika inu ugwat ugwat, ebi ìjijijaka owu igwook mêsibi itele owu.

¹⁸Bene chieen̄ kwun̄, mè kpọ kana; bọn kwun̄ mîtitiin̄, mêkinu me lek kwun̄. Emi Okumugwem ntumu ibe ikeyi: Kè lek ugwem n̄a, owu môkpulu ema otutuuk inwunwan̄ ichit lek kubọk ujuja asi, mè igugọbọ ema ikam me lek kubọk aya nwa ogugọbọ asi ebek me ebek.

¹⁹“Ubọk geelek ibe mîkpukpuku ama kwun̄, mè ijijaka otutuuk igwook, mè irọ ijọn̄ kwun̄ ilaak ukpọk, me mgbọ keyi, ijọn̄ kwun̄ ìkpoyaka imin ita ebi kwun̄ lek; ebi ìgwagwak owu iche cha ebekup me ujọn̄ọ ujọn̄ọ ere.

²⁰Bọn cha emaan̄be mgbọ okupbe me ufieejit ǹkwaan̄ bọn me usun̄ akọn̄ mêtumu ire owu utọn̄ ibe, ‘Ere keyi mîsip, ìkayaka ìta eji lek, nyi eji ere sọkọ, inyi eji ekọt eluk!’

²¹Mgbọ ya, owu môtutumu me ejit kwun̄ ibe, ‘Ìre ekene omaan̄ ebibi inyi emi? Mfieek ejit ǹkwaan̄ bọn mè ora, elalap emi ito, mè ifiin̄ emi itele. Ekene okpukpo ebi isibi? Ìkpọ, emi gaalek nsik, ire, nsabọn chi, ìre owa ke ema enan̄a inu?’ ”

²²Ogwukaan̄-ene Okumugwem ìtumu ibe ikeyi: “Ìkpọ, mâbene ubọk igween̄ ebi ido geelek, mè ibene egop n̄a ijeen̄ ebi ife geelek; ema mêbeen̄ bọn ebirieen̄ kwun̄ ikọọk me otu ejit isa inu, mè ibeen̄ bọn ebibaan̄ kwun̄ itoon̄ me oguga isa ika.

²³Ebi ubọọn̄ ebere ute ìbekpukpo owu isibi kubọk bọn kiban̄, ebi nwa kiban̄ ebere uga ìbekibọọk owu. Ema mêgele igwook me ijọn̄ me isi kwun̄ inyi owu umin, mè ilaka achiaan̄ isan̄a owu me ukot. Mgbọ ya, owu môneniriọọn̄ ibe ke emi nre Okumugwem; ebi geelek ìtotoon̄ emi ejit me lek, esip ìkpotet.”

²⁴Ìre mêkọt itet ebi usọ akọn̄ ibọkọ inu ema efumbe, sà ìre mêkọt isan̄a ebi ekpulube me akọn̄ isibi me ubọk ebi ìtetet ema me akọn̄?

²⁵Ire, Okumugwem ìbe, “Iin̄, mêkọt ibọkọ ebi ekpulube me akọn̄ isan̄a me ubọk ebi usọ akọn̄, mè ibọkọ inu efumbe me akọn̄ isan̄a me ubọk ebi akọn̄ afa. Ire, ebi ìkitim owu etim me lek cha, îre emi me lek n̄a mbatim ema etim me lek, bọn kwun̄ si, emi me lek n̄a mbanyan̄a ema isibi.

²⁶Mârọ ebi ìkitutuku owu etaka anam akpalek kiban̄; ema mênwọ eje kiban̄ isa, kubọk enwọ aya miin̄. Mgbọ ya, otutuuk ebilene mêneniriọọn̄ ibe ke emi, Okumugwem, nre Ogwu Unyan̄a kwun̄, mè Ogwu Òfaka owu Isibi, mè Ogwu Unye kè Jekọp.”