Read obolo Asaya 5 Bible Online

Asaya 5 - obolo bible

Asaya 5

¹Mgbọ yi, mâkọt okwa inyi ogwu mmabe enenen, mâkọt okwa inyi ogwu mmabe ofolek uko gerep kan̄: Ogwu mmabe enenen îkaan̄ uko gerep, me inyọn̄ orioon̄ ere ijọn̄ okisibi inu.

²Îbak ijọn̄ ya, mè iteen̄ ewuuk isan̄a, mè iwop gerep eyi ònwọnwọn ichit. Înama uwu-oket inyi ogwu mbem me eden̄ uko ya, mè irọkọ ere ebekichimi miin̄ isibi me lek gerep. Inenikup ikikpọ chieen̄ ibe ke môto ata mfut gerep òkitotop, ire, ìyaka inito agburu gerep.

³“Mgbọ yi, enyi ebi ìluk me Jeruselem mè ebirieen̄ Juda, ìsibi-nu oyerebet keyi ìnyi emi melek uko gerep n̄a!

⁴Ìre keke ke marọ me lek uko gerep n̄a igak echi nrọbe? Ìre keke orọ îtobe agburu gerep me mgbọ nkikpọ chieen̄ ibe ke môto ata gerep?

⁵Mgbọ yi, mâtumu inu mbarọ uko gerep n̄a inyi enyi. Mâjibi ogọ mwakbe ikwek ọmọ isan̄a, inyi ọmọ ikana ere ebi kè anam ebekinitaka mbubet. Mâgbugbọ mgban nnamabe ikana ọmọ igwook, inyi ebi geelek ekenu enekejak ọmọ ekpukpuku eriọọk.

⁶Mâtele ibe ijijaka, kpebekpaan̄ lek, kpebeyaka ikpọk iwop, abọm egbe mè ukpak môtibi ijot ere ya, Emi mâneninyi oduku inyọn̄ ida, ibe ikarọn̄ọ otu ibot geege ìgwook me uko ya.”

⁷Uko gerep Okumugwem Ogwukaan̄ Inyọn̄ mè Ijọn̄ ìre ebi uwu kè Ijeren, sà ebi otoko kè Juda ere uja uti îwopbe ya. Ogwukaan̄-ene îkup ikikpọ chieen̄ imumun̄ unen oyerebet, ire, ìyaka inikimun̄ eje; îkpọ chieen̄ imumun̄ ata irọrọ, ire, ìyaka inikimun̄ mun̄ ito ukwook.

⁸Môfieek inyi enyi ebi ìkinama uwu ijot ere geelek, mè enyi ebi ìkilep ijọn̄ isọkọ lek ijọn̄, mè isa me ikeya ilep otutuuk ijọn̄ isan̄a kpai, mè iluk enyi gaalek me inyọn̄ ijọn̄.

⁹Okumugwem Ogwukaan̄ Inyọn̄ mè Ijọn̄ ìtutumu me utọn̄ n̄a ibe, “Me atikọ, owuwa uwu môkup ukpọk ukpọk. Uwu cha òmimiin̄ mè ijijan, ebelaak ukpọk ukpọk, ebi ìkiluk me emen kpebeyaka ikup.

¹⁰Uko gerep esabe akọp mgbugbak eriembuuk etobobe iba iba ibak me egwe ge, ìbosibi akọp iko miin̄ iba mè iba kpọi; efit iko akpa iba mè akọp iba ewopbe, ìbosibi akọp iko akpa iba mè iba gaalek.”

¹¹Môfieek inyi ebi ìkinan̄a ilaak me ata otu ewelegwe isi igwuun̄ me lek unye miin̄; ebi ìkikup me lek miin̄ irọn̄ eririeen̄ mege miin̄ òsa ema obak ada me chieen̄.

¹²Uneen̄ ile melek uneen̄ ija, mè ekpete melek òja, mè miin̄ òsa ene ìkakinan me irek ijọk kiban̄; ire, ikwaan̄ Okumugwem okirọ, ema kpekisa igwen inu, ubọk ikwaan̄ kan̄ si, ema kpekimumun̄.

¹³Eya orọ, mêkpulu ebi n̄a me akọn̄, mije una ifuk-ibot kiban̄; ebi ilile kiban̄ mêkwaan̄ isan̄a mije uraafiọọn̄, ebi ikike kiban̄, urak-ebek môchiaak ebek igọm.

¹⁴Eya orọ, udọn̄-ufuun̄ môgwuku ebek ibook, mè ichili otu kan̄ iraka oke; otutuuk ebi ilile ebi kiban̄ mè ebi ikike kiban̄, mè ebi ìkinyi okput cha mè ebi usa-miin̄, mêchechieen̄ ita me emen yarak dìp.

¹⁵Mgbọ ya, esip môgak ebilene emen isi, ukwuuk ogwu ebilene môkpukpuku igwook, ebi ugumu kpebeyaka ikọt ibene chieen̄ me inyọn̄.

¹⁶Okumugwem Ogwukaan̄ Inyọn̄ mè Ijọn̄ mônenikaan̄ ikpele umin sa me unen oyerebet kan̄, Awaji ogwu òkup mbuban mônenijeen̄ lek kan̄ kubọk ogwu mbuban sa me ata irọrọ kan̄.

¹⁷Mgbọ ya, ebi kè arọọn̄ mêkisa ere ya irọ ere ema ekibọm urie, ebi ichen mêkisi ibọm si me lek ata inu ebi ubọọn̄ etitiin̄be isun̄.

¹⁸Môfieek inyi ebi ìkisa ofiaan̄ itaba nrọ-nlọ ije, ebi ìkitaba ijo inu me lek olik kubọk ekitaba ebot;

¹⁹ebi ìkitumu ibe mè Awaji igwat lek, mè isi ikwaan̄ kan̄ isi ge isi ge, inyi eji mêmun̄ lek; mè ntọt Ogwu Mbuban ebi Ijeren ilibi igbet, mè inu, inyi eji eriọọn̄.

²⁰Môfieek inyi ebi ìkigwen ijo inu ata inu, mè ikigwen ata inu ijo inu; ebi ìkisa udun irọ utoon̄, mè ikisa utoon̄ irọ udun; ebi ìkimọnọ ujat ibe ìre unin̄i, mè ikimọnọ unin̄i ibe ìre ujat.

²¹Môfieek inyi ebi ìkimọnọ lek kiban̄ kubọk ema miriọọn̄ inu, ebi ìkimọnọ lek kiban̄ kubọk ema miriọọn̄ lek.

²²Môfieek inyi ebi ìnye oguga me lek inwọ-miin̄, mè ebi ìnye ubọk me lek iwọwọlọ miin̄ òkisa ene.

²³Ema ekibọkọ ikpoko udun̄, mè ikifieek oyerebet inwọn ebi ikpak, mè ikijit ebi ata irọrọ unen oyerebet ògbegbe ema.

²⁴Eya orọ, ike alọm ukan̄ okinwọ ekpirikpit akpa, mè ike nchat mbubet okichieen̄ ita me emen ukan̄ òkisasak, ikeya ke ugwun̄-ijọn̄ kiban̄ obojọ ita, mêwuwut ajakajak kiban̄ ichieen̄ kubọk mfuun̄. Mije, ema mîjit Ikan Okumugwem Ogwukaan̄ Inyọn̄ mè Ijọn̄, mè ikpọ ikọ Ogwu Mbuban ebi Ijeren isiki chieen̄.

²⁵Eya orọ, Okumugwem înaan̄ ejit uyok uyok ikeme ebi kan̄; mè ibene ubọk kan̄ isulu ema ikpukpuku igwook. Ebi kè ogoon̄ esisisik, nkwukwu ene otututọmọ ijot lek oniin̄ kubọk inyọn̄ otiton. Ire, ubọk geelek ibe ke otutuuk inu chi îrọ iso, unaan̄-ejit Okumugwem ìkasiki si, Okumugwem ìkpọkpọ ibene ubọk kan̄ ifo inyọn̄ ikiweek isusulu si ema osusut.

²⁶Môbene egop ifo inyọn̄ igween̄ ebi ido ìkup me ujọn̄ọ ere, mè iwut ofi inyi ebi ìkup me ntutun̄ ere geelek me linyọn̄; ema mênunu mgbọ yaage, ugwat ugwat.

²⁷Efuuk ìkpota ema ene geege me owot, inu geege ìkpotọbọ ema ukot, ema kpebenyenyieen̄ ilaak, kpebelalaak si inwọnọ; fanti ebon kiban̄ ìkpotọn̄ọ, olik ikpukot kiban̄ ìkpofieek.

²⁸Oraan̄ kiban̄ ìrereke otu, ogbaan̄ kiban̄, enwunwun itele; ikpukot ukot inyinya kiban̄ ìnye kubọk ewuuk unye isi, ekpirikpo uji ijọn̄ kiban̄ ìgwat kubọk efet egwijo.

²⁹Ema mêkigbin ikinu kubọk egbe àtat, ema ekigbin kubọk bọn egbe àtat; ema mêgọt, mè ichim anam ema ebetaka, mè iben isa ifo, kpunu ogwu òbotet ibọkọ.

³⁰Me usen ya, ebi ido egween̄be cha mêkigọt me lek ebi Ijeren, kubọk okwaan̄ okigbugbut. Ire ene iraan̄ chieen̄ ikpọ lek ijọn̄ ya, ìbomun̄ udun mè uga ufieejit; oduku inyọn̄ môduku ichit utoon̄ egwe usen ya.