Read obolo Asaya 50 Bible Online

Asaya 50 - obolo bible

Asaya 50

¹Okumugwem ìtumu ibe ikeyi: “Mọmọ ikpa iyaak-olom nnyibe nga kinyi eyi nsabe ilap ọmọ isibi? Sà ìre ekene ke nkaan̄ urieek, mè inyam enyi inyi? Îre bak me lek ijo inu kinyi ke enyam enyi; bak me lek nrọ-nlọ kinyi ke nlap nga kinyi isibi.

²Mgbọ nnube, ìre keke orọ kpunube ene geege? Mgbọ ngwenbe enyi, ìre keke orọ kpunube ene geege òfọfọọk emi otu? Ìre ubọk n̄a ìgbigbidim enenen ikọkọt ifaka enyi isibi? Sà ìre emi ǹkakaan̄ unye isasa inyan̄a enyi isibi? Ìkpọ, ǹgagana ere gaalek, okwaan̄ ochachiaak; nrọrọ mè okwaan̄ ikana èwê. Irin̄ òkup me okwaan̄ ojọjọ bak me lek una mun̄, urak-ebek okpakpan̄ ema isan̄a.

³Emi nsa udun ikwun akpabin inyọn̄ kubọk ekwut, mè isa ekwut ufieejit ikat ọmọ lek.”

⁴Ogwukaan̄-ene Okumugwem înyi emi alọm ogwu òkween̄ inu, inyi ǹriọọn̄ ikọ òbotap efuuk me owot ogwu lek owọbe. Ewelegwe usen geelek, ìkitimi emi, mè ikitimi utọn̄ n̄a, inyi ikinọ ikọ kubọk ogwu ekijeen̄ inu.

⁵Ogwukaan̄-ene Okumugwem îchili emi utọn̄, eya orọ, ǹkayaka ìkikpaka ibot; ǹkakpebe ìnyi udun̄.

⁶Ǹyayaka udun̄ n̄a inyi ebi ìkisulu emi, mè itele agba otu n̄a inyi ebi ìkijim emi ifet me otu; ǹkalet isi n̄a me lek unyechieen̄ melek ataak ekigọkọ itọbọ emi me isi.

⁷Mije Ogwukaan̄-ene Okumugwem okitap ubọk inyi emi, emi m̀kparie esip. Eya orọ, ǹtetet isi n̄a inye kubọk isi ewuuk unye isi, mije, nriọọn̄ ibe ke esip ìkpotet emi.

⁸Ogwu òkirọ ibe ikọ inwọn emi ìkajọn̄ọ ere me lek n̄a. Ìre ekene obonigwen ikọ itoon̄ emi me ibot? Ngwa, ene ya inu, inyi eji enekeke isi mè isi! Sà ìre ekene okitoon̄ emi ikọ? Ngwa, ene ya ije igbet emi lek nu!

⁹Îre Ogwukaan̄-ene Okumugwem okitap ubọk inyi emi. Ìre ekene ore ene ya ogwu òbotip emi oyerebet? Ema otutuuk mêjeen̄ ita kubọk ekwut; nkarankat môtaka ema isan̄a kpai.

¹⁰Ekene me lek kinyi okitet ukpook Okumugwem, mè ikigban̄ ikọ me otu ogwu ikwaan̄ kan̄? Ogwu geelek òkije me emen udun, mè ìkakaan̄ utoon̄, ene ya itoon̄ ejit me lek erieen̄ Okumugwem, mè ibieen̄ lek me lek Awaji kan̄.

¹¹Ire, otutuuk kinyi ebi ìmimin ukan̄, mè ikaan̄ ukan̄ nlak ikana lek kinyi, ìsa utoon̄ ukan̄ kinyi ìmọọn̄ inu ìje, mè ìje me lek utoon̄ ukan̄ nlak cha enyi eminbe! Ire, inu enyi ebebọkọ emi me ubọk ìre ikeyi: Enyi mêlaak me ijọn̄ ikibọkọ ujaralek.