Read obolo Asaya 51 Bible Online

Asaya 51 - obolo bible

Asaya 51

¹Ìgban̄ utọn̄, enyi ebi ìkilibi igọọk ata irọrọ, enyi ebi ìkiweek Okumugwem. Ìbene chieen̄ ìkpọ ewuuk ya eyi efieekbe enyi inan̄a me lek, ìkpọ udọn̄ lek ewuuk ya ere ekpọkọbe enyi inan̄a me lek.

²Ìkpọ-nu Ebereyam, nte kinyi, mè Sera ogwu òmaman enyi. Mgbọ ngwenbe ọmọ, ọmọ ìre ene ge gaalek, nnenigbana ọmọ, mè irọ ibe ọmọ ikana owuwa ene.

³Okumugwem môkat Sayọn ejit, mè ikaan̄ njijin me lek otutuuk ama kan̄ ejijakabe igwook. Môrọ emen èwê kan̄ ikana ikup kubọk uko Iden, mè irọ ijọn̄ kan̄ echi ìkakitibi inu inibet lek uko Okumugwem. Unwọọn̄ mè ubelejit ke ebemun̄ me emen kan̄, mè itọtọn̄ melek ida okwa utop ejit.

⁴“Enyi ebi n̄a, ìgban̄ utọn̄; enyi ebi ido n̄a, ìkana utọn̄ ìnọ: Ikan ìbonan̄a emi me ubọk isibi; mânyi unen oyerebet n̄a, inyi ire utoon̄ inyi ebi ido geelek.

⁵Ata irọrọ n̄a òkinu ugwat ugwat, unyan̄a n̄a òkinunu me oniin̄. Mâsa me unye ubọk isibi oyerebet me ibot ebi ido geelek, ebi lek achọ geelek ebekpọ emi chieen̄ me lek, mè ikat ejit ikweek ikikpọ chieen̄ mgbọ unye n̄a mônube.

⁶Ìbene chieen̄ kinyi ìkpọ isinyọn̄, mè ìsiki chieen̄ ìkpọ si linyọn̄ me agan̄ irak. Isinyọn̄ ìbonininiin̄ ichep kubọk oduku; linyọn̄ ojejeen̄ ita kubọk ekwut; ebi ìkiluk me linyọn̄ mêkwakwaan̄ ita kubọk atantan. Ire, unyan̄a n̄a ìbokukup ire mgbọ geelek, ata irọrọ n̄a ìkpokaan̄ itata.

⁷“Ìgban̄ utọn̄, enyi ebi ìriọọn̄ inu òtatat, enyi ebi ìkaan̄ Ikan n̄a me emen ejit kinyi. Ikafieek owot me lek ochak ebilene, ikatet ukpook me lek ikọ unyechieen̄ kiban̄.

⁸Mije, nkarankat môtaka ema isan̄a kubọk ekwut, mkput orerie ema kubọk îkirie eri inwọọn̄ anam. Ire, ata irọrọ n̄a ìbokukup ire mgbọ geelek, unyan̄a n̄a môkup ire ukot geelek.”

⁹Tọbọ jibi! Nan̄a keke! Bene unye kwun̄ tap kubọk ofọnti, owu ubọk Okumugwem! Tọbọ jibi, kubọk orọbe mgbọ òraraka cha, kubọk mgbọ ukot ikaan̄! Ìre ìkare owu osọp ebi Ijipiti[21] okpọkọ okpọkọ, mgbọ ochimbe mgbugbo anam ejit okwaan̄ ya igwọt itibi?

¹⁰Ìre ìkare owu orọ okwaan̄ ochiaakbe, èdọ mun̄ eyi ikpele irem okwaan̄ ya, mè isan̄a oniin̄ me ejit okwaan̄, inyi ebi kwun̄ ofakabe isibi eje esaba etoon̄?

¹¹Ebi Okumugwem okpebe mkpukpe ibot kiban̄ mêkika. Ema mêkikọt okwa inu me Sayọn; unwọọn̄ eyi kpotabe obochit ema me ibot kubọk okpibot ubọọn̄. Ubelejit mè unwọọn̄ mômin igak ema ejit; ufieejit mè igwugwuku mfi ìkpoyaka ikup.

¹²“Emi, iin̄, îre emi me lek n̄a nre ogwu òkikat enyi ejit. Owu ìre ekene, eyi owu okitet ukpook ebilene ikike, ebi ìbekwakwaan̄, mè ikifieek owot me lek bọn ebilene, ebi ìkichachiaak kubọk mbubet?

¹³Owu owuuk Okumugwem ogwu òrorom owu, ogwu òyayat akpa isinyọn̄ iwele, mè itọbọ ọdọ eyi linyọn̄; owu òkiluk me ikpele ukpook usen geelek bak me lek uyok uyok unaan̄-ejit ogwu òkitutuku owu, mije îbembe lek ijijijaka owu. Uyok uyok unaan̄-ejit ogwu òkitutuku owu ya ìkup me owa mgbọ keyi?

¹⁴Ìkpojọn̄ọ mgbọ, mêsan̄a ebi ìkup me mkpọn isibi, ema kpebekup me mkpọn emen ijọn̄ ikwaan̄, inorie otu ìkabonan ema.

¹⁵Emi me lek n̄a nre Okumugwem Awaji kinyi, ogwu òkifuku okwaan̄, inyi ekoon̄ igbugbut; Okumugwem Ogwukaan̄ Inyọn̄ mè Ijọn̄ ore erieen̄ n̄a.

¹⁶Emi ntap ikọ n̄a me otu kwun̄, mè isa ubọk n̄a ikana owu ichit. Emi ya ogwu òsusun̄ akpabin inyọn̄ me irek kan̄, mè itọbọ ọdọ eyi linyọn̄, emi ntumu inyi ebi Sayọn ibe, ‘Enyi ìre ebi n̄a.’ ”

¹⁷Tọbọ jibi, tọbọ jibi ma! Owu Jeruselem, nan̄a keke! Owu ogwu ònwọnwọ ufialek inan̄a me ubọk Okumugwem, me emen ekpen̄ eyi uyok uyok unaan̄-ejit kan̄, owu ogwu ònwọnwọ ufialek ire lek afuk ebon, me emen ekpen̄ unaan̄-ejit ya òkirọ ebilene egbugbe.

¹⁸Me lek otutuuk bọn îmaan̄be, kpunu geege òkisa ọmọ ije; me lek otutuuk bọn îkpukpobe isibi, kpunu geege òkitet ọmọ ubọk ijeen̄ oniin̄.

¹⁹Ùrioon̄ iba orọn̄ ikeme owu, ìre ekene obokọt ikat owu ejit? Mfufiat mè jakajaka, akọn̄ mè akan̄, ìre ekene obokọt isuuk owu ejit?

²⁰Bọn kwun̄ ebirieen̄ mîgak iweek isan̄a, mè ililam ibia me ibot oniin̄ geelek, kubọk ogaan̄ ufe otetbe. Uyok uyok unaan̄-ejit Okumugwem îre ema lek òjot òjot, Awaji kwun̄ okakan̄ inu si inyi ema.

²¹Eya orọ, gban̄ utọn̄ me lek ikọ keyi, owu ogwu ukwook otetbe, ogwu òkigbugbe gbegbegbe, ire, ìkare miin̄ osa.

²²Ogwukaan̄-ene Okumugwem, Awaji kwun̄, ogwu òkitumu ikọ ibot ebi kan̄, ìtumu ibe ikeyi: “Kpọ, nra ibọkọ ekpen̄ unaan̄-ejit ya òkirọ owu ògbugbe isan̄a owu me ubọk. Ekpen̄ uyok uyok unaan̄-ejit n̄a ya, owu òkpoyaka ikpọk inwọ inu ònan̄a me emen kan̄ ofifi.

²³Emi mâyaka ekpen̄ ya itap me ubọk ebi ìkitutuku owu cha, ebi mgbọ ìkibe owu, ‘Siki laak kana kwuun̄, inyi eji eje me inyọn̄ kwun̄.’ Owu ora isa udun̄ kwun̄ irọ ijọn̄, mè isa irọ oniin̄, inyi ema ekeje esaba.”