Read obolo Asaya 52 Bible Online

Asaya 52 - obolo bible

Asaya 52

¹Owu Sayọn, tọbọ jibi! Nan̄a keke! Bene unye tap so lek kwun̄ kubọk ofọnti. Owu Jeruselem, ama mbuban, kpulu ujuja ofọnti cha òkup òrirọ òrirọ kwaan̄ me lek. Mije, ebi kpefieek afi mè ebi ìkaan̄ mbuban me lek kpebeyaka inin̄ emen kwun̄ ofifi.

²Owu Jeruselem, gen̄ achiaan̄ san̄a me lek kwun̄, nan̄a keke si siki kweek irek me inyọn̄ ogboon̄ ubọọn̄ kwun̄. Owu ama Sayọn etetbe me usun̄ akọn̄, tọn̄ọ mkpọn òkup me ebek kwun̄ san̄a.

³Mije, Okumugwem ìbe ikeyi: “Enyam enyi me ikike, kpebesa ikpoko ifaka enyi isibi.”

⁴Mije, Ogwukaan̄-ene Okumugwem ìtumu ibe, “Me adasi mgbọ, ebi n̄a efon Ijipiti isi iluk; me mgburudun̄, ebi Asiria enenitutuku ema.”

⁵Okumugwem ìkitumu ibe, “Mgbọ keyi, ìre keke ire eyi? “Mîtet ebi n̄a ije me ikike, ebi ìkikpulu ema ekekirọ ema ochak. Usen geelek òwele me inyọn̄, ekpọkpọ ikifiat emi erieen̄.

⁶Eya orọ, ebi n̄a mêriọọn̄ erieen̄ n̄a; mije keya si, me usen ya, ema mêriọọn̄ ibe ke emi nre ogwu keya òkitumu ibe, ‘Kpọ emi gwu!’ ”

⁷Mijaan̄ enenen imumun̄ ogwu osat okije me inyọn̄ ogoon̄ isaba inu, mè ikisa ata etip inu, mè ikilook etip eyi esuuk, mè ikisa etip unwọọn̄ inu, mè ikilook etip unyan̄a, mè ikitumu inyi Sayọn ibe, “Awaji kwun̄ ore ubọọn̄!”

⁸Ìgban̄! Ebi mbem kinyi mêkitaan̄ ukpo, ema otutuuk mêkigbaan̄ itaan̄ ukpo unwọọn̄. Mije, isi mè isi, ema mîsa chieen̄ kiban̄ imun̄ mgbọ Okumugwem okika inu me Sayọn.

⁹Enyi, ǹrioon̄ ama Jeruselem, ìgbaan̄ ìtaan̄ ukpo ìkọt okwa unwọọn̄, mije, Okumugwem îkat ebi kan̄ ejit, ọmọ îfaka Jeruselem isibi.

¹⁰Okumugwem môsan̄a unye eyi ubọk mbuban kan̄ isibi me chieen̄ ebi ido geelek; ebi ìluk me otutuuk ntutun̄ ere geelek me linyọn̄ mêmun̄ unyan̄a Awaji kiji.

¹¹Ìnan̄a! M̀be enyi, ìnan̄a! Ìje ìsibi me ere ya! Ikachak ubọk me lek inu òkaan̄ mbuban me lek! Ìnan̄a me emen kan̄ ìsibi, mè ìgwọk lek kinyi, enyi ebi ìkiben nroon̄ ikwaan̄ Okumugwem.

¹²Ire, enyi kpebenan̄a ugwat ugwat, kpebelilibi si ekot ekot; mije, Okumugwem môje me isi kinyi, Awaji ebi Ijeren môkije me udun̄ kinyi ikikput enyi udun̄.

¹³Kpọ, inu môje ijaan̄ me lek gwun̄ ikwaan̄ n̄a; mêbene ọmọ ifo inyọn̄, mè ijibi ọmọ ibene, mè imin ọmọ enenen.

¹⁴Ike owuwa ene erikibe mgbọ emun̄be ọmọ,[22] mije akpalek kan̄ omumian̄abe, ìkayaka ìbet lek akpalek ene, mè ubọk înwenebe isan̄a me ikeke, ìkayaka ìkup kubọk ebilene,

¹⁵ikeya si, ọmọ môrọ owuwa ido eriki enyinya; ebi ubọọn̄ mênin̄ mbuuk me isi kan̄. Mije, ema mêmun̄ inu eyi kpekpakpa inyi ema, mè igobo inu ema kpenọnọ me utọn̄ itet.