Read obolo Asaya 53 Bible Online

Asaya 53 - obolo bible

Asaya 53

¹Ìre ekene ochieek etip eji elookbe? Sà ìre ekene ke ekpọk mbum unye ubọk eyi Okumugwem ijeen̄?

²Ọmọ ìtibi isibi me isi Okumugwem kubọk nsek otu uti, mè ikup kubọk ugwun̄-ijọn̄ uti òbubum isibi me ijọn̄ òchachat. Ìkakakaan̄ uja geege, ìkakaan̄ si umin ubọọn̄, eyi motababe eji itap me lek kan̄, kpunu inu ge ikeyi me ubọk ọmọ okupbe, eyi morọ ibe ọmọ ilọk eji.

³Ebilene ekpọkpọ ọmọ chieen̄ isiki, mè ijit ọmọ; ọmọ ìre ogwu ufieejit, mè ogwu òrọriọọn̄ ufialek. Ọmọ ìkup kubọk ogwu ebi ene ekida isi kiban̄ isan̄a mgbọ geelek emun̄be ọmọ, eji ekpọkpọ ọmọ chieen̄ isiki, kpesa ọmọ igwen inu geege.

⁴Me atikọ, unan kiji ke ọmọ obọkọ ibeme, mè ibọkọ ufialek kiji iben. Ire, eji emun̄ ọmọ kubọk ogwu Awaji osulube osusut, ogwu îsulube, mè itun̄ imem.

⁵Ire, echim ọmọ akpa itibi mije nrọ-nlọ kiji, mè ikpukpuku ọmọ igwook mije ijo irọrọ kiji. Osusut òsa esuuk ijet eji ìkup me lek kan̄, unan kan̄ ke esa igwa eji.

⁶Eji otutuuk ene ejeje ilọ oniin̄ kubọk arọọn̄, ogwu ikup, otap isi me oniin̄ eyi lek kan̄. Ire, Okumugwem obeben ijo irọrọ kiji otutuuk ene itoon̄ ọmọ me ibot.

⁷Mîtutuku ọmọ, mè isulu ọmọ imem, ire, ìkachili otu ìsan̄a amọn kubọk ge; esa ọmọ ije kubọk gwun̄ arọọn̄ ebesi ikpakpan̄; ike arọọn̄ okinin̄ mbuuk me isi ebi ìkisọp ọmọ inwọọn̄ me lek, ikeya si, ọmọ ìkakama otu ìsan̄a amọn.

⁸Esa me tukutuku mè itip oyerebet itet ọmọ isa ije. Ekene obokọt itumu inu ofolek ebi owot iman kan̄? Mije, mîfieek ọmọ isan̄a me linyọn̄ ebi ìkup me ògat ugwem; bak me lek nrọ-nlọ ebi n̄a ke esut ọmọ osusut.

⁹Enyi ọmọ udọn̄-ufuun̄ melek ebi ikpak, ọmọ ìkwu mkpa melek ebi ubọọn̄, ubọk geelek ibe ke ìkarọ inu afa geege, kpukpunu si ofiaan̄ geege me otu kan̄.

¹⁰Ire, îneme Okumugwem ikpukpukpuku ọmọ, mè irọ ọmọ ibọkọ ukwook. Ire, mgbọ Okumugwem isisa ugwem kan̄ irọ ngwugwa awọ, ọmọ mômun̄ owuwa bọn, mè iluk ujọn̄ọ ugwem; nkeek Okumugwem mônenije ijaan̄ me ubọk kan̄.

¹¹Mgbọ ujaralek kan̄ isiraka, ọmọ mômumun̄ inu ọmọ orọbe, môjojot ọmọ owot. Gwun̄ ikwaan̄ n̄a ogwu ata irọrọ môsa me ifuk-ibot kan̄, isan̄a itip-oyerebet me ibot owuwa ene, mè ibọkọ ijo irọrọ kiban̄ ibeme.

¹²Eya orọ, emi mânyi ọmọ uche me etete ebi ilile, ọmọ môgọọk ebi unye iche inu efumbe me akọn̄, mije, îyaka ugwem kan̄ inyi mkpa, efufuk ọmọ me otu ifuk ebi ìrọrọ ilọ. Ọmọ îbeme ijo inu owuwa ene, mè ikiriaak uriaak me ibot ebi ìjeje ilọ.