Read obolo Asaya 57 Bible Online

Asaya 57 - obolo bible

Asaya 57

¹Ebi ata irọrọ mekikwaan̄ ifon, ejit ene geege ìkafo lek; mekiteen̄ ebi ìkekeke inye isan̄a, ene geege ìkakaan̄ ngobo-ntet, ibe ke ekiteen̄ ebi ata irọrọ isan̄a, inyi ijo inu òbonu ikare ema lek.

²Ebi ìkije itat mênin̄ me esuuk; isiki-efuuk okup inyi ema me mkpa.

³Enyi bọn ebirieen̄ ebi nga kiban̄ erebe ebi ìdo inu, ìna me ere keyi, enyi bọn ebi ugan-nwa, mè bọn ebi òje oyet!

⁴Ekene ke enyi ekichak? Sà ìre ekene ke enyi ekichili otu ibook itumu ikọ inyi, mè ikiwọọk alọm me otu inyi? Ìre ìkafat ìre enyi kechi ere bọn ebi òkpaka ibot, mè bọn ebi ataak.

⁵Ulọk itọtọbọ ebum inyi mkpọmfaka me irak uti ilip geelek, mè irak uti geelek òsasan agọọk, îbaan̄ enyi ada me chieen̄. Enyi ekisa bọn kinyi igwa ngwugwa me ibot mun̄ òchachiaak, mè irak ewuuk òkup ngigo ngigo.

⁶Ewuuk urọt lek òkup me ibot mun̄ òchachiaak cha ore awaji kinyi, ewuuk cha ore awaji enyi ekitọbọ ebum inyi. Echa ke enyi ekigwook miin̄ inyi, mè ikigwa ngwugwa akpa inyi. Eyi enyi ekirọ ojelek inu òkup ikeyi, ìre ejit ìbojeje isiki emi?

⁷Inyọn̄ ibot ubene ubene ogoon̄ ke enyi ekito mkpilaak kinyi, ere keya si ke enyi ekinene isi igwa ngwugwa.

⁸Me udun̄ afọn̄ kinyi melek ubọk afọn̄ kinyi, ke enyi esun̄ òchichaka mkpọmfaka kinyi cha. Enyi mîjit emi itele, mè ikibubat ikana, kubọk ogwu òje oyet, ikigọọk ofifi awaji, mè ichili mkpilaak kinyi ibook, mè inene inyọn̄, mè ichak iwele. Enyi mîgọọk ebi kè awaji cha, ebi enyi emabe inyọn̄ mkpilaak kiban̄, ikaan̄ mgbaan̄-nchieek, mè imun̄ njak kiban̄.

⁹Enyi mîsa aran̄ ngwugwa ikaan̄ me ubọk iben ije ije isi lek Molek, mè isa si ogbogbo aran̄ utop olu kinyi igbaalek. Enyi mîria si ebi otuchieen̄ kinyi mege isi igwook me ujọn̄ọ ere; mè igele lek kinyi isiki mege isi ire ama ekwukwu me lek kan̄.

¹⁰Ogbogbo jen̄ejen̄e kinyi cha îta enyi efuuk me owot, ire, enyi kpebetumu ibe ke kpunu oruru. Enyi mîmun̄ aya efuuk me emen kinyi, eya orọ, lek ìkakiwọ enyi.

¹¹“Ekene ke enyi ekilibi, mè ikitet ukpook me lek, eyi enyi ekirọ emi me lek ofiaan̄ ofiaan̄, mè iwuuk emi itele, kpeyaka ikikekeek inu geege ofolek n̄a? Ìre ìkare mije nriaan̄be ere karake akat orọ enyi kpekifieek owot me lek n̄a?

¹²Emi mâkpọk mbum ata irọrọ kinyi mè ubọk ikwaan̄ kinyi cha, ìkposibi enyi oruru geege.

¹³Mgbọ enyi ekitaan̄ ukpo iweek ntap-ubọk cha, mkpọmfaka cha enyi etitiin̄be isun̄ enenyan̄a enyi ma! Efet môbeen̄ ema otutuuk ije, efuuk ikike môwut ema isan̄a. Ire, ogwu òtap ibot me ubọk n̄a ilet lek, ọmọ obokaan̄ ijọn̄ me ìrot, mè ikaan̄ si ogoon̄ mbuban n̄a.”

¹⁴Mgbọ ya, mêkitumu ibe, “Ìgbọ oniin̄, ìgbọ oniin̄! Ìnen̄e oniin̄ ìsun̄! Ìsan̄a ekpuk uti cha òchichit oniin̄ ebi n̄a ìsan̄a.”

¹⁵Mije, Ogwu Òbebene mè Ogwu Ebenebe Ifo Inyọn̄, ogwu òkiluk ire mgbọ geelek, ogwu erieen̄ kan̄ orebe Mbuban, ìtumu ibe ikeyi: “Emi ǹluk me ere òbebene mè ikup me mbuban, mè iluk si melek ogwu ijo inu kan̄ osisaakbe me ejit, ogwu ògegele lek isiki me ekwukwu kan̄, inyi ǹtap ogwu ògegele lek isiki me ekwukwu ugwem me emen, mè ǹtap si ugwem me emen ogwu ijo inu kan̄ osisaakbe me ejit.

¹⁶Emi ǹkabakpọkpọ ikibaak ibaak melek kinyi isi ire mgbọ geelek, ǹkabakpọkpọ ikinaan̄ ejit si ire mgbọ ikakaan̄ge itata. Mije, ire nrọ ikeya, efuuk ebi ene môwọ me isi n̄a, ogwu ebilene ogwu emi nrombe môdek isan̄a.

¹⁷Îre mije ten̄ten̄ oruru ebi n̄a chi ke nnaan̄ ejit, mè isulu ema osusut, mè isa me unaan̄-ejit ilet isi n̄a me lek kiban̄; ire, ema echechieek mkpa ikije ifo isi me emen mkpaka-ibot òkup ema me ejit.

¹⁸Mmun̄ oniin̄ ema ekije, ire, mâgwa ema; mâsa ema ijeen̄ oniin̄, mè ikat ema ejit, mè ikat si ejit ebi kiban̄ ebi ìkifieek ejit.

¹⁹Mâtap ema itọn̄ me otu. Esuuk, iin̄ esuuk ikup inyi ebi ìkup me ujọn̄ọ ere mè ebi ìkup me mgbet ere. Emi mâgwa ema. Emi Okumugwem ntumu.

²⁰Ire, ebi ikpak ekup kubọk okwaan̄ ogbururu onin̄be, eyi ìkakikọt ìlọkọ, eyi ekoon̄ kan̄ okitọp ogbọ mè ibat igwook me inyọn̄.

²¹Esuuk geege kpunu inyi ebi ikpak.” Awaji n̄a otumu.