Read obolo Asaya 59 Bible Online

Asaya 59 - obolo bible

Asaya 59

¹Me atikọ, ubọk Okumugwem ìkagbidim ìraka isasa inyan̄a ene, utọn̄ kan̄ si ìkalobo ìraka isasa inọ ikọ.

²Ire, ijo irọrọ kinyi îfieek enyi isan̄a me lek Awaji kinyi; ijo inu kinyi îlet isi kan̄ isan̄a me lek kinyi, inyi ikanọ enyi ida.

³Mije, ubọk kinyi îken eje, ijo inu îbaan̄ enyi me otubọk, otu kinyi îkan̄ ataak, otu alọm kinyi îtumu usem ikpak.

⁴Kpunu ogwu òkigwen ene oyerebet ònenen, kpunu ogwu òkisa me atikọ itumu ikọ ibot kan̄ me irek oyerebet, Ema ekisa inu ikakaan̄ge ibot ibieen̄ lek, mè ikikan̄ ataak; ekifiat mgbọ itọt ijo otitọt, mè ikirọ inu ikpak cha ema etọtbe.

⁵Ijo otitọt kiban̄ ìkup kubọk ekibak nkwa ijo ulu, mè ikup si kubọk ekilọk njin olọnjin. Ogwu geelek òtaka nkwa kiban̄, ìbokwukwu; ge ibum, ijo ulu osibi me emen.

⁶Njin olọnjin kiban̄ cha, kpebekọt isa ilọk ofọnti; ubọk ikwaan̄ kiban̄ ìkpokọt ichit ema lek. Irọrọ kiban̄ ìre irọrọ eyi ijo inu, inu afa inu afa ojot ema ubọk.

⁷Ukot kiban̄ ìkisa ema ilibi isi itap me ijo inu; ema kpekifiat mgbọ ifafiat eje ebi kpelọ inu geege. Ekiket kiban̄ ìkire ekiket ijo inu; mfufiat mè jakajaka ìkijojot me ere geelek ema ejebe inin̄.

⁸Ema kperiọọn̄ oniin̄ eyi esuuk, kpunu unen oyerebet me ere ema ekije. Ema mîrọ oniin̄ kiban̄ ikukọnọ; kpunu ogwu òboje me oniin̄ cha mè imun̄ esuuk.

⁹Eya orọ, unen oyerebet îjọn̄ọ eji ere me lek, ata irọrọ si ìkakire eji lek. Eji ekiruk chieen̄ ikiweek utoon̄, ire, udun gaalek ke eji ekimun̄, eji ekiweek ere òtotoon̄, ire, emen ekpuk udun ke eji eyaka inikije.

¹⁰Eji ekichiaan̄ ubọk me agba lek uwu kubọk ebi ǹnàan̄, mè ikichichiaan̄ ubọk iweek oniin̄ kubọk ebi kpekaan̄ chieen̄. Eji ekigbugbe irọn̄ me ejit ikarek kubọk ìre me lek ufit-egwe; mè etete ebi unye, eji enikup kubọk ebi ìkwakwaan̄.

¹¹Eji ekigọt kubọk ibo nriọk, mè ikifim ufieejit ufieejit kubọk ekerekwukwu. Eji ekiruk chieen̄ iweek unen oyerebet, ire, kpemun̄, mè ikiweek unyan̄a, ire, îjọn̄ọ eji ere me lek.

¹²Nrọ-nlọ kiji îtiik ibene me isi kwun̄, ijo inu kiji okekikeke ata-ikọ ikeme eji. Ijo irọrọ kiji ìbabia eji me lek, nrọ-nlọ kiji geelek, eji mîriọọn̄:

¹³Eji mîkpaka ibot inyi Okumugwem, mè irọ ọmọ inu ofiaan̄, mè igba udun̄ ifit Awaji kiji, mè itọt itututuku ene, mè ifefieek lek isan̄a me lek Awaji, mè itutumu ofiaan̄ ofiaan̄ ikọ òkup eji me emen ejit.

¹⁴Eya orọ, mîrieen̄ unen oyerebet ikpebe inyi udun̄, ata irọrọ okekeke me ujọn̄ọ ere, atikọ okwakwala irọn̄ me lek oniin̄, unen irọrọ ìkakọt ìraka ìnin̄.

¹⁵Atikọ ìkayaka ìkup, ogwu isan̄a lek me lek ijo inu, mîra itet ogwa isut, mè ifum inu kan̄. Okumugwem îmun̄, mè inaan̄ ejit, mije, unen oyerebet ìkakup.

¹⁶Îmun̄ ibe ke kpunu ene geege, îfieek ọmọ me lek imumun̄ ibe kpunu ene geege òneniteek. Eya orọ, ubọk kan̄ osisi ikwaan̄ unyan̄a inyi ọmọ, ata irọrọ kan̄ obebieen̄ ọmọ inye.

¹⁷Ọmọ îben ata irọrọ ikwaan̄ kubọk ukwek-ejit, mè ikwuun̄ unyan̄a me ibot kubọk okpibot akọn̄; îtap irọrọ useen̄ inu kubọk ofọnti, mè isa ikpele ulọk ikat ikana lek kan̄ kubọk ekwut.

¹⁸Ìbokpe ene geelek mkpukpe ikpọ me lek inu ene erọbe; ebi ochicha kan̄ mêmun̄ uyok uyok unaan̄-ejit kan̄, ebi oriara kan̄ mêbọkọ uga osusut me useen̄ inu ema erọbe; ebi ìkup me lek achọ geelek mêbọkọ useen̄ mkpukpe ògbegbe ema.

¹⁹Bene me agan̄ ichep-ura, ebi ene mêtet ukpook me lek erieen̄ Okumugwem, bene me agan̄ mbum-ura, ebi ene mêmin ujamgbugbo kan̄. Mije, Okumugwem ìbonu kubọk unye agbugbuk òkilibi itibi ere ògbagba inwan, eyi efet Okumugwem[23] okiben iwut ije.

²⁰“Ogwu Òfaka ene Isibi mônu me Sayọn, me lek ebi ìgwugwu ikom me ijo kiban̄ me otoko kè Jekọp. Emi Okumugwem ntumu.”

²¹Okumugwem ìtumu ibe, “Ire emi, eyiyi ore inyan̄a-ibot n̄a melek kiban̄. Ekwukwu n̄a eyi òkup me lek kwun̄, mè ikọ n̄a eyi ntapbe me otu kwun̄, ìkponan̄a me otu kwun̄, mè ìre me otu bọn kwun̄, mè ìre otu bọn bọn kwun̄ bene me mgbọ yi si re mgbọ geelek. Emi Okumugwem ntumu.”