Read obolo Asaya 60 Bible Online

Asaya 60 - obolo bible

Asaya 60

¹“Tọbọ jibi, mè toon̄, mije, utoon̄ kwun̄ îra inu, ujamgbugbo Okumugwem îbum itoon̄ owu me lek.

²Kpọ, udun îkana linyọn̄ ichit bùk, uga udun îkana ebi ife geelek ichit. Ire, Okumugwem îbum itoon̄ owu me lek kubọk ura, ujamgbugbo kan̄ îsibi igwook owu lek.

³Ebi ido geelek mênu me lek utoon̄ kwun̄, ebi ubọọn̄ mênu me lek utoon̄ agan̄ egwe kwun̄.

⁴“Bene chieen̄ kwun̄ kpọ kana okokop; otutuuk ene mêkititiin̄ ikinu me lek kwun̄; bọn kwun̄ ebirieen̄ mêkinan̄a me ujọn̄ọ ere ika, mêkibeen̄ bọn kwun̄ ebibaan̄ me ubọk isa ika.

⁵Mgbọ ya, owu mômun̄, mè ibele ejit, ejit kwun̄ môkisulu tip tip tip, mè ijot me unwọọn̄; mije, mêyaka inu ubọọn̄ ebi okwaan̄ okwaan̄ isa ijet owu, inu ubọọn̄ ebi ido geelek môkekinu inyi owu.

⁶Urum aligọ môjot lek ijọn̄ kwun̄, bọn aligọ ònan̄a me Midian mè Efa, mè otutuuk echi ònan̄a me Sieba mênu, mêbeme alata araran̄ mè nsensi inu, ebi ene mêkekitumu itọn̄ eyi Okumugwem ikana.

⁷Mêtitiin̄ otutuuk urum arọọn̄ ebi Keda isa ijet owu, orie arọọn̄ ebi Nebayot mêkirọ ikwaan̄ inyi owu; mêbọkọ ema isa igwa ngwugwa me inyọn̄ ntook n̄a, emi mâbabala Uwu Mbuban eyi umin n̄a.

⁸“Ebi owa ire ebibi ìkiwulu ikiraka kubọk oduku inyọn̄, mè ikiraka kubọk ekerekwukwu okiwulu iraka ifo lek uwu kiban̄?

⁹Me atikọ, ebi lek achọ geelek ekikweek ikpọ emi; uji ile ebi Tasis okije me isi, ikisa bọn kwun̄ me ujọn̄ọ ere ika, melek alata okuket mè alata araran̄ kiban̄, bak me lek erieen̄ Okumugwem Awaji kwun̄, Ogwu Mbuban ebi Ijeren, mije, ọmọ îrọ enyi ekaan̄ umin.

¹⁰“Ebi ìnan̄a me ofifi ido ebeninama mgban kwun̄ cha, ebi ubọọn̄ kiban̄ mêkisi ikwaan̄ inyi owu. Ubọk geelek nsabe me unaan̄-ejit isulu owu osusut, mâsa me ulọk nkaan̄be me lek kwun̄ ikaan̄ owu ata ejit me lek.

¹¹Otunchit kwun̄ ebekigwugwuku ibook mgbọ geelek, ikarek mè ìre eririeen̄, kpebekigwuk ema, inyi ebi ene ekesa inu ubọọn̄ ebi ido geelek ejet owu; ebi ubọọn̄ kiban̄ ebekije me isi.

¹²Mije, ido geelek mè ìre mkpulu geelek ebi kpesi ikwaan̄ inyi owu, ebechechep; ebejijijaka ema igwook.

¹³“Mêsa atalek uti cha òkinyi ebi Lebanọn umin ijet owu, uti alaga inwan̄ mè uti junipa mè uti siperes, inyi mêsabe ibala Uwu Mbuban n̄a, mè isa irọ ere nkitoon̄ ukot n̄a ikaan̄ umin.

¹⁴Bọn ebirieen̄ ebi ìkitutuku owu mênu inigele ibot isiki inyi owu umin, ebi geelek ìkpọkpọ owu chieen̄ isiki mênu inigele ibot isiki me ukot kwun̄, mè igwen owu Ama eyi Okumugwem, Sayọn Ogwu Mbuban ebi Ijeren okaan̄be.

¹⁵“Ubọk geelek ejitbe owu itele, mè icha owu, ire lek kpekije iraka me emen kwun̄, mârọ owu òre inu gogolek ire mgbọ geelek, mè òre unwọọn̄ ònyi ebi ukot geelek.

¹⁶Owu mônwọ mun̄ ebe ebi ido geelek, mêsa ebe ebi ubọọn̄ ikpukpo owu. Mgbọ ya, owu môneniriọọn̄ ibe ke emi, Okumugwem, nre Ogwu Unyan̄a kwun̄, Ogwu Òfaka owu Isibi, Ogwu Unye kè Jekọp.

¹⁷Kpan̄asi ekwe, mâsa alata araran̄ ijet owu, mè inyi owu alata okuket me irek okwukwut. Kpan̄asi uti, mâsa ekwe ijet owu, mè inyi owu okwukwut me irek ewuuk. Mâsa esuuk irọ ogwu ibot inyi owu, mè isa ata irọrọ irọ ogwu òkikpulu owu.

¹⁸Kpebeyaka inọ ibe mêkirọ inu afa me inyọn̄ ijọn̄ kwun̄, mfufiat mè jakajaka ìkpokup me okike ijọn̄ kwun̄. Ire, owu môgwen mgban kwun̄ Unyan̄a mè igwen otunchit kwun̄ Itọn̄.

¹⁹Ura ìkpoyaka ire utoon̄ inyi owu me ikarek, utoon̄ onyan̄ ìkpoyaka itoon̄ si ire owu lek. Mije, Okumugwem obore utoon̄ kwun̄ ire mgbọ geelek, Awaji kwun̄ obore umin kwun̄.

²⁰Ura kwun̄ ìkpoyaka ikpọk inim ofifi, onyan̄ kwun̄ si ìkpoyaka ichep. Mije, Okumugwem obore utoon̄ inyi owu ire mgbọ geelek, usen ufieejit kwun̄ mônenita ire okputut kan̄.

²¹Mgbọ ya, otutuuk ebi kwun̄ mênenire ebi ata irọrọ, ema mênenikaan̄ ijọn̄ ya me ìrot ire mgbọ geelek. Ema ìre nsek otu uti n̄a mwopbe, ikwaan̄ ubọk n̄a orọbe, isasa ijeen̄ umin n̄a.

²²Ogwu sọntiik kiban̄ môkana otoko obop ene, ogwu òsisip ichit môkana ikpele ido. Emi nre Okumugwem; mgbọ ya isi ire, mârọ inyi inu yi irọ iso ugwat ugwat.”